၂၄။ ရှင်ယောဟန်နာ ကိုယ်တော ယေရူယင် အိ(လ်)မမြုတ်ကိုမင်္ဂလာလုပ်အီးက

ဇာခရိအိမ်းအဲလိဇဘက်ရက်က အဆာဖြစ်ဟေက ယောဟန်စာ အဆက်ပြောင်ယောယန်ကရပ် ရှေ့ဖြစ်ဟောပညာရှိ ဖြစ်လင်ကဟေ။ အမှာစာ မလိမ်းကန္တာရထဲယာ တုံးကို တလုံးကအိ(လ်)ယင်အူကို ကျိုင်းကောင်ရက်အင်ဆာကို ကုလာအုပ်အမူအိမ်းလုပ်ပီက အဝတ်စားရက်အင် တူလင်ကဟေ။

လူရက်စာ မလိမ်းကန္တာရထဲယာ ပြုကို ယောဟန်ဟောဟေက တရားရက်အင် ဗန်ကိုအတေးဗာကဟေ။ ရှင်ယောဟန်စာ အိမ်းမှာလူရက်အင် “နောင်တလူယင် ဘုရားရှင်ဿသနာတော် စေ(လ်)ယောယန်းနန်းဖြစ်ဟေ” ငါကိုဟောလင်ကဟေ။

လူရက်စာ ရှင်ယောဟန်ကသတင်းတူးရက်အင် တိုက်ကရပ် လူဘောင်းကိုစာ အမှာရက်ကအပြစ်ရက်ကအတွက် နောင်တလူကို ရှင်ယောဟန်စာ အိ(လ်)မြုတ်ကို မင်္ဂလာလုပ်အီလင်ကဟေ။ဘောင်းကိုက ဘာသာရေးခေါင်းဆောင်ရက်စာ ရှင်ယောဟန်ကမှ ဗန်ကယဲ့ အမှာရက်စာ အပြစ်ရက်အင် ဝန်ခံက၊နောင်တလူက အာငါပါ(လ်)။

ရှင်ယောဟန်စာ ဘာသာရေးခေါင်းဆောင်ရက်အင် “နနိန်ရက်စာ အဆိပ်ငါဟေက ကဖူး(ဖ်)ရက်ဖြစ်ကို နနိန်ရက်က အကျင့်စရိုက်ရက်အင် ပျင်းကိုနောင်တလူယင်။ ဘုရားရှင်စာ အဆီမီအဆီက အဖင့်ရက်အင် ဗဖ်းကို ဗန်ဘုံယာထည့်လင်က”ငါကို င့လင်ကဟေ။ “နင်ဗန်ကလင်ယင် ပြင်ဆင်ကလူမှ နင်ကရှေ့ယာ သတင်းအီကလူဟူးဝါ ငါဖြောင်နှစ်အန်က”ငါကို ရှေ့ဖြစ်ဟောပညာရှိရက်ကတူးရက်အင် အရှင်ယောဟန်စာ ဖြည့်ဆည်းအီတုံးဖြစ်ဟေ။

အချို့ဘာသာရေးခေါင်းဆောင်ရက်စာ အရှင်ယောဟန်ယင် “မေရှိယ”ရိဟေလဲငါကို ကထာလင်ကဟေ။အရှင်ယောဟန်နာ “ငါ မေရှိယအရိပါ(လ်)။ညီငါဒင်ယဲ့ ငါကနောက်အာ ထုတ်ဗာလင်က။အမှာစာ တစ်ဗျင်းပြောင်ကိုမြင့်မြတ်ကအကြောင်းအိမ်း ငါစာ အမှာက ဖိနပ်ရဖူ(ဖ်)ယင် တိုင်အီကဒင်း အထိုက်တန်ပါ(လ်)”ငါကိုဖြေလင်ကဟေ။

အယောက်ယက်တာကရပ် ရှင်ယောဟန်ကမှ ကိုယ်တော်ယေရူစာ အိ(လ်)မြုတ်ကိုမင်္ဂလာ ရိကဇိဉ်ထုတ်ဗာ လင်ကဟေ။ရှင်ယောဟန်စာ အမင်ပေါ်ကရပ် “ကမ္ဘာကြီးယာကငါဟေက အပြစ်ရက်အင် လင်စံဗြောင်ယာ လာကာလင်ကဘုရားရှင်က သိုးမန်ဆာ လူယင်ဒက်”ငါကို င့လင်ကဟေ။

ရှင်ယောဟန်နာ ကိုယ်တော်ယေရူယင် “ငါစာ နင်ငင် အိ(လ်)မြုတ်မင်္ဂလာ လုပ်အီးကဇိဉ် ကထိုက်တန် ပါ(လ်)။ နင်မယ်ကယား ငင် အိ(လ်)မြုတ်ကိုမင်္ဂလာ လုပ်အီးယန်ငါကို င့လင်ကဟေ”ညီငါဒင်းယဲ့ ကိုယ်တော်ယေရူစာ “နင်စာ ငင် အိ(လ်)မြုတ်ကိုမင်္ဂလာ လုပ်အီးပေါ်ကဖြစ်ဟေ။ အဇာရီးကအကြောင်းယာ ငါနဲ့ မှအရာစာ မှန်ကန်ဟေက အကြောင်းတရားဖြစ်တုံးကအကြောင်း ဖြစ်ဟေ။”ငါကို င့နက်လင်ကဟေ။ မှအကြောင်းအိမ်း ကိုယ်တော်ယေရူစာ ဟက်တာယဲ့ အပြစ်ကျူးလွန်ကအငှာကယဲ့ ရှင်ယောဟန်စာ အိ(လ်)မြုတ်မင်္ဂလာ လုပ်အီးလင်ကဟေ။

ကိုယ်တော်ယေရူစာ အိ(လ်)မြုတ်မင်္ဂလာ လုပ်ကို အိ(လ်)ထဲယာပင် ဖော်ယန်ကရပ် ဘုရားရှင်ကဝိဉာဉ်တော်စာ ချိူးအူဆီ ပုံစံအိမ်း ဆတ်ကို ကိုယ်တော်ယေရူကအဖုံးယာ ပုတုံးလင်ကဟေ။ဟက်တာတည့်ယာ ဘုရားရှင်စာ “အမှာစာ ငါကအဆာဖြစ်ဟေ ငါစာ အမင်ချစ်ကို အမှာကအပေါ်ယာ တစ်ဗျင်းကျေနပ်နှစ်သက်ဟေ”ငါကို ကောင်းဂါလက်အာပင် င့လင်ကဟေ။

ဘုရားရှင်နာ အရှင်ယောဟန်ယင် “နင် အိ(လ်)မြုတ်ကိုမင်္ဂလာ လုပ်အီးနက်က လူဟူးဝါကအပေါ်ယာ သန်းရှင်ဟေက ဉာဏ်အလင်းတော်စာ ထုတ်ကိုငါလင်က။အိမ်းမှာလူနား ဘုရားရှင်က အဆာဖြစ်ဟေ”ငါကို င့နက်ကဟေ။ ဘုရားရှင်စာ တစ်ဆူတည်းကဘုရားဖြစ်ဟေ။ညီငါဒင်းယဲ့ အရှင်ယောဟန်စာ ကိုယ်တော်ယေရူယင် အိ(လ်)မြုတ်မင်္ဂလာလုပ်အီး တုံကရပ် အမှာစာ အဗား(ဖ်)ဘုရားက ငါဟေကအကြားယင် တတ်တက်ကို ဘုရားရှင်က အဆာယေရူကမှသန့်ရှင်းဟေက ဉာဏ်အလင်းတော်ရက် ထုတ်ကယဲ့ ပေါ်ဒက်ပေါ်ကဟေ။

မဿဲ ၃; မာကု ၁း၉-၁၁; လုကာ ၃း၁-၂၃