၇။ ဘုရားသခင်နာ ယာကုပ်အင်ကောင်းကျိုးအီဂါ

မှတာဆာပြိုင်းဆာရက်နာ အဆက်ပြောင်ယောယန်ဂါရပ် ယာကုပ်နာ ကိန်းငါတုံ့ပေါ်ဂါနှစ်သက်ကို ဧသောဂ(လ်) တိရိစ္ဆာန် ရက်အင် မလိမ်းလမ်းဂါ ဝါသနာပါဟေ။ ရေဗက္ကစာ ယာကုပ်အင်ချစ်ကို ဣဇာက် က(လ်) ဧသောယင်ချစ်ဟေ။

ယက်တာဂါရပ် ဧသောနာ မလိမ်းလမ်းကိုပြန် ဂါအချိန် တစ်ဗျင်းရုံတုံ့ကို ဧသောနာ ယာကုပ် အင် နင်ဂါ လုပ်ပီဂါ ဆာဂါဇတ် စိတ်ဆာ ငါဇီးအီယန်ငါနက်ကဟေ။ မှဂါးရပ် ယာကုပ် နာ နင်စာမလားကယ် ဂါအကြောင်းအိမ်း လူဂါဉီးဇာစုတ်ရက်အင် ငါဇိဉ် အီယန်ဂါငါကို ကတိအီယန်ငါကိုင့လင်ဂါဟေ။ မှဂါရပ် ဧသောနာ ယာကုပ်ဇိဉ် မှဦဇားစုတ်ရက်အင် အီယန်ဂါ ငါကိုကတိအီလင်ဂါရပ် ယာကုပ်စာ အမှာဂါ ဆာဂ ဇာတ်အင် စိတ်ဆာအီလင်ဂါဟေ။

ဣဇာတ်နာ ဧသော ဇီးကောင်းကျိူးအီကက်ကဟေ။ ညီးငါဒင်ယဲ ဣဇာက် ကောင်းကျိူးအအီမိန်း ရေဗက္ကအိမ်းယာကုပ်နာဧသော ယောင်ဆောင်ကို အမင်ဝပ်နက်လင်ဂါဟေ။ ဣဇာက် နာအဆက် ပြောင်တုံ့နန်းဖြစ်ကို အမိတ်အပေါ်နန်း ။ မှဂါရပ် ယာကုပ်နာ ဧသောကအဝတ်စားလာကို တူကို အမှာဂါအကတုပ်အိမ်း တာဟူးဝါ် ကပိတ်ကအလက်အင်ခြုံလားကလင်ဂါဟေ။

ယာကုပ်နာဣဇာက်ကမှားဗန်ကိုငါဧသောဖြစ်ဟေ။ အဗား(ဖ်) ငါဇိဉ်ကောင်းကျိူးအီယန် ဂါအတွက် ငါဗန်ဂါဖြစ်နက်ဟေ ။ငါကိုင့လင်ဂါဟေ ။ဣဇာက်နာ ကပိတ်ကာအလက်အင် ထိတွေ့ခံစားကို အဝတ်စား က အဆာပေယင် လူဂါရပ် ဧသောထင်ကို ကောင်းကျိူးမင်္ဂလာအီလင်ဂါဟေ။

ဧသောနာ အမှာဂါအဆာပြောင် ဟူဝါ် အနေရက် လူပိုင်ခွင့်အိမ်းကောင်းကျိူးမင်္ဂလာ ရက်အင် ယာကုပ် ကူလားကလင်ဂါအကြောင်းအိမ်း ယာကုပ်အင်မုန်းတီးလင်ဂါဟေ။ မှအကြောင်းအိမ်း အမှာရက်က အဗား(ဖ်)ဆိမ်းလင်ဂါအိမ်းယာကုပ်ယင် ကတိုက်ကဇိဉ် ကြံစည်လင်ဂါဟေ။

ညီးငါဒင်ယဲ ရေဗက္ကနာ ဧသောက အကြံစည် ရက်အင်ချေကိုင်ကို ယာကုပ်က အသက်အန္တာရယ် ယင်ကာကွယ် အီကက်ကို အမှာဂါ ဆွေမျိုးရက်အိမ်း တုံ့ကဇိဉ် အဝေးတစ်နေရာဖြောက်နက်ကဟေ။

ယာကုပ်နာ ရေဗက္ကဂါ ဆွေမျိူးရက်အိမ်းနှစ်ပေါင်းများစွာတုံ့လင်ဂါဟေ။ မှအချိန်ငါ အမှာနာ လက်ထပ်ကို အဆာ၁၂ယောက် ၊အဆာအိပ်ဟူဝါ် ကယ်ဂါဟေ။ဘုရားရှင်နာ တစ်ဗျင်းချမ်းသာမှ လုပ်အီးလင်ဂါဟေ။

ခါနန်ငါ ငါဟေက အမှာကကိန်းအိမ်းနှစ်ပေါင်းများစွာဝေးကွာကမ်းကအချိန်ယာ ယာကုပ်နာအမှာဂါမိသာစု ၊အငှားသား၊တိရိစ္ဆာန်အုပ်ရက်အိမ်းပြန်ဗန်ဂါဟေ။

ယာကုပ်နာ ဧသောစာ အမင်ကတိုက်လင်ကက်က ထင်ကိုတစ်ဗျင်းအစက်တုံ့လင်းဂါဟေ။ မှအကြောင်းအိမ်း အမှာဂါ တိရိစ္ဆာန် ဘောင်းကို ဧသောဇိဉ် လက်ဆောင်အီလင်ဂါဟေ။ နင်ဂါ အငှားသားဖြစ်ဟေက ယာကုပ် စာနင်ဇိဉ် မှတိရိစ္ဆာန် ရက်အင်အီဂါဖြစ်ဟေ။ အမှာနာရာ နဲက(လ်) ဗန်လင်ဂါ ငါကို ဧသောဇိဉ် တိရိစ္ဆာန် ရက်အင်လာကမ်းက အငှားသားရက်နာ ဧသောယင် င့ဆာနတ်လင်းဂါဟေ။

ညီငါဒင်ယဲ ဧသောနာ ယာကုပ်အင် အန္တာရာယ် အအီကက်နန်း ။မှတောင်မှဒင် အမှာပေါ်ဂါအိမ်း တစ်ဗျင်းဝမ်းသာတုံ့လင်ဂါဟေ။ မှအကြောင်းအိမ်း မှဖုံနားနိန်ဟူးနာ ခါနန်ယာငြိမ်းချမ်းစွာ တုံ့လင်ဂါ ဟေ။ ကျီးဂါအိမ်း ဣဇာက်ဆီးကိုင်ကို ယာကုပ်အိမ်းဧသောရက်နာ အမင်ကဇက်အာ မြှုပ်ကို သင်္ဂြုလ်လင်ဂါဟေ။ အာဗြဟံအိမ်း ဘုရားရှင်ရက်နာ လုပ်တက်ဟေက ပဠိညာဉ် ရက်အင် ယာကုပ်ကမှ လက်ဆင့်ကမ်းအီလင်ဂါဟေ။

ကမ္ဘာဦးကျမ်း ၂၅း၂၇-၃၅း၂၉