၁၄။ တာဂေါ်ကန္တာရထဲယာ ပတ်တုံးက
ဘုရားရှင်အိမ်းပြုမူပီက ပဋိညာဉ်အရ ဣသရေလလူမျိူးရက် လိုက်နာကဇတ် ပညတ်တော် တရားရက်အင် ရှင်ပြကျီးကအချိန်ယာ အမှာရက်အင်သိနာ တာဂေါ်ယာပင် လင့်စံပြောင်းယာ အော်လားကလင်ကို လင်းဆနန်းလင်ကဟေ။ ဘုရားရှင်နာ အိမ်းမှာလူရက်အင် ကတိအီးပီကပြည်ယာ အော်လားကက်ကဟေ။ အိမ်းမှာနိူင်ငံယင် ခါနန်ငါကိုယေ အော်ဟေ။ ဘုရားရှင်နာ အမှာရက်ကရှေ့ယာ ဟင်းဂြပ်(ရ်)အဖြစ် ဦးဆောင်ကို အိမ်းမှာအရားကအလိုယာ ယော့လင်ကဟေ။
ဘုရားရှင်နာ အာဗြဟံ၊ဣဇက်၊ ယာကုပ်ရက်အိမ်း အမှာရက်ကမျိူးဆက်ရက်အင် ကဇက် နေရာအီကငါပီက ကတိတော်အီပီကနေရာယာ လူစုဘောင်ကို ထုပ်တုံးနန်ယေဖြစ်ဟေ။ အိမ်းမှာလူရက်အင် ခါနန်လူမျိူးငါကို အော်ကို ခါနန်လူရက်နာ ဘုရားရှင်ယင်အကိုးကွယ်ထမ်း ဘုရားရှင်က တူးရက်အ(လ်) အတေးကအငါပ(လ်)။ အမှာရက်နာ ဘုရားအတုရက်အင် ကိုးကွယ်ကို အမီကအလုပ်ရက်အင် လုပ်တုံးလင်ကဟေ။
ဘုရားရှင်နာ ဣသရေလလူမျိူးရက်အင် “နနိန်ရက်နာ ကတိတော်အီပီကနိူင်ငံယာ ထုပ်ကျီးကအချိန်ယာ အိမ်းမှာနေရာက ငါဟေက ခါနန်လူမျိူးရက်အင် ကတောက်ပေါ်က။ အိမ်းမှာလူရက်အိမ်း ငြိမ်းချမ်းမှမက်တာ တုံ့ကဇိဉ်ကတိအအီလင်ငဲ့။အိမ်းမှာလူရက်အိမ်း အလာပေါ်ပ(လ်)က ။ အမှာရက်ကရုပ်ထုစုတ်ရက်အင် နနိန်လုစုတ်ရက် ဖျက်ဆီးနက်ပေါ်က ။နနိန်ရက် ငါကတူယင်အကိုးနဲ့ နောက်ဆုံးယာ နနိန်ရက် ငင်ကိုးကွယ်ကအစား အမှာရက်ကရုပ်ထုရက်အင် ကိုးကွယ်လင်က”ငါကို ငါပီလင်ကဟေ။
ဣသရေလလူမျိူးရက်နာ ခါနန်ကနယ်စပ်ယာ ထုပ်ကရပ် မောရှေနာ လူမျိူးတစ်မျိူးစီက လူဟူဝါ်ဇီ ဆယ့်နှစ်ဦးဖြစ်မှရွေးချယ်လင်ကဟေ။ အမှာနာ အမှာကလူရက်အင် အိမ်းမှာနိူင်ငံကအခြေနေယင် အချဲမှစုံစမ်းကဇိဉ် င့ဆနပ်လင်ကဟေ။ ခါနန်လူမျိူးရက်က အားနည်းချက်၊အားသာချက်ရက်အင် အချဲမှ စုံစမ်းလင်ကဟေ။
အိမ်းမှာလူဆယ့်နှစ်ယောက်နာ ခါနန်ယာရက်ပေါင်းလေးဆယ် ခရီးလင်ကို ပြန်းဗန်ကဟေ။ အိမ်းမှာနေရာနာ ကဇက်တစ်ဗျင်းမီကို အင်ဆကီးရက်အ(လ်)တစ်ဗျင်းပေါများဟေငါကို အိမ်းမှာလူရက်နာ င့ဆနပ်လင်ကဟေ။ ညီးငါဒင်ယဲ့ သူလျှိုဆယ်ယောက် က(လ်) “မြို့ရက်နာ တစ်ဗျင်ခိုင်မာကို လူရက်အ(လ်) တစ်ဗျင်သန်မာဟေကလူရက်ဖြစ်ဟေ။ အမှာရက်တိုက်ခိုက်နဲ့ ညီရက် ရူံးယန်က ဖြစ်ကို ညီရက်စုတ်ရက် ကတိုက်စာဟင်းငန်က”ငါ င့လင်ကဟေ။
ဗြုန်းမနီး ကာလက်အိမ်းကယောရူငါဟေက ကျန်ဟေကသူလျှိုနှစ်ဟူးဂ(လ်) “ခါနန်လူမျိူးရက်နာ ပဟောင်ကီ(ရ်)ကို သန်မာကို ညီရက်ရူံးယမ်က မှန်ဂယဲ့ ဘုရားရှင်စာ ညီရက်ဇိဉ် တိုက်ခိုက် အီယန်ကဟုတ်”ငါကို ငလင်ကဟေ။
ညီငါဒင်ယဲ့ လူရက်နာ ကာလက်အိမ်းကယောရူံးရက်က တူးယင်အကိုးပ(လ်) ။အမှာရက်နာ မောရှေအိမ်းအာရုန်ရက်အင် တစ်ဗျင်းမန်ချေယောယန်ကို “နနိန်ရက် ညီရက်အင် အတတ်ကတယ် အန္တရာယ် ငါဟေက နေရာ အာဇာရီကအော်လားကိုင်းကယား ? ညီရက်အီဂျစ်ယာ တုံဒက်သင့်ဟေ ညီရက်အိမ်းမှာနိူင်ငံထဲယာဆင်နဲ့ တိုက်ပွဲယာ ဆီယန်ကဖြစ်ကို ခါနန်လူမျိူးရက် ညီရက်က အအိပ်ထာရက်အင် အငှား လုပ်အန်က”ငါကို ငလင်ကဟေ။ လူရက်နာ အမှာရက်အင် အီဂျစ်ပြည် အော်လားကလင်က အယောင်ကခေါင်းဆောင်ဟူဝါ် စိုးတုံးလင်ကဟေ။
လူရက်နာ အတတ်ကတယ် ငါးတုံးကရပ် ဘုရားရှင်နာ မန်ချေလင်ကဟေ။ အမှာနာလက်ဟေက ကိန်ယာပင် ကြွဗန်ကို “ နနိန်ရက် မလိမ်းကန္တာရထဲယာ ပတ်ကိုလင်တုံးလင်ပေါ်က။ အဆက်နှစ်ဆယ်အဖုံးယာ လူတိုင်း အိမ်းမှာနေရာဆီးလင်က ငါ နနိန်ရက်ဇိဉ် အီကနိူင်ငံငါ ဟက်တာယဲ့ အဆင်လင်ပေါ်ပ(လ်)က ယောရူအိမ်းကာလက်ရက်မယ် ဆင်ပေါ်က”ငါကို င့လင်ကဟေ။
လူရက်နာ ဘုရားရှင် အတတ်ကတယ် ငါဟေကတတ်ကရပ် အမှာရက်က အပြစ်ရက်အင် နောင်တလူကို ခါနန် လူမျိူးရက်အင် တိုက်ခိုက်ကဇိဉ် ဆုံးဖြတ်ကို မောရှေစာ အမှာရက်အင် အလင်ကဇိဉ် သတိအီလင်ကဟေ။ အဇာရီကအကြောင်းယားငါနဲ့ အမှာရက်အိမ်း မက်တာဘုရားရှင် အယောကအကြောင်းဖြစ်ဟေ။ ညီငါဒင်ယဲ့ အမှာရက်နာ မောရှေကတူးယင်အကိုးကအငါပ(လ်) ။
ဘုရားရှင်စာ အမှာရက်အိမ်း မတ်တာ စစ်ပွဲထဲယာယောကအငါကအကြောင်းအိမ်း လူဘောင်းကိုကတိုက်စာဟင်းကို မှကရပ် ဣသရေလလူမျိူးရက်စာ ခါနန်ယာပင် ပြန်ဗန်ကို နှစ်လေးဆယ်ခန့်ကြားမနီး မလိမ်းကန္တာရထဲယာ ပတ်ကိုလင်တုံးလင်ကဟေ။
မလိမ်းကန္တာရထဲယာ ဣသရေလလူမျိူးရက် နှစ်လေးဆယ်ခန့် ပတ်ကိုလင်တုံးကရပ် ဘုရားရှင်စာ အမှာရက်အင် ကူညီစောင့်ရှောက်အီပီလင်ကဟေ။ အမှာစာ အိမ်းမှာရက်အင် “မန္န”ငါဟေက ပေါင်မုန့်တစ်မျိူးယင် ကောင်းဂါလက်အာပင် အီကို အရွယ်အစားအတိုင်းဆာ ငုံးငါကိုအော်ဟေက အူဆီအုပ်အင် အိမ်းမှာလူရက် အဆံဆာပေါ်မှ အမှာရက်ကစခန်းအတာဟုတ်ယာ ပါ(လ်)အီးလင်ကဟေ။ ဘုရားရှင်နာ အမှာရက်ကအဝတ်အစားရက်အိမ်းဖိနပ်ရက်အင် အဟော့မှလုပ်အီးပီလင်ကဟေ။
ဘုရားရှင်စာ အမှာရက်ဇိဉ် အိ(လ်)အူကလူမှ တလုံတာဂေါ်ယာပင် အိ(လ်)ရက်ပြုမှ တစ်ဗျင်းထူးဆန်းမှ လုပ်အီးလင်ကဟေ။ ညီငါဒင်ယဲ့ မှကိစ္စရပ်ရက်အင် အယူထမ်း ဘုရားရှင်အိမ်မောရှေရက်အင် ညဉ်ကလင်ကို မရိမ်းကိုအဆလိပ် ကတက်ကိုတုံးလင်ကဟေ။ မဒေဖြစ်တုံးကယဲ့ ဘုရားရှင်စာ ဆက်လက်ကိုသစ္စာတရားပီလင်နိန်မက်။ အမှာနာ အာဗြဟံ၊ ယာကုပ်အိမ်း ဣဇာက်ရက်က နောင်လာနောင်သားရက်အင် ပါ(ရ်)မှလုပ်အီးက ငါကိုက ကတိတော်ရက်အင် လုပ်အီးလင်ကဟေ။
ယာတာကရပ် လူရက်နာ အိ(လ်)အူကအာငါကို ဘုရားရှင်စာ မောရှေယင် “မှတလုံအိမ်း တူးပိ(ရ်)ယင့် အတာဟိုန်ငါပင် အိ(လ်)ရက်ပြုယန်က”ငါကို င့လင်ကဟေ။ ညီငါဒင်ယဲ့ မောရှေနာ အိမ်မှားတလုံ အိမ်းတူးပိ(ရ်)က အစား တုတ်အိမ်းနိန်ဟက်ပေါက်လင်ကဟေ။ အမှာစာ မှနည်းအိမ်း ဘုရားရှင်က ဂုဏ်သိက္ခာကျဆင်းမှ လုပ်နက်လင်ကဟေ။ ညီငါဒင်ယဲ့ လူတိုင်းအိ(လ်)အူကလူမှား တလုံတာဂေါ်ယာပင် အိ(လ်)ရက်ပြုကယဲ့ ဘုရားရှင်စာမောရှေယင် မှန်ချေတုံးလင်ကဟေ။ ဘုရားရှင်စာ “နင်အတတ်ကတယ် လုပ်ကအကြောင်းအိမ်း ကတိအီပီက နိုင်ငံငင် နင်ငင်ဆင်က ခွင့်အအီပါ(လ်)က” ငါကို င့လင်ကဟေ။
ဣသရေလလူမျိူးရက်စာ မလိမ်းကန္တာရထဲယာ ပတ်ကိုနှစ်ပေါင်းလေးဆယ်ခန့် ထုတ်ကိုကျီကရပ် ဘုရားရှင်ယင်ဆန့်ကျင်ဟေက လူရက်ဆီးကလင်နန်းဖြစ်ဟေ။ ကျီးဂအိမ်း ဘုရားရှင်စာ မှလူရက်အင် ကတိတော်အီပီက နိုင်ငံအစပ်အာ အော်လားကလင်ကဟေ။ မောရှေစာ အတတ်ကခါ တစ်ဗျင်းအုတ်ဆာတုံးနန်းဖြစ်ကို ဘုရားရှင်နာ ယောရူယင် မှလူရက်အင် ဦးဆောင်ကဇိဉ်ရွေးချယ် လင်ကဟေ။ ဘုရားရှင်နာ မောရှေဒေလေ ဘုရားရှင်ကဟမန်းပြောင်းဟူးဝါ ဖြောင်းနှစ်အန်ကငါကို မောရှေဇိဉ် ကတိအီလင်ကဟေ။
ကျီကအိမ်း ဘုရားရှင်စာ မောရှေယင် ကတိတောအီပီက နိုင်ငံငင်ပေါ်မှ တာဂေါ်ထိပ်ယာဖြောင်းနက်ကဟေ။ မောရှေစာ ကတိအီပီက နိုင်ငံငင်ပေါ်ကယဲ့ ဘုရားရှင်စာ အမင်ဆင်ကအဖန်းပ(လ်)။ ကျီးကအိမ်း မောရှေဆီးကံကို ရက်ပေါင်းသုံးဆယ်ကြာမနီး ဣသရေလလူမျိူးရက်နာ ဝမ်းနည်တုံးလင်ကဟေ။ ယောရူစာ အမှာရက်က ခေါင်းဆောင်အနန်း ဖြစ်ကို ဘုရားရှင်ယင် ကြည်ညိုကအကြောင်းအိမ်း ခေါင်းဆောင်မီဟူးဝါဖြစ်ဗာ ကဟေ။
ထွက်မြောက်ရာကျမ်း ၁၆-၁၇; တောလည်ရာကျမ်း ၁၀-၁၄; ၂၀; ၂၇; တရားဟောရာကျမ်း ၃၄