၁၃။ ဘုရားရှင်အိမ်း ဣသရေလရက်က သဘောတူညီဟေက
ဘုရားရှင်နာ ဣသရေလလူမျိူးရက်အင် ပင်လယ်နီယင်ဖြတ်ကို အော်လားကလင်ကို ကျီးကအိမ်း မလိမ်းကန္တာရဖြတ်ကို သိနာငါကိုအော်ဟေက တာဂေါ်ယာ အော်လားကလင် ကဟေ။ မှတာဂေါ်နာ မောရှေပေါ်ဒက်က ဗန်ခြူတုံးကခြုံငါဟေက တာဂေါ်အိမ်း မက်တာဖြစ်ဟေ။ လူရက်နာ အမှာရက်ကကိန်းရက်အင် တာဂေါ်အမုတ်အာ ပြုလင်ကဟေ။
ဘုရားရှင်စာမောရှေအိမ်း ဣသရေလကလူစုတ်ရက်အင် “နနိန်ရက် ငါကပဋိညာဉ် ယင်စောင့်ထိန်းနဲ့ ငါစာ နနိန်ရက်အိမ်းမက်တာယော့ကို အမူဆောင်ယန်က။ နနိန်ရက်မှဒလေ စောင့်ထိန်းနဲ့နနိန်ရက် ငါကအဖိုးတန်က ပိုင်ဆိုင်မူရက် သာသနာရေးဆိုင်ဟေက ဘာသာရေးခေါင်းဆောင် ရက်အိမ်း သန့်ရှင်းမြင့်မြတ်ဟေကလူမျိူးရက်ဖြစ်ဗာက”ငါကို ငလင်ကဟေ။
ဆုံးယက်ကြားကရပ် အမှာရက်ကမှာဘုရားရှင်ကြွယော့ယန်ကဖြစ်ကို လူရက်နာဘုရားရှင်အိမ်း လက်ကဇိဉ်အဆင်သင့်ဖြစ်မှ ပြင်ဆင်ပီလင်ကဟေ။ ကျီးဂအိမ်း ဘုရားရှင်သိနာတာဂေါ် ဖုံးယာချေလင်ကရပ် မဂြပ်(ရ်)ကျောက်၊ရှက်ပြက်ကို၊ ဗန်ဖူ(ဖ်)ရက်အိမ်း ကျယ်လောင်ဟေက တံပိုးခရာ ဖြစ်ယောယန်ကဟေ။ ကျီးဂအိမ်း မောရှေနာတာဂေါ်ထိပ်ဖုံးယာ ဟူးဝါ်တည်း ချေလင်ကဟေ။
ဘုရားရှင်နာ လူရက်အိမ်းသဘောတူညီကပဋိညာဉ် ဆုယာလုပ်လင်ကဟေ။ ဘုရားရှင်က “ငါနာ နနိန်ရက်က ဘုရားယေဝ ဖြစ်ဟေ။ အီဂျစ်အာပင် နနိန်ရက်အင်ကျွန်ဘဝယာပင် ကယ်တင်အီဒက်ကလူ့ယေ ဖြစ်ကို ကျန်ကဆုယဲက ဘုရားယင် အကိုးကွယ်ယဲ”ငါကို ငပီလင်ကဟေ။
“ရုပ်ထုရက်ထုကို အကိုးကွယ်လင်ယဲ အဇာရီကအကြောင်းယာငါနဲ့ ငါယေဝနာ နနိန်ရက်က ဆုယာတည်းက ဘုရားဖြစ်ဟေ။ ငါကနာမတော်ယင်အလွဲသုံးစားအလုပ်ယဲ ဥပုသ်ရက်ယာအား သန့်ရှင်းမြင့်မြတ်မှအသေအချာစောင့်ထိန်းယင်။ ငါနက်ကနေ နနိန်ရက်ကအလုပ်စုတ်ရက်အင် ခြောက်ရက်လုပ်ကို ကျန်ယက်တာဂေ(လ်)အနားလာကို ငင်သတိလူလင်”ငါကို ငလင်ကဟေ။
“နနိန်ရက်က အနု(လ်)အဗားနိန်ဟူးယင် ရိုသေယင် လူ့အဆက်ကတိုက်ကရှောင်ကြည်ယင့်။ လူရက်က ကိန်းအရားယင်အလာကက်အေး ၊ လူရက်ကပစ္စည်းဥစ္စာကူ(ဖ်)လားက၊ လူရက်အင်ဝပ်ဟေက ၊လူရက်က အအိပ်ထာ ၊ လူရက်ကကိန်းအိမ်း လူရက်ကပိုင်ဆိုင် ဟေကဦးဇာရက်အင် အလားကက်အေး”ငါကိုင့လင်ကဟေ။
ဘုရားရှင်စာ မှဆယ်ပါးပညတ်တော်ရက်အင် ရေးပီးကကျောက်ပြားနိန်ဆုယင် မောရှေဇိဉ်အီလင်ကဟေ။ လူရက်ကလိုက်နာစောင့်ထိန်းပေါ်က ကျန်က ပညတ်တော်ရက်အင် ပြဠာန်းလင်ကဟေ။မှပညတ်တော်ရက်အင် လိုက်နာကလူက်ရက်အင်နာ ဘုရားရှင် ကာကွယ်စောင့်ရှောက်အီယန်ကဖြစ်ကို ကောင်းကျိူးမင်္ဂလာ ရက်အ(လ်)အီယန်ကဖြစ်ဟေ ။ ညီငါဒင်ယဲ ဘုရားရှင်ကပညတ်တော်ယင် အလိုက်နာနဲအပြစ်အီက ငါကိုငလင်ကဟေ။
ဘုရားရှင်နာ ဣသရေလလူမျိူးရက်အိမ်း လက်ဟေကကိန်း ငါကိုပြောင်ဟေက ကိန်းဆောင်းနာပြုကဖန်းကို အမင် အဆာမည်ပြုပေါ်က၊ အဆာမည်ကအရားရက် ယောပေါ် က အသေးစိတ် တိကျမှင့ဆနတ်လင်ကဟေ။ အမှာနာ မှကိန်းယင် အခန်းနှစ်ခန်းဖြစ်မှ အလယ်ယာ ကုလာကာပြောင်းဆူးယာ အမှာရက်အင်အကာဇိဉ်ကဟေ။ ဘုရားရှင်နာ ကုလာကာနောက်အာက အခန်းယာတုံးကို သာသနာရေးဆိုင်ဟေက မဟာနာယကရက်အင်မယ် အမှာကအခန်းယာဆင်ဇိဉ်ဟေ။
လက်ဟေကကိန်းက အရှေ့ယာ လူရက်နာ ပူဇော်က ယစ်ပလ္လင်ဆူယာ ပြုအီးဒက်ကို ဘုရားရှင်က ဥပဒေယင် အလိုက်နာကလူရက်စာ အိမ်းမှနေရာ အဆက်အိမ်းက တိရိစ္ဆာန် တာရာ လာကိုင်းပေါ်ဟေ။ ကျီးကအိမ်း ဆရာဒါ(လ်)တစ်ပါးနာ မှတိရိစ္ဆာန်ယင်ကတိုက်ကို ယစ်ပလ္လင်ဖုံးယာ ဗန်တိ(လ်)ကို ဘုရားရှင်ယင် ပူဇော်ကလုပ်ဟေ။ ဘုရားရှင်က မှတိရိစ္ဆာန်ကဆည်အိမ်း မှလူရက်ကအပြစ်အင် ဖုံးအုပ်နက်အန်က ငါကိုငပီဒက်ဟေ။ မှကရပ် ဘုရားရှင်စာ မှလူရက်ကအပြစ်အပေါ်ထမ်း ဘုရားရှင်ကအမြင်ယာ သန့်စင်ဟေကလူအဖြစ်ဖြစ်လင်က ။ ဘုရားရှင်နာ မောရှေကအပါး ဖြစ်ဟေက အာရွန်အိမ်း အမှာရက်ကနောင်လာနောင်သာရက်အင် အမှာက ဘာသာရေးခေါင်းဆောင် အဖြစ်ရွေးချယ်ဇိဉ်ကဟေ။
လူရက်နာ ဘုရားရှင်အိမ်းပညတ်တော်ရက်အင် လိုက်နာကဇိဉ်သဘောတူလင်ကဟေ။ အမှာရက်နာ ဘုရားရှင်ရွေးကောက်တော်ဟေက လူမျိူးနွယ်စုအဖြစ်ခံယူကို ဘုရားရှင်ယင် တစ်ဆူတည်းက ဘုရားအဖြစ် ဝတ်ပြုကိုးကွယ်က ငါကိုသဘောတူလင်ကဟေ။
မောရှေနာ သိနာတာဂေါ်ထိပ်ယာ ရက်ယက်ကြားမှငဒက်ကို ဘုရားရှင်အိမ်း တူးပီ(ရ်)ကိုတုံဒက်ကဟေ။ ညီငါဒင်ယဲ လူရက်နာ မောရှေကဗန်က စောင်တုံးပေါ် ကို တစ်ဗျင်းပင်ပန်းယောယန်ကဟေ။ မှအကြောင်းအိမ်း အမှာရက်နာ အာရုန်ကမှာဗန်ကို ရွှေရက်အီကို ဘုရားရှင်အစားကိုးကွယ်ကအတွက် ရုပ်ထုဆူယာ လုပ်အီးယန်ငါကို တောင်းဆိုလင်ကဟေ။ အမှာရက်နာ ဘုရားရှင်ယင် မှနည်းအိမ်း တစ်ဗျင်းဆိုးရွားမှ ပြစ်မှားကျူးလွန်လင်တိန်ကဟေ။
အာရုန်နာ မှရွှေရုပ်ထုယင် ဆမုတ်ဆာပုံစံလုပ်အီးနက်ကဟေ။ လူရက်နာမှရွှေရုပ်ထုယင် ကြီးကျယ်မှကိုးကွယ်ကို ယစ်ပူဇော်ဆက်သလင်ကဟေ။ အမှာရက်က အပြစ်ကအကြောင်းအိမ်း ဘုရားရှင် တစ်ဗျင်း မန်ချေလင်ကဟေ။ဘုရားရှင်နာ အမှာရက်အင် ဖျက်ဆီးနက်ကက် ကဟေ။ ညီးငါဒင်ယဲ့ မောရှေနာ အမှာရက်အင် အကတိုက်အေး ငါကိုဘုရားရှင်ယင်လျှောက်ပီလင်ကို ဘုရားရှင်နာ လက်ခံကို မှလူရက်အင် အဖျက်ဆီးနန်း ။
မောရှေစာ သိနာတာဂေါ်ယာပင် ဆပ်အန်ကရပ် ဘုရားရှင်ရေးပီက ပညတ်တော် ဆယ်ပါးယော့ဟယ်က ကျောက်စာနှစ်ချပ် လာကိုင်းကဟေ။ မောရှေနာ မှရုပ်ထုယင်ပေါ်ကရပ် တစ်ဗျင်းမန်ချေကို ကျောက်စာရက်အင် ဆပြုလင်ကဟေ။
မောရှေနာ အိမ်းမှာရုပ်ထု စုတ်ရက်အင်ချေဖျက် နက်ကဟေ။ မှနောက်အာ မှအမူန့်ရက်အင် ကအိ(လ်)ဖျော်ကို မှလူရက်အင် အူဇိဉ်လင်ကဟေ။ ဘုရားရှင်နာ မှလူရက်ကအပေါ်ယာ ကပ်ဆိုးဆူယာ ထုတ်ဇိဉ်ကို လူ့ဘောင်းကိုဆီးဇိဉ်လင်ကဟေ။
မောရှေနာ မှဖျက်ဆီးနက်က ပညတ်တော်ဆယ်ပါး ကျောက်စာအတွက် အစားထိုးကဇိဉ် ကျောက်စာနှစ်ချပ် ဖန်တီးလင်ကဟေ။ ကျီးကအိမ်း အမှာနာ တာဂေါ်ဖုံးယာထပ်မံချေလင်ကို မှလူရက်အတွက် ခွင့်လွှတ်အီကဇိဉ် ထပ်မံကိုဆုဇိဉ်လင်ကဟေ။ ဘုရားရှင်နာ မောရှေကတူးယင်အကိုးကိုယ် အိမ်းမှာလူရက်အင် ခွင့်လွှတ်နက်ကဟေ။ မောရှေနာ တာဂေါ်အမုတ်အာ ပညတ်တော်ဆယ်ပါး ပါဝင်ဟေက ကျောက်စာအနန်းရက်အိမ်း တာဂေါ်အမုတ်အာ ဆပ်ယော့ ယန်ကဟေ။ ကျီးကအိမ်း ဘုရားရှင်နာ ဣသရေလလူမျိူးရက်အင် သိနာတာဂေါ်ဝါ်ပင် ကတိအီပီကနေရာ ဦးဆောင်လင့်ဆနတ်လင်ကဟေ။
ထွက်မြောက်ရာကျမ်း ၁၉-၃၄