၃၄။ ကိုယ်တော်ယေရူဆနိန်အီးက အယောက်ကတန်ဒူရက်
ကိုယ်တော်ယေရူနာ ဘုရားရှင်ကနိဗ္ဗာန်ရွှေမြို့တော်အကြောင်းယင် တန်ဒူရက်အိမ်း ငါးဆနပ်လင်ကဟေ။ ဉပမာငါနဲ့ အမှာနာ “ဘုရားရှင်ကနိဗ္ဗာန်ရွှေမြို့တော်စာ လူဟူးဝါနာ အမှာကလယ်ပြင်ယာ တိမ်းပီးက ညောင်အတူ(ဖ်)ဒလေဖြစ်ဟေ ။ အတူ(ဖ်)ထဲယာ ညောင်အတူ(ဖ်)စာ ပိ(ရ်)ဇောဖြစ်ဟေက နနိန်ရက်ချေဟေ။”
“ညီငါဒင်းယဲ့ ညောင်အတူ(ဖ်)ယာပင် အဖင့်ဖော်ဗားကရပ် အာဟက်ရက်ပြောင်ယောယန်ကို အူဆီရက် ဗန်ကိုပုကိုတုံ့လူမှား ဥယျာဉ်အတာဟုတ်ယာ ပြောင်ဇောအဖင့် ဖြစ်ကလင်က။”
အယောက်ကတန်ဒူဆူယာနာ ကိုယ်တော်ယေရူစာ “ဘုရားရှင်ကနိဗ္ဗာန်ရွှေမြို့တော်စာ တာဆာလှောင်ဟူးဝါက ပေါင်မုန့်စူကဂျူံထဲယာ ကက်မှားနယ်က တောင်ဆီ(လ်)ဒလေဖြစ်ဟေ”ငါကို ငှားဆာနပ်လင်ကဟေ။
“ဘုရားရှင်က နိဗ္ဗာန်ရွှေမြို့တော်နာ လူဟူးဝါနာ အမှာကလယ်ပြင်ဆူယာ မြှုပ်ပီးက ရတနာသေတ္တာအိမ်းတူဟေ။ အယောက်ကဟူးဝါစာ အိမ်မှာရတနာရက်အင် ပေါ်ကလင်ကို တစ်ဗျင်းစိုးကက်ကဟေ။ မှအကြောင်းအိမ်း အယောက်ရပ်တာ အမှာနာပြန်ကို မြှုပ်လင်ကဟေ။ အမှာနာ တစ်ဗျင်းဝမ်းမြောက်ဝမ်းသာဖြစ်ကို ရတနာသေတ္တာမြှုပ်ပီးက လယ်ယင်မရိ(ရ်)လူဇောက်မှ အမှာကပိုင်ဆိုင်ဟေက ဦးဇားစုတ်ရက်အင်အချေနက်ကဟေ။
“ဘုရားရှင်က နိဗ္ဗာန်ရွှေမြို့တော်နာ တစ်ဗျင်းတန်ဖိုးပြောင်က ပုလဲတစ်လုံးအိမ်းယဲ့တူဟေ။ ပုလဲကုန်သည်ဟူးဝါစာ ပေါ်ကရပ် အိမ်မှားပုလဲယင် မရိ(ရ်)လူဇောက်မှ အမှာက ပိုင်ဆိုင်မူးစုတ်ရက်အင် အချေနက်ကအိမ်း တူဟေ။”
အချိူ့လူရက်စာ အမှာရက်ကမီးဟေက လုပ်ကအကြောင်းအိမ်း ဘူရားရှင်နာ အမှာရက်အင်လက်ခံယန်ကငါကို ထင်တုံ့ကလူရက်အ(လ်) ငါဟေ။ အိမ်မှာလူရက်စာ ကုသိုလ်ကောင်းမူး အလုပ်ကလူရက်အင် အာတန်ဟေ။ မှကရပ် ကိုယ်တော်ယေရူနာ အမှာရက်အင် “ဘုရားကျောင်းယာ တာဆာပြိုင်းနိန်ဟူးယင် ဆာဗား(ဖ်)ကဇိဉ်လင်ကဟေ။ ဟူးဝါစာ အခွန်ကောက်ကလူဖြစ်ကို အယောက်ကဟူးဝါဂ(လ်) ဘာသာရေးခေါင်းဆောင် ဖြစ်ဟေ။” ငါကို မှတန်ဒူအိမ်း ငါးဆနပ်လင်ကဟေ။
ဘာသာရေးခေါင်းဆောင်စာ အတတ်ကတေ ဆာဗား(ဖ်)လင်ကဟေ။ “ငါစာ ကျန်ဟေက ဓားပြရက် ၊ အတရားကလူရက် ၊ လူရက်ကအဆာနားရက်အင်ပြစ်မှားဟေက လူရက်အိမ်း အိမ်မှာနေရာ ငါဟေက အခွန်ကောက်ကလူရက်တလေ အပြစ်ငါကလူ အရိ(ရ်)က အတွက် ဘုရားရှင်ယင် ကျေးဇူးတင် နက်ဟေ။”
“ဥပမာငါနဲ့ ငါစာ တစ်ပတ်အာ နိန်ဟက်ဆာကဇတ်ရှောင်ကို ငါကလူက ကုန်ရက်အိမ်းတင်ဂါရက်က တစ်ဆယ်ရာခိုင်နူန်းယင် ဘုရားရှင်ဇိဉ် အီဒက်ကဟေ။”
“ညီငါဒင်းယဲ့ အခွန်ကောက်ကလူနာ ဘာသာရေးခေါင်းဆောင်အိမ်း လင်စံဗြောင်ဆာ စက်တုံကို ကောင်းဂါလက်အာ မော်ကိုတင့်အယူပါ(လ်)။ အိမ်မှာအစား အမှာက ရင်ဘတ်အင် တာဟူးဆိတ်ကို ထုကို “အဗား(ဖ်)ဘုရားရှင် ငါစာ အပြစ်အိမ်းကအဆာဖြစ်ကို ငင်သနားအီယန်နက်နိမ့်”ငါကို ဆုစိန်ကို ဆာဗားလင်ကဟေ။
ကျီးကအိမ်း ကိုယ်တော်ယေရူနာ “ ငါ နနိန်ရက်အင် အမှန်တရားရက်အင် ငါးဆနပ်အန်က။ ဘုရားရှင်စာ အခွန်ကောက်ကလူက ဆုစိန်ကတတ်ကို ဘာသာရေးခေါင်းဆောင် တောင်မှာဒင့် ရိုးသားဖြောင့်မတ်ကလူဖြစ်ကအကြောင်းယင် ငါလင်ကဟေ။ ဘုရားရှင်စာ မာနထောင်လွှား တုံ့ကလူရက်အင် အယူထမ်းတုံ့ကို အပါနာကအပါနာနှိမ့်ချက လူရက်အင် ဂုဏ်ပြုချီးမွမ်းလင်ကဟေ။
မဿဲ ၁၃း၃၁-၃၃, ၄၄-၄၆; မာကု ၄း၃၀-၃၂; လုကာ ၁၃း၁၈-၂၁; ၁၈း၉-၁၄