၃၈။ ကိုယ်တော်ယေရူယင် သစ္စာဖောက်ဟေက
ယုဒလူမျိူးရက်စာ ပသခါပွဲတော်ယင် နှစ်စဉ်နှစ်တိုင်းကျင်းပဟေ။ မှပွဲတော်ကျင်းပပေါ်က အဓိပ္ပာယ်နာ အမှာရက်ကအအီးအအုတ်ရက်အင် လွန်ဒက်က ရာစုနှစ်ပေါင်းများစွာနာ အီဂျစ်ရက်အင် ကျွန်ဘဝပင် လွတ်မြောက်လူမှ ကူညီအီဒက်က ဘုရားရှင်ယင် ဂုဏ်ပြုကျင်းပက ဖြစ်ဟေ။ ကိုယ်တော်ယေရူစာ လူရက်ကရှေ့ယာစကို အမှာကအတပည့်ရက်အင် ဆုံးမကိုအီကအကြောင်းအိမ်း လူ့ချဲယောယန်ကဖြစ်ကို ဆုံးနိန်ကြားကရပ် ယေရုရှလင်ယာ အမှာကအတပည့်ရက်အိမ်း ပသခါပွဲတော်ရက် မက်တာကျင်းပကက်ကအကြောင်းအိမ်း အိမ်မှာပါလ်ယာကတိုက်စာ ဟင်းပေါ်က အကြောင်းယင်ယဲ့ ကြိုတင်ကို င့ပီးလင်ကဟေ။
ကိုယ်တော်ယေရူကမှာ ယုဒငါကိုအော်က အတပည့်ဟူးဝါ ငါလင်ကဟေ။ ယုဒစာ အလှူတင်ဂါ ကလိင်ကိုလူကရက်အင် ဟက်တာဟက်တာငါနဲ့ အိမ်မှာတင်ဂါ တိပ့်အာကတင်ဂါရက်အင် ကူ(ဖ်)ကိုသုံးလင်ကဟေ။ ကိုယ်တော်ယေရူအိမ်း အမှာကနောက်လိုက်ရက် ယေရုရှလင်မြို့ယာ ထုတ်ကရပ် ယုဒစာ ယုဒလူမျိူးခေါင်းဆောင်ရက်အင် လင်ကိုလက်ကဟေ။ ကျီးကအိမ်း အမှာစာ ကိုယ်တော်ယေရူကပုံစံရက်အင် ငါ့ဆနပ်ကို အမှာရက်ကမှာပင် တင်ဂါကလိင်ကို သစ္စာဖောက်ကဇိဉ် ကြံစည်လင်ကဟေ။ မှတောင်မှာဒင်း ယုဒခေါင်းဆောင်ရက်စာ ကိုယ်တော်ယေရူယင် မေရှိယ ငါကို လက်အခံထမ်း ကတိုက်ကက်ကအကြောင်းယင်ယဲ့ ချဲတုံ့လင်ကဟေ။
သာသနာရေးဆိုင်ဟေက မဟာနာယက ဦးဆောင်ဟေက ယုဒခေါင်းဆောင်ရက်စာ ကိုယ်တော်ယေရူယင် အမှာရက်က တာဟူးယာထည်အီးကဇိဉ်ဖန်းကို ယုဒယင်းဒင်္ဂါးသုံးဆယ်အီးကို သစ္စာဖောက်ကဖန်းလင်ကဟေ။ မှအကြောင်းအရာရက်စာ ရှေ့ဖြစ်ဟောပညာရှိရက် ငါဒက်ကအတိုင်း ဖြစ်ပျက်တုံ့ကယဲ့ဖြစ်ဟေ။ ယုဒစာ သစ္စာဖောက်ကဇိဉ် သဘောတူလက်ခံကို တင်ဂါရက်လာကိုင်းကို လင်းစံဗြောင်ယာပြုယောယန်ကဟေ။ ကျီးကအိမ်း ကိုယ်တော်ယေရူယင် ယုဒလူမျိူးရက်ရိမ်ကလူမှာ အခွင့်အလမ်းရက်အင် စကိုကြံစည်လင်ကဟေ။
ကိုယ်တော်ယေရူစာ ယေရုရှလင်ယာ အမှာကအတပည့်ရက်အိမ်း ပသခါပွဲတော်ကျင်းပ တုံ့ဟေ။ ပသခါဆာတုံးကရပ် ကိုယ်တော်ယေရူစာ ပေါင်မုန့်အချိုလာကိုကျီးကရပ် အဆပ်ကို “မှတဗိုင်း(ဖ်)ယင် ဆာနက်အင်။ မှတဗိုင်း(ဖ်)စာ ငါကခန္ဓာကိုယ်ဖြစ်ကို ငါစာနနိန်ရက်အင် မှတဗိုင်း(ဖ်)ယင် အီယန်က။ နနိန်ရက် ငင် အမြဲသတိလူကဇိဉ် အတတ်ကဒေ လုပ်အီးယန်”ငါကို င့နက်လင်ကဟေ။ မှနည်းအိမ်း ကိုယ်တော်ယေရူစာ အမှာကအဆက်အိမ်း ခန္ဓာကိုယ်ယင် အမှာရက်ကအတွက် စွန့်လူကလင်က အကြောင်းယင် ငါ့ဆနပ်လင်ကဟေ။
ကျီးကအိမ်း ကိုယ်တော်ယေရူစာ ဝိုင်ခွက်ဆူးယာအကိုးကိုယ် “မှစပျစ်ကအိ(လ်)ယင် အူယင်။မှစပျစ်ကအိ(လ်)ယာ ပဋိညာဉ်အနန်းရက်ကအတွက် ငါကဆည်ဖြစ်ဟေ။ ငါကဆည်အကြောင့် နနိန်ရက်က အမီကဒုစရိုက်ရက်အင် ဘုရားရှင်စာ ခွင့်လွှတ်အီလင်က။ ငါ အတတ်ကလုပ်ကအတိုင်း လုပ်ကို မှစပျစ်ကအိ(လ်)ယင် အူတိုင်းယာ ငင်သတိလူယင်”ငါကို င့နက်ကဟေ။
ကျီးကအိမ်း ကိုယ်တော်ယေရူစာ အမှာကအတပည့်ရက်အင် “နနိန်ရက်ကအထဲယာက လူဟူးဝါးစာ ငင်သစ္စာဖောက်အန်က”ငါကို င့လင်ကရပ် အမှာကအတည့်ရက်စာ တစ်ဗျင်းအံ့ဩကလင်ကို အိမ်မှာဒလေက အလုပ်အင် အယူလုပ်အန်ကယား ငါကိုင့တုံ့လင်ကဟေ။ ကိုယ်တော်ယေရူနာ “ငါ မှပေါင်မုန့်ငင် အီကလူစာ သစ္စာဖောက်ဖြစ်ဟေ။”ငါကို င့နက်ကဟေ။ ကျီးကအိမ်း ကိုယ်တော်ယေရူစာ ပေါင်မုန့်ယင် ယုဒဇိဉ်အိနက်ကဟေ။
ယုဒစာ အိမ်မှာပေါင်မုန့်လာကျီးကရပ် စာတန်မာရ်နတ်ယဲ့ အမှာကမှားဆင်ကလင်ကဟေ။ ကျီးကအိမ်း ယုဒစာပြုကာလင်ကို ယုဒလူမျိူးခေါင်းဆောင်ရက် ကိုယ်တော်ယေရူယင် ရိမ်လူမှာ လင်ကိုကူညီအီးလင်ကဟေ။ အိမ်မှာအချိန်ယာ ဟင်းနက်တုံ့နန်းဖြစ်ဟေ။
ဆာကိုအူကိုကျီးကရပ် ကိုယ်တော်ယေရူအိမ် အမှာကအတပည့်ရက်စာ သံလွင်တာဂေါ်ယာ ချေလင်ကဟေ။ ကိုယ်တော်ယေရူနာ “ ယက်နက်တိုက် နနိန်ရက်စာ ငင် မလောက်ကို ပီဒက်ယန်ကဖြစ်ကို မှအကြောင်းအရားရက်စာ မလားပင်ရေးပီကဖြစ်ဟေ။ “သိုးကျောင်းသားနာ ပေါက်နက်ကို သိုးရက်စာ အစိပ်စိပ်အမွှာမွှာ ပြိုကွဲကလင်ကဖြစ်ဟေ။”ငါကို င့ဆနပ်လင်ကဟေ။
ပေတရုနာ “အရှင့်ယင် အယောက်ကလူရက်မလောက်ပီဒက်ကယဲ့ တပည့်တော်က(လ်) အမလောက်ပါ(လ်)က”ငါကို ပြန်ကိုလျှောက်တင်လင်ကဟေ။ ကျီးကအိမ်း ကိုယ်တော်ယေရူစာ ပေတရုယင် စာတန်နာ နနိန်ရက်အင် လာကက်တုံ့ဟေ။ ညီးငါဒင်းယဲ့ ငါစာ နနိန်ရက်ကအတွက် ဆုစိန်အီးယန်ကဖြစ်ကို နနိန်ရက်က ယုံကြည်မူ့ရက် အပျောက်အန်ပါ(လ်)က။ ညီးငါဒင်ယဲ့ ယက်နက်တိုက် အူကလ်ကအကြားအတတ်က အချိန်ယာပင် နင်စာ ငင် အချေပါ(လ်)ငါကို ဆုံးဟက် ငြင်းပြီးသားဖြစ်လင်က”ငါကို င့နက်ကဟေ။
ကျီးကအိမ်း ပေတရုစာ ကိုယ်တော်ယေရူယင် “တပည့်တော် ဆီးပေါ်ကငါနဲ့ဒင့်ယဲ့ ကိုယ်တော်ယင် အငြင်းဆန်ယန်ပါ(လ်)က”ငါကို ပြန်ကိုလျှောက်တင်လင်ကဟေ။ အယောက်ကအတပည့်စုတ်ရက်အလ် အတတ်ကဒေလေ ငါလင်ကဟေ။
ကျီးကအိမ်း ကိုယ်တော်ယေရူစာ အမှာကအတပည့်ရက်အင် ဂေသရှေမန် အရပ်အာ အော်လားကလင်ကို အပြစ်လုပ်ကက်က စိတ်ရက်အဖြစ်မှာ ဆုစိန်ကဖန်းကဟေ။ ကျီးကအိမ်း ကိုယ်တော်ယေရူစာ ဘုရားရှင်ယင် ဟူးဝါတည့်ဆုစိန်ကဇိဉ် ပြုကာလင်ကဟေ။
ကျီးကအိမ်း ကိုယ်တော်ယေရူနာ “အဗား(ဖ်)ဘုရား မှဒုက္ခဝေဒနာခွက်အင် အဆာစာဖြစ်လူနဲ့ အူကဇိဉ်အဖန်းငံယဲ့ ၊ညီးငါဒင်းယဲ့ လူရက်က အပြစ်ရက်အင်ခွင်လွတ်အီကဇိဉ် အယောက်ကနည်းလမ်း အာငါနဲ့ အဗား(ဖ်)ဘုရားက လိုဆန္ဒာအတိုင်း ဖြစ်စဉ်းယန်နက်နိမ့်”ငါကို ဆုံးဟက်ဆုစိန်လင်ကဟေ။ ကိုယ်တော်ယေရူစာ တစ်ဗျင်းစိတ်သောကထုတ်တုံ့ကို အမှာကအတာအူးရက်စာ ဆည်အဖြစ် ထုတ်လင်ကဟေ။ ဘုရားရှင်စာ ကိုယ်တော်ယေရူယင် နှစ်သိမ့်အီးကဇိဉ် ဟမန်းရက်အင် ဖြောင်နက်ကဟေ။
ဆုစိန်ကိုကျီးကအချိန်တိုင်း ကိုယ်တော်ယေရူစာ အမှာကအတပည့်ရက်ကမှာ ပြန်ကိုလင်ကဟေ။ ညီးငါဒင်းယဲ့ အမှာကအတပည့်ရက်စာ အိပ်တုံးနန်းဖြစ်ဟေ။ ကျီးကအိမ်း ကိုယ်တော်ယေရူနာ “ရိပ်(ရ်)အင့်ဒက် ငါက သစ္စာဖောက် မှနေရာထုတ်တုံ့နန်း”ငါကို င့လင်ကဟေ။
ယုဒစာ ကိုယ်တော်ယေရူကမှာ ယုဒလူမျိူးခေါင်းဆောင်ရက် ၊စစ်ဆာရက်အပြင် လူအုပ်ကြီးရက် အင် အော်လားကလင်ကဟေ။ အမှာရက်စာ ကတင်ရက်အိမ်း တင်းပုတ်ရက်အင် အကိုးပီဟေ။ ယုဒစာ ကိုယ်တော်ယေရူကမှာဗန်ကို “မင်္ဂလာပါဆရာ”ငါကို အတိန်နက်ကဟေ။ အမှာအတတ်ကဒေ လုပ်ပေါ်ကနာ ယုဒလူမျိူးခေါင်းဆောင်ရက်အင် နနိန်ရက်ကရိမ်ကလူစာ မှလူဖြစ်ကအကြောင်းယင် အချက်အီးကိုဆနပ်ကဖြစ်ဟေ။ကျီးကအိမ်း ကိုယ်တော်ယေရူနာ “ယုဒ ၊ငင် အတိန်ကို သစ္စာဖောက်ကလည်း “ငါကို ကထားလင်ကဟေ။
စစ်ဆာရက်စာ ကိုယ်တော်ယေရူယင် ဆင်ကိုရိမ်ကရပ် ပေတရုစာ ကတင်ယင်ဆာပြုကို သာသနာဆိုင်ဟေကမဟာနာယက ဟူးဝါကမှာလင်ကို အမူးထမ်းတုံ့က အစေခံက အကာနားယင် ကတင်အိမ်း ဗန်းနက်လင်ကဟေ။ ညီးငါဒင်းယဲ့ ကိုယ်တော်ယေရူနာ “ပေတရု ကတင်ယင်အခြိုက်နက်အင်း ၊ငင် ကာကွယ်အီးကဇိဉ် ငါကအဗား(ဖ်)ဘုရားထနဲ့ စစ်တပ်ဆူးယာငါဟေက ဟမန်းရက်စိန်ကလူဟေ။ ညီးငါဒင်းယဲ့ ငါစာ ငါကအဗား(ဖ်)ဘုရားက တူးယင် အတေးယန်ပေါ်ကဖြစ်ဟေ”ငါကို င့ဆနပ်လင်ကဟေ။ ကျီးကအိမ်း ကိုယ်တော်ယေရူစာ အိမ်မှာလူက အကာနား ကုအီတုံ့ကအချိန်ယာ အတပည့်စုတ်ရက် လင်းစံဗြောင်ယာ ကတ်ကာလင်ကဟေ။
မဿဲ ၂၆း၁၄-၅၆; မာကု ၁၄း၁၀-၅၀; လုကာ ၂၂း၁-၅၃; ယောဟန် ၁၂း၆; ၁၈း၁-၁၁