၄၈။ မေရှိယအဖြစ် ကတိအီကဟင်းပေါ်က ကိုယ်တော်ယေရူ

ဘုရားရှင်စာ ကမ္ဘာမြေကြီးယင် ဖန်ဆင်းအီကရပ် ဦးဇားစုတ်ရက်စာ အပြစ်အငါထမ်း ပြည့်စုံတုံးဟေ။ အာဒမ်အိမ်ဧဝရက်စာ ဟူးဝါအိမ်းဟူးဝါစိုးကို ဘုရားရှင်ယင်ယဲ့ စိုးဟေ။ အကျန်းမာက ၊ဆီးဟေကယဲ့ ကငါပါ(လ်) ။မှပုံစံစာ ဘုရားရှင်နာ မှကမ္ဘာကြီးယင် ဖြစ်ဇိဉ်ကက်ကာ ပုံစံဖြစ်ဟေ။

စာတန်စာ ကဖူး(ဖ်)ယာပင် တစ်ဆင့်ဧဝယင် ဝပ်ကက်ကအကြောင်းအိမ်း ဥယျာဉ်ယာတူးပိ(ရ်)တုံးဟေ။ ကျီးကအိမ်း မှတာဆာလှောင်ဆာအိမ်းအာဒံစာ ဘုရားရှင်အပေါ်ယာ အပြစ်ကျုးလွန်လင်ကဟေ။ အမှာရက်အပြစ်ကျူးလွန်ဒက်ကအကြောင်းအိမ်း ကမ္ဘာပေါ်ယာကငါဟေက ဦးဇားစုတ်ရက်စာ ဆီးကလင်ပေါ်ကဟေ။

အာဒမ်အိမ်းဧဝရက်စာ ဘုရားရှင်ကအပေါ်ယာ အပြစ်ရက်လုပ်တက်ကအကြောင်း ပိုကိုဆိုးဟေက အကြောင်းအရားရက်ဖြစ်ယောယန်ကို ဘုရားရှင်က ရန်သူရက်ဖြစ်လင်ကဟေ။ မှအကျိူးရလဒ်အကြောင်း အိမ်မှာအခါက လူတိုင်းစာ ကယ်ကရပ်ပင် အပြစ်ရက်ကျူးလွန်ကို ဘုရားရှင်ကရန်သူရက်ဖြစ်လင်ကဟေ။ ဘုရားရှင်အိမ်းလူရက်ကကြားနား ငြိမ်းချမ်းမူးအငါနန်း။ ညီးငါဒင်းယဲ့ ဘုရားရှင်စာ ငြိမ်းချမ်းမူးလုပ်ကက်ဟေ။

ဧဝကနောင်လာနောင်သားဟူးဝါစာ စာတန်ကအဟူးယင် ပျင်အန်ကဖြစ်ကို စာတန်စာ အိမ်မှလူကအတာထောက်အင် အကိုင်းလင်ကငါကို ဘုရားရှင်စာ ကတိအီဒက်ဟေ။ အယောက်ကနည်းအိမ်းငါနဲ့ စာတန်စာ မေရှိယယင် ကတိုက်အန်ကဖြစ်ကယဲ့ ဘုရားရှင်စာ အမင်ပြန်ကိုအဆက်ဆောင်အီးယန်ကဖြစ်ဟေ။ မေရှိယစာ စာတန်ကအစွမ်းစုတ်ရက်အင် လာကလင်က။ဆနိန်ဘောင်းကိုကြားကရပ် အိမ်မှာမေရှိယစာ ကိုယ်တော်ယေရူဖြစ်ကအကြောင်းယင် ဘုရားရှင်စာ ဆနပ်လင်က။

ဘုရားရားရှင်စာ ထုပ်ဇိဉ်ဗား(ဖ်)က အိ(လ်)ပြောင်ကမှပင် ကယ်တင်လူမှ နောဧအိမ် အမှာကမိသားစုယင် သင်္ဘောတစ်စီးပြုကဇိဉ်ဖန်လင်ကဟေ။ ဘုရားရှင်စာ အမင်ယုံကြည်ကလူရက်အင် မှနည်းအိမ်ကယ်တင်ကဟေ။ မှနည်းအိမ်းမက်တာ လူတိုင်းစာ အပြစ်ရက်ကျူးလွန်ပီးကအကြောင့် ဘုရားရှင်ကမှပင် ဆီးကမှပင်ထိုက်တန်ဇိဉ်ကဟေ။ ညီးငါဒင်းယဲ့ ဘုရားရှင်စာ အမင်ယုံကြည်ကလူ့ စုတ်ရက်အင် ကယ်တင်ကဇိဉ် ကိုယ်တော်ယေရူယင် ဖြောင်နက်အန်ဟေ။

ရာစုဆနိန်ဘောင်းကိုခန့် ဘာသာရေးခေါင်းဆောင်ရက်စာ ဘုရားရှင်ယင် ပူဇော်ပသမူရက် လုပ်ကဟေ။ မှနာ လူရက်နာအပြစ်ရက်အင် ကျူးလွန်ဒက်ကို ဘုရားရှင်ကအပြစ်အီက ထိုက်တန်ဟေငါကို ခံစားပေါ်ကအကြောင်းဖြစ်ဟေ။ ညီးငါဒင်းယဲ့ အိမ်မှာပူဇော်မူရက်အိမ်း အမှာရက်ကအပြစ်ရက်အင် ခွင့်လွတ်အီးယန်မှ အလုပ်လူပါ(လ်)။ ကိုယ်တော်ယေရူစာ သာသနာရေးဆိုင်ရာမဟာနာယကဗြောင်ဖြစ်လင်ကဟေ။ အိမ်မှဘာသာရေးခေါင်းဆောင်ရက် အလုပ်လူကဦးဇားရက်အင် ကိုယ်တော်စာ လုပ်လူဒက်ဟေ။ အမှာစာ လူတိုင်းကအပြစ်ရက်အင် ခွင့်လွတ်အီလူမှ အပါနာကအဆက်ဇီဝိတ ဒါနအဖြစ်ဘုရားရှင်ယင် ပူဇော်လင်ကဟေ။ ညီရက်က အပြစ်ရက်အတွက် အမှာဟူးဝါထဲ ထုပ်မှဘုရားရှင်က အပြစ်အီကဟင်းဒက်ကဟေ။ မှအကြောင်းရက်ကအကြောင်းအိမ်း ကိုယ်တော်ယေရူစာ ပြောင်ကိုပြည့်စုံက မဟာနာယက တစ်ပါးဖြစ်လင်ကဟေ။

ဘုရားရှင်စာ အာဗြဟံယင် “ငါစာ နင်ငါပင်တစ်ဆင့် ကမ္ဘာပေါ်ယာငါဟေက တိုင်းနိူင်ငံဘောင်းကိုယာက လူမျိူးတိုင်းယင် ကောင်းချီးအီယန်ကဖြစ်ဟေ။”ငါကို ငါ့နက်ကဟေ။ ကိုယ်တော်ယေရူစာ အာဗြဟံက မျိူးဆက်ဟူးဝါဖြစ်ဟေ။ဘုရားရှင်စာ ကိုယ်တော်ယေရူယင် ယုံကြည်ကလူရက်အင် အပြစ်ရက်အာပင် ကယ်တင်အီကို လူ့အဖွဲ့အစည်းရက်အင် အာဗြဟံယာပင် တစ်ဆင့် ကောင်းချီးအီကဖြစ်ဟေ။မှလူရက်စာ ကိုယ်တော်ယေရူယင် ယုံကြည်ကရပ် ဘုရားရှင်စာ အမှာရက်အင် အာဗြဟံကမျိူးဆက်ငါကို ယူဆနက်ကဟေ။

ဘုရားရှင်စာ အာဗြဟံယင် အမှာကိုယ်တိုင် အမှာကအဆာယင် ယဇ်ပူဇော်ကဇိဉ် ငါလင်ကဟေ။ ညီးငါဒင်းယဲ့ ဘုရားရှင်စာ အမှာက အဆာဣဇာက်အစား ပူဇော်ကဇိဉ် သိုးတရာယင် အာဗြဟံဇိဉ် အီလင်ကဟေ။ ညီးရက်စုတ်ရက်စာ ညီးရက်ကအပြစ်ရက်ကအတွက် ဆီးသင့်ဟေ။ ညီးငါဒင်းယဲ့ ဘုရားရှင်စာ ညီးရက်ကအစား ဆီးအီးယန်ကအတွက် ကိုယ်တော်ယေရူယင် စွန့်လွတ်အနစ်နာဟင်းက ဖန်းကဟေ။ မှအကြောင်းအိမ်း ညီးရက်စာ ကိုယ်တော်ယေရူယင် ဘုရားရှင်က သိုးငါကို အော်ဟေကဖြစ်ဟေ။

ဘုရားရှင်စာ အီဂျစ်ပြည်ယာနောက်ဆုံးဟက်တာ ကပ်ရောဂါဖြောင်ကျီးကရပ် ဣသရေလ မိသာစုတိုင်း သိုးတရာစီကတိုက်ကဖန်းကဟေ။ အိမ်မှာသိုးစာ ဆူးယဲ့ကအပြစ်အနာဆာ အငါပေါ်ပါ(လ်)ကဖြစ်ဟေ။ ကျီးကအိမ်း အိမ်မှာသိုးကဆည်ရက်အင် အမှာရက်က ကိန်းအဟားအဖုံးယာ ကပေါင်ကဖန်းကဟေ။ ဘုရားရှင်စာ အိမ်မှာသိုးကဆည်ယင်ပေါ်ကရပ် အိမ်မှာကိန်းယာက မလားကင့်မှကယ်ကအဆာဦးယင် အကတိုက်ထမ်း ကျော်ကလင်ကဟေ။ မှဒလေဖြစ်ပျက်ဒက်က ရက်အင် ဘုရားရှင်စာ ပသခါပွဲတော်ငါကို အော်ဒက်ကဟေ။

ကိုယ်တော်ယေရူစာ ပသခါပွဲတော်ယာက သိုးအိမ်းတူဟေ။အမှာစာ ဟက်တာယဲ့ အပြစ်လုပ်က အငါကကြောင်းအိမ်း အမှာအိမ်းပက်သတ်ကို ဟက်တာယဲ့ ကမင်ကအငါပါ(လ်)။ အမှာစာ ပသခါပွဲတော်ထုပ်ကရပ် ကတိုက်စာဟင်းပေါ်ကဖြစ်ဟေ။ ရီကက်ကလူ့ရီယင့် ကိုယ်တော်ယေရူယင် ယုံကြည်ကရပ် ယေရူကဆည်အိမ်း အိမ်မှာလူက အပြစ်အင် အီကျီးယင်နန်းဖြစ်ဟေ။ အဇာရီကအကြောင်းယာငါနဲ့ အိမ်မှာလူစာ သိုးကဆည်အိမ်း ကပေါင်ပီးက အဟားမုတ်အာ တုံးတုန်ကဒေဖြစ်ကို ဘုရားရှင်က အပြစ်အီကမှပင် ရှောင်ကွင်းကဟင်းပေါ်ကဖြစ်ဟေ။

ဘုရားရှင်စာ အမှာကိုယ်တိုင်ဣသရေလ လူမျိူးရက်အင်ပိုင်ဆိုင်ဟေငါကို ယူဆပီကအကြောင့် ဣသရေလလူမျိူးရက်အိမ်း ပဋိညာဉ်ဆူးယာလုပ်တက်ကဖြစ်ဟေ။ ညီးငါဒင်းယဲ့ ဘုရားရှင်စာ လူတိုင်းက အတွက် ပဋိညာဉ်အနန်းဆူးယာ လုပ်အီဒက်ဟေ။ ရီကက်ကလူမျိူးရီယင် ပဋိညာဉ်အနန်း လက်ခံနဲ့က(လ်) ဘုရားရှင်ကအမျိူးဖြစ်လင်ကဟေ။ အမှာစာ ကိုယ်တော်ယေရူယင် ယုံကြည်ကအကြောင့် အတတ်ကဒေလုပ်တက်ကဖြစ်ဟေ။

မောရှေစာ ဘုရားရှင်ကနူတ်ကပတ်တော်ရက်အင် ပြောင်ဟေကတန်ခိုးအစွမ်းရက်အိမ်း ငါ့ဆနပ်တက်က လူ့ဟူးဝါးဖြစ်ဟေ။ ညီးငါဒင်းယဲ့ ကိုယ်တော်ယေရူစာ အိမ်မှာလူရက်ကအထဲယာက ပြောင်းဇောကရှေ့ဖြစ်ဟောပညာရှိဟူးဝါဖြစ်လင်ကဟေ။ အမှာစာ ဘုရားရှင်ယဲ့ဖြစ်တုံးကအကြောင့် အမှာလုပ်တက်က အပြုမူစုတ်ရက်အိမ်း တူးရက်စာ ဘုရားရှင်ကနူတ်ကပတ်တော်အတိုင်း လုပ်တက်ကဖြစ်ဟေ။

မှအကြောင်းအိမ်း ကျမ်းစာရေးကလူရက်နာ ကိုယ်တော်ယေရူယင် ဘုရားရှင်က ဘုရင်ဒါဝိဒ်က နောင်လာနောင်သားရက်စာ ဘုရားရှင်က မျိူးဆက်ရက်အင် အုတ်ချူပ်လင်ပေါ်ကငါကို ကတိအီဒက်ဟေ။ ကိုယ်တော်ယေရူစာ မေရှိယဖြစ်ကဒေ ဘုရားရှင်ကအဆာယဲ့ ဖြစ်ဟေ။မှတောင်မှဒင်း အမှာစာ ဒါဝိဒ်ဘုရင်ကမျိူးဆက်ဖြစ်တုံးကအကြောင်း ထာဝရအုပ်ချူပ်ခွင့်ယဲ့ ငါဟေ။

ဒါဝိဒ်ဘုရင်နာ ဣသရေလကဘုရင်ဖြစ်ကယဲ့ ကိုယ်တော်ယေရူက(လ်) စကြာဝဠာဆူးယာလုံးက ဘုရင်ဖြစ်လင်ကဟေ။ အမှာစာ အယောက်ဟက်တာ ပြန်ကိုကြွယောယန်ကို တရားမျှတမူး ငြိမ်းချမ်းမူရက်အိမ်း မက်တာထာဝရအုပ်ချုပ်လင်က ဖြစ်ဟေ။

ကမ္ဘာဦးကျမ်း ၁-၃, ၆, ၁၄, ၂၂; ထွက်မြောက်ရာကျမ်း ၁၂, ၂၀; ဓမ္မရာဇဝင်ဒုတိယစောင် ၇, ဟေဗြဲဩဝါဒစာ ၃း၁-၆, ၄း၁၄-၅း၁၀, ၇း၁-၈း၁၃, ၉း၁၁-၁၀း၁၈; ဗျာဒိတ်ကျမ်း ၂၁