၈။ ဂျိူးဇက်အိမ်းအမှာက မိသားစုယင် ဘုရားရှင်ကယ်တင်က
နှစ်ပေါင်းများစွာကြားဂါရပ် ယာကုပ် နာအသက်အရွယ် အုတ်ဆာယောင်ယန်နန်းဖြစ်ကို အမှာဂါအချစ်ဆုံး အဆာယောင်သပ် အင် အမှာဂါ တိရိစ္ဆာန်ယန် စောင့်ရှောက်တုံ့ကအပါးကမှဖြောင်နက်ကဟေ။
ယောသပ်က နည်းဆီဖုံနားရက်နာ ယောသပ်စာအမှာရက်က အဗား(ဖ်) အချစ်ဆုံးအဆာ ဖြစ်တုံးဂါအ ကြောင်း အိမ်း အမှာရက်က အုတ်ချုပ်ကလူ ဖြစ်အံက ငါကိုအိပ်မင် မင်ကအကြောင်းအိမ်း အမှာနာ မုန်း လင်ဂါဟေ ။ယောသပ်နာ အမှာက အပါးရက်ကမှား ဗန်ဂါရပ် အမှာရက်နာ အမင်ရိမ်ကို ကျွန်အချေက လူ့ရက်စိတ်အချေနက်ကဟေ။
ယောသပ်က နည်းဆီဖုံနားရက်နာ ကိန်းယာပြန်းဂါအချိန်ယာ ယောသပ်က အဝတ်စားလာကို ကပိတ် ကဆည်ရက်အိမ်း ကပေါင်ကို အမှာရက်က အဗား(ဖ်)ဇီး မှအဝတ်စားဆာနတ်ကို မလိမ်းတိရိစ္ဆာန် ရက်နာ ယောသပ်အင် ကတိုက်နက်နန်းထင်ဇိဉ်လင်ဂါဟေ။ယာကုပ်နာ တစ်ဗျင်း ဝမ်းနည်းလင်ဂါဟေ။
ကျွန်မရိမ်ကလူရက်နာ ယောသပ်အင် အီဂျစ်ယာအော်လားကလင်ဂါဟေ။ အီဂျစ်နာ နိုင်းမြစ် ကမ်းဘေးယာင့ဟေကပြောင်ဟေက အင်အားပြောင်ဟေက နိုင်ငံတစ်နိုင်ငံ ဖြစ်ဟေ ။ကျွန်အချေက လူရက်နာ ယောသပ်အင် ချမ်းသာဟေက အစိုးရအရာရှိဟူဝါ်ဇိဉ်အချေ နက်ကဟေ။ ယောသပ်နာ အမှာဂါ သခင်ယင် မီးမှနီးလုပ်အီလင်ကိုဘုရားသခင်နာ အမှာဇိဉ် ကောင်းကျိူးအီလင်ဂါဟေ။
အမှာဂါသခင်ဂါအအိပ်ထာစာ ယောသပ်အိမ်း မက်တာအိပ်ကဇိဉ် ကြိုးစားလင်ဂါဟေ။ ညီငါဒင်ယဲ ယောသပ်နာ ဘုရားရှင်ငင် ဆန့်ကျင်ကို အပြစ်အကျူးလွန်ကက်ကို ငြင်းဆန်ဒက်ကို မှတာဆာလောင်ဆာနာ တစ်ဗျင်းမန်ချေကို ယောသပ်အင် ထောင်ထဲ ယာပို့ကဇိဉ်စွပ်စွဲလင်ဂါဟေ။ထောင်ကျသည်အထိ ဘုရာရှင်ကအပေါ်ယာသစ္စာငါတုံ့ကို ဘုရာရှင်နာ ယောသပ်အင်ကောင်းကျိူးအီ လင်ဂါဟေ။
နှစ် နှစ်ခန့်ကြားဂါယဲ ယောသပ်နာ အပြစ်ကင်းစင် ဂါယဲ ထောင်ထဲယာငါနိန်မက် ဖြစ်ဟေ။ တစ်ညနာ အီဂျစ်ဘုရင် ဖာရိုနာ ပြောင်ဟေက စိတ်အနှောက်အယှက်အီဟေက အိမ်မင် နိန်ဆူမင်လင်ဂါဟေ။ မှအိမ်မင်းငင်နာ အမှာဂါပညာရှိရက်နာ ဟူးဝါ်ယဲ အဖော်ထုတ်လူပယ်။
ဘုရားရှင်နာ ယောသပ်အင် အိမ်မင်ဂါအဓိပ္ပာယ်ဖော်လူဂါစွမ်းအားအီပီလင်ဂါဟေ။ ဖာရိုဘုရင်နာ ယောသပ်အင် ထောင်ထဲယာပင် အော်လာကန်းဇိဉ်ကို အမှာဂါ အိမ်မင်ဂါအဓိပ္ပာယ် ယင်ပြန်ဂါ ဖန်းဂါရပ် ဘုရားရှင်စာ အစာရေစာ ပေါများဟေက ခုနှစ်နှစ် အိမ်း ကပ်ဘေး ကျရောက်က ခုနစ်နှစ် ဖြစ်စိဉ်လင်ဂါငါကို င့လင်ဂါဟေ။
ဖာရိုဘုရင်နာ ယောသပ်အင် တစ်ဗျင်းနှစ်သပ်သဘောကျကို အီဂျစ်တစ်ခွင်ယာ ဒုတိယမြောက် အာဏာငါဟေက လူအဖြစ် သတ်မှတ်လင် ဂါဟေ။
ယောသပ်နာ လူရက်အင် အစာရေစာ ပေါများဟေက ခုနစ်နှစ် အတွင်းငါ အစာရေစာ မြောက်များသိုလှောင် ဇိဉ်ဂါဟေ။ ကျီးဂါအိမ်း အငတ်ဘေးခုနစ်နှစ် ဆိုက်ဟေကရပ် ယောသပ်နာ လူရက်စိတ် အစားအသောက် ရက်အင်လုံလောက်စွာလူဂါဇိဉ် အချေအီလင်ဂါဟေ။
အငတ်ဘေးနာ အီဂျစ် ဆူယာတယ်အရိမ်ပယ် ယာကုပ်အိမ်း အမှာဂါမိသာစု တုံ့ဟေက ခါနန်ယာ ယဲဖြစ်ဟေ။
မှအကြောင်းအိမ်း ယာကုပ်နာ အမှာဂါ အဆာပြောင်ရက်အင် အီဂျစ်အာ ဆာဂဇာတ် မရီ(ပ်)ဂါဖြောက်နက်ကဟေ။ နည်းဆီဖုံနားရက်နာ ဆာဂါဇာတ်မရိ(ပ်)တုံ့ဂါ ရှေ့ယာစက်တုံ့က ယောသပ် မှတ်ကိုအလူပယ် ။ ညီငါဒင်ယဲ ယောသပ်နာ အမှာရက်အင် မှတ်လူဟေ။
ကျီးဂအိမ်း အမှာကနည်းဆီဖုံနား ရက် ပြောင်းလဲ ဟယ် အပြောင်းလဲက စမ်းသပ်ကျီးဂအိမ်း ယောသပ်နာ အမှာရက်အင် ငါနနိန်ရက်က အနည်းဆီယောသပ်ဖြစ်ဟေ အစက်ယဲ နနိန်ရက်စာ ယုတ်မာကို ငင်ကျွန်အဖြစ်အချေဆာနက်ဟေ။ ညီငါဒင်ယဲဘုရားရှင်နာ ငါဇိဉ်ကောင်းကျိူးရက်လူဂ အတွက်မှအမီးကအရာအသုံးပြုဒက်ကမေဖြစ်ဟေ။ နင်အိမ်းနင်ကမိသာစုရက်အင် ငါထောက်ပံ့က လူမှ အီဂျစ်အာ ဗန်ကိုတုံ့ဗာငါကို င့လင်ဂါဟေ။
ယောသပ်ကနည်းဆီဖုံနားရက် အမှာရက်က ကိန်းယာ ထုပ်ကရပ် အမှာရက်က အဗား(ဖ်)ငင် ယောသပ် အဆက်ဆိမ်းကို ငါနမက်ငါကိုင့ဆာနက်ကရပ် ယာကုပ်နာ တစ်ဗျင်းဝမ်းသာပျော်ရွှင် တုံ့ကဟေ။
ယာကုပ်နာ အုပ်ဆာတုံ့ကယဲ အီဂျစ်ယာပြောင်းကို အမှာဂါမိသားစုရက်အိမ်းမက်တာ အိမ်းမှ နေရာ ပျော်ရွှင်စွာတုံ့လင်ဂါဟေ။ ယာကုပ်အဆီးမိန်းအမှာက အဆာ ဟူဝါ်စီယင် ကောင်းကျိူး အီလင် ဒက်လင်ဂါဟေ။
ဘုရားရှင်နာ အာဗြဟံဇီအီဒက်က ပဠိညာဉ် နာ ဣဇာက်ကမှလက်ဆင့်ကမ်းဒက်ကို ယာကုပ်အိမ်း အမှာဂအဆာ ဆယ့်နှစ်ယောက်ရက်ကမိသားစုရက်ထဲ ဆက်လက်ကိုထုပ်လင်ဂဟေ။ မှမိသားစု တစ်ဆယ့်နှစ်ယောက် ကမျိူးဆက်ရက်နာ ဣသရေလယာငါဟေက လူမျိူးတစ် ဆယ့်နှစ် မျိူးဖြစ် လင်ဂါဟေ။
ကမ္ဘာဦးကျမ်း ၃၇-၅၀