၃၀။ လူပေါင်းတစ်ထောင်ယင် ဆာကဇတ်ဦကဇတ် ကျွေးမွေးဟေက
ကိုယ်တော်ယေရူစာ အမှာကအတာပည့်ရက်အင် လူရက်အင် ဆနိန်အီးကဇိဉ် အယောက်ကထိန်ယာ ဖြောင်နက်ကဟေ။အမှာရက်စာ ကိုယ်တော်ယေရူငါဟေက နေရာပြန်ကို ထုတ်ဗား(ဖ်)ကရပ် အမှာရက်ကလုပ်တက်ဟေက ဦဇားရက်အင် ပြန်ကိုလျှောက်တင်လင်ကဟေ။ကျီးကအိမ်း ကိုယ်တော်ယေရူစာ အမှာရက်အင် အိ(လ်)ကြိမ်ဟိုက်တာနိန်ယား တိမ်ဆိမ်တုံးကနေရာနား လင်ကိုအနားလာကဇိဉ် င့နက်ကဟေ။မှအကြောင်းအိမ်း အမှာရက်စာ လှေတစ်စီးဖုံးယာချေကို အိ(လ်)ကြိမ် ဟိုက်တာနိန်ယား ဖြတ်ကူးလင်ကဟေ။
ညီငါဒင်းယဲ့ ကိုယ်တော်ယေရူအိမ်းအမှာက အတာပည့်ရက် လှေအိမ်းပြုလင်က လူရက်စာပေါ်လင်ကဟေ။ မှလူရက်စာ ကိုယ်တော်ယေရူရက်တောင်မှာဒင်း မလားထုတ်မှား အိ(လ်)ကြိမ်က ဟိုက်တာနိန်ယားက ကမ်းစပ်အာပင် ပတ်ကို ကိုက်လင်ကဟေ။ ကိုယ်တော်ယေရူအိမ်းအမှာက အတာပည့်ရက်ထုတ်ကရပ် အိမ်မှာလူရက် ကြိုတင်ကို ထုတ်တုံးနန်းဖြစ်ဟေ။
မှလူအုပ်ဗြောင်းယာ နု(လ်)အိမ်မန်ဆာရက်အင် အတုပ်ထိုင်း တာဆာပြိုင်ဦးရေငါးထောင်ကျော် ပါဝင်ဟေ။အိမ်မှာလူရက်စာ သိုးကျောင်းကအငှာကာ သိုးဆာရက်အိမ်တူတုံးကို အိမ်မှာလူရက်ကအပေါ်ယာ ကိုယ်တော်စာ သနားဂရုဏာစိတ် တစ်ဗျင်းဖြစ်ယောယန်ကို အမှာရက်ကအထဲယာက ဟပိုဆာအငှာက လူရက်အင် ဆီ(လ်)ကုအီလင်ကဟေ။
အယောက်ယက်တာ နောင်းပိုင်းယာ အတာပည့်ဟူးဝါစာ ကိုယ်တော်ယေရူယင် “အချိန်ယဲ့နောက်ကျတုံနန်း အနားဆာရက်အယဲ့ မြို့ရက်အငါပါ(လ်) ။အိမ်မှာလူရက် လင်ကိုဆာကလူမှာ ပြန်ကိုဖြောင်နက်အင်”ငါကိုလျှောက်တင် လင်ကဟေ။
ညီငါဒင်းယဲ့ ကိုယ်တော်ယေရူစာ အတာပည့်ယင် “နနိန်ရက် အမှာရက်ဇိဉ် ဆာကဇတ်ဆူဆူယာ အီနက်အင်”ငါကို ငှားနက်ကရပ် မှအတာပည့်စာ “ညီရက်ကမှား ပေါင်မုန့်ငါးလုံးအိမ်း တာနာအပိဆာ နိန်မာမေငါကဟေဖြစ်ကို အဆာမည်လုပ်ပေါ်ကယား”ငါကို ကထာလင်ကဟေ။
ကိုယ်တော်ယေရူစာ အိမ်မှာလူအုပ်ရက်အင် တစ်ဖွဲ့ယာ လူအယောက်ငါးဆယ်စီ နင်နူ(လ်)ပုံယာတုံးကဇိဉ် အမှာက အတာပည့်ရက်အင် ဖြောင်နက်ကဟေ။
ကျီးကအိမ်း ကိုယ်တော်ယေရူစာ မှပေါင်မုန့်ငါးလုံးအိမ်းတာနာနိန်မာလာကို ကောင်ဂါလက်အာ မော်ကိုယူကို ဆာကဇတ်ရက်ကအတွက် ဘုရားရှင်ကကျေးဇူးတော်ယင် ချီးမွမ်းဆုစိန်လင်ကဟေ။
ကျီးကအိမ်း ကိုယ်တော်ယေရူစာ ပေါင်မု့န်ရက်အိမ်းတာနာရက်အင် အပိုက်ဆာအဆပ်ကို အမှာကအတာပည့်ရက်အာပင် တစ်ဆင့် လူရက်ဇိဉ်မန်ကို အီဇိဉ်လင်ကဟေ။ အတာပည့်ရက်စာ ဆာကဇတ်ရက် မန်တုံကရပ် ဆုံကအငှာထမ်း လူတိုင်းစိတ်ကျေနပ်မှ ကင်မှဆာလင်ပေါ်ကဟေ။
ကျီးကအိမ်း အတာပည့်ရက်စာ အဆာထမ်း ပါ(လ်)တုံးက ဆာကဇတ်ရက်အင် ရနက်ကိုကလိင်ကရပ် ခရင်းတစ်ဆယ့်နှစ်တောင်း ဖြိမ်းမှာနီး လူလင်ကဟေ။အိမ်းမှာ ဆာကဇတ်စုတ်ရက်စာ ပေါင်မုန့်ငါးလုံးအိမ်းတာနာနိန်မာပင် လူကဖြစ်ဟေ။
မဿဲ ၁၄း၁၃-၂၁; မာကု ၆း၃၁-၄၄; လုကာ ၉း၁၀-၁၇; ယောဟန် ၆း၅-၁၅