၄၁။ ဘုရားရှင်နာ ကိုယ်တော်ယေရူယင် ဆီးကမှပင်ပြန်ကိုယ်ဆိမ်းစဉ်က

စစ်ဆာရက်စာ အရှင်ယေရူယင် လက်ဝါးကပ်တိုင်ဖုံးယာ တင်ကျီးကရပ် ဂျူးလူမျိူးခေါင်းဆောင်ရက်နာ “ယေရူနာ ဆုံးယက်ကြားကရပ် ဆီးကမှပင်ပြန်ကို့ ရိပ်အန်ကငါကို ဝပ်ကိုင့ဒက်ဟေ၊ အမှာကအလောင်ယင် အမှာကအတပည့်ရက် အကူး(ဖ်)လူမှား လူရက်စောင်တုံ့သင့်ဟေ အမှာရက် ကူး(ဖ်)ကိုယ် လာလူနဲ့ ယေရူဆီးကမှပင်ပြန်ကိုယ်ရိပ်အင်လူနန်း ငါကိုယ် င့လင်က”ငါကို င့ဆာနပ်လင်ကဟေ။ ပိလက်နာ “စစ်ဆာရက်အင် အော်လားကိုင်ကိုယ် အုတ်ဂူယင် စောင်လူကဓာတ်စောင်တုံ့ယင့်”ငါကို ငါနက်ကဟေ။

မှအကြောင်းအိမ်း အမှာရက်နာ လူရက်အိမ်မှာအုတ်ဂူယင်ပိတ်ပီးက တလုံယင် အကြိပ်လူမှား တလုံယာအမှတ်ဆာ တံဆိပ်ဆူးယာလုပ်ပီလင်ကဟေ။ ခန္ဓာကိုယ်ရုပ်အလောင်းယင် အကူ(ဖ်)လူမှား စစ်ဆာရက်အင် စောင်ဇဉ်းပီလင်ကဟေ။

ယေရူဆီးကိုင်ကိုယ်၊ အယောက်ယက်တာနာ ဥပုသ်ရက်ယက်ဖြစ်ဟေ။ ဥပုသ်ရက်ယက်အာ ဟူးဝါယဲ့ အလုပ်အလုပ်ပါ(လ်) ၊ခရီးအလင်ကအကြောင်းအိမ်း ယေရူကအဖက်ဟူးဝါယဲ့ အမှာကအုတ်ဂူယာ အလင်ပါ(လ်)။ ညီးငါဒင်းယဲ့ ဥပုသ်ရက်ယက်ကျီးကို အယောက်ယက်တာ အပင့်ဟာမတ် စောစောကရပ် တာဆာလှောင်ဆာရက်နာ ကိုယ်တော်ယေရူက အုတ်ဂူယာလင်ကဇိဉ် ပြင်ဆင်လင်ကဟေ။ ကိုယ်တော်ယေရူက ခန္ဓာကိုယ်ရုပ်အလောင်းယင် အမွှေးနံ့သာရက်အိမ်း ပူဇော်ကက်ကဟေ။

တာဆာလှောင်ဆာရက် အထုပ်မီးအချိန်ယာ ကိုယ်တော်ယေရူအုတ်ဂူငါဟေက နေရာယာ မြေငလျင်ပြင်းထန်မှလူပ်လင်ကဟေ။ ဟမန်ဗြောင်တစ်ပါးနာ နိဗ္ဗာန်ရွှေမြို့တော်ယာပင် ဗန်(ဖ်)ကို အုတ်ဂူ လင်းဟနှင့်ယာပိတ်ပီးက တလုံယင် အကြိပ်ကိုယ် အိမ်မှားအဖုံးယာ တုံ့လင်ကဟေ။ အုတ်ဂူအနားဆာက ငါဟေက စစ်ဆာရက်စာ အိမ်မှားဟမန်းဗြောင်ယင် ပေါ်လင်ကဟေ။ အိမ်မှာဟမန်းဗြောင်က အဆင်းသဏ္ဍာန်နာ အရောင်ပြုကိုကနင်းတုံ့ဟေ။ စစ်ဆာရက်စာ တဗျင်းအစက်ကို ကဇက်ဖုံးယာ ဗုံးကနဲ့ပေါင်ကလင်ကဟေ။

တာဆာလှောင်ဆာရက်စာ အုတ်ဂူယာထုပ်ကရပ် ဟမန်းဗြောင်နာ အမှာရက်အင် “အစက်ယဲ့ ကိုယ်တော်ယေရူ မှနေရာယာ အငှာနန်း ၊အမှာကင့ဒက်ကအတိုင်း အမှာနာ ဆီးကမှာပင်ပြန်ကိုဆိမ်းကလင်နန်း ။အုတ်ဂူအတာဟုန်းယာ ယူနက်အင်း”ငါကို ငါနက်ကဟေ။ တာဆာလှောင်ဆာရက်နာ အုတ်ဂူအတာဟုန်းယာ ယူနက်ကရပ် ကိုယ်တော်ယေရူက ခန္ဓာကိုယ်ရုပ်အလောင်း အငါနန်း ။

ကျီးကအိမ်း ဟမန်းဗြောင်နာ အိမ်မှာတာဆာလှောင်ဆာရက်အင် “အတပည့်ရက်စိတ်လင်ကို ငါ့ဆနပ်အာ ကိုယ်တော်ယေရူနာ ဆီးကမှားပင်ပြန်ကို ဆိမ်းယင်နန်း၊ နနိန်ရက်တောင်မှာမလား ဂါလိလဲလာ မလားလင်နန်း”ငါကို ငါ့ဆနပ်လင်ကဟေ။

တာဆာလှောင်ဆာရက်နာ တဗျင်းအံ့ဩကို ပျော်ရွှင်ကို အတပည့်ရက်ကမှာ အိမ်းမှာသတင်းမီရက်အင် ငါဆနပ်ကဇိဉ် ကတ်ယော့လင်ကဟေ။ အိမ်းမှာတာဆာလှောင်ဆာရက်စာ အတပည့်ရက်ကမှာ သတင်းမီးယင် ငါ့ဆနပ်ကဇိဉ် လင်ဟေကလင်းယာ ကိုယ်တော်ယေရူနာ အမှာရက်က ရှေ့ယာထုပ်ဗား(ဖ်)လင်ကဟေ။ အမှာရက်နာ ကိုယ်တော်ယေရူက အတာနားငုတ်ကို ဆာဗား(ဖ်)လင်ကဟေ။

ကျီးကအိမ်း ကိုယ်တော်ယေရူနာ “အစက်အန်ယဲ့ ငါကအတပည့်ရက်ကမှာလင်ကို ဂါလိလဲဒေသယာ လင်ကဇိဉ် ငါ့ဆနပ်လင်၊ အမှာရက်စာ ငင်အိမ်မှာနေရာပေါ်ယန်က”ငါကို ငါ့နက်ကဟေ။

မဿဲ ၂၇း၆၂-၂၈း၁၅; မာကု ၁၆း၁-၁၁; လုကာ ၂၄း၁-၁၂; ယောဟန် ၂၀း၁-၁၈