Chak: Open Bible Stories

Updated ? hours ago # views See on DCS Draft Material

၁၉။ ရှေ့ဖြစ်ဟောပညာရှိရက်

Frame 19-01

ဣသရေလလူမျိူးရက်ကမှ ဘုရားရှင်စာ ရှေ့ဟောဖြစ်ပညာရှိရက်အင် ရက်ပိုက်ဖြောင်လင်ကဟေ။ ရှေ့ဟောဖြစ်ပညာရှိရက်စာ ဘုရားရှင်က သတင်းတူးရက်အင် အတေးကို လူရက်ဇိဉ် ငါဆနပ်လင်ကဟေ။

Frame 19-02

ဣသရေလနား အာဟတ် ဘုရင်ဖြစ်တုံကရပ် ဧလိယစာ ရှေိ့ဟောဖြစ် ပညာရှိဟူးဝါဖြစ်ကို အာဟတ်ဘုရင်စာ အမီကလူဟူးဝါဖြစ်ဟေ။ အမှာစာ လူရက်အင် ဗာလငါကိုက ဘုရားအတုယင် ကိုးကွယ်ကဖန်းကဇိဉ် ကြိုးစားတုံကို ဧလိယစာ ဘုရားရှင်နာ လူရက်အင် အပြစ်အီယန်ကဟေ ငါကိုင့လင်ကဟေ။ အမှာစာ “ငါ မိုးပြန်ကိုဗဲယန်က အငှာနဲ့ဣသရေလနန်းအတာဟုန်ယာ မိုးရက်အိမ်းတာမုန်ရက်အကျဗားပါ(လ်)က”ငါကိုင့လင်ကဟေ။ မှအကြောင်းအိမ်းအာဟတ်နာ တစ်ဗျင်းမန်ချေကကို ဧလိယ ကတိုက်ကဇိဉ် ဆုံးဖြတ်လင်ကဟေ။

Frame 19-03

မှအကြောင်းအိမ်း ဘုရားရှင်စာ ဧလိယယင် အာဟတ်အပေါ်မှ မလိမ်းကန္တာရထဲယာ ဖြောင်နက်ကဟေ။ ဧလိယစာ ဘုရားရှင် ဆနပ်က မလိမ်းကန္တာရထဲယာက စမ်းချောင်းဆူယာ လင်ကဟေ။ အပင်ဟမတ် အိမ်းနက်တိုက်အာ အူဆီရက်စာ ဧလိယဇိဉ် ပေါင်းမုန့်အိမ်းအဆံရက် လာကိုင်ကို အီဟေ။အာဟတ်အိမ်းအမှာက စစ်ဆာရက်စာ ဧလိယ ပတ်ကိုဆုံးကယဲ့ အပေါ် ပါ(လ်) ။

Frame 19-04

အချိန်ရက်ကြားကရပ် မိုအဗဲကအကြောင်းအိမ်း မရောင်အိ(လ်)ရက် ဆိမ်ကမ်းကဟေ။ အိမ်းမှာအခါကရပ် ဧလိယစာ အနားဆာက တိုင်းပြည်ဆူယာလင်ကဟေ။ အိမ်းမှာ နိူင်ငံငှာ ဆင်းရဲဟေက မုဆိုးမဟူးဝါအိမ်းအမှာကအဆာရက်အိမ်း တုံ့လင်ကဟေ။ အမှာရက် လယ်ယာအင်အ ဖြစ်ကအကြောင်းအိမ်း ဆာကဇိဉ်ပြတ်ကရိ(ရ်)တုံ့လင်ကဟေ။ မှဒေဖြစ်ကယဲ့ အိမ်းမှာတာဆာလှောင်နာ ဧလိယယင် ဂရုစိုက်အီက အကြောင်းအိမ်း ဘုရားရှင်စာ တာဆာလှောင်အိမ်းအမှာကအဆာရက်အင် စောင့်ရှောက်အီလင်ကဟေ။ အမှာကဂျူံဗူးအိမ်းဆားပုလင်နာ ဟတ်တာယဲ့ဆုံက အာငှာထမ်း အငတ်ဘေးထုတ်က တစ်ချိန်လုံးယာ အမှာရက်က ဆာကဇတ်ရက် အပြတ်ထမ်း ဧလိယစာ အိမ်းမှာနေရာ သုံးနှစ်ခန့်တုံလင်ကဟေ။

Frame 19-05

သုံးနှစ်ခန့်ကြားကရပ် ဘုရာရှင်စာ ဧလိယယင် မိုးဗဲ့မှလုပ်အီက ငါကို င့လင်ကဟေ။ ဧလိယစာ ဣသရေလရက်ကမှပြန်လင်ကို အာဟတ်အိမ်းတူးပီကဖန်းကို ဧလိယစာ အာဟတ်ကမှ လင်ကဟေ။ အာဟတ်စာ အမင်ပေါ်ကရပ် “ဪ နင်စာမှဟုတ်တေ၊ နင်စာတစ်ဗျင်းဒုက္ခအီကအကောင်ဟုတ်”ငါကို င့လင်ကဟေ။ ဧလိယယဲ့ အမင် “နင်မယ် ပြဿနာဆုံးကလူ၊ နင်စာ ယေဝါဝေးပီဟေ။အမှာမေ စစ်မှန်ဟေက ဘုရားဖြစ်ဟေ။ ညီငါဒင်းယဲ့ နင်စာဘုရားအတုအယောင် ဗာလမယ် ကိုးကွယ်ဟေ။ အတတ်ကအချိန်ယာ နင်စာဣသရေလ နန်းတွင်ကငါဟေက လူရက်အင် ကရမေလ တာဂေါ်ယာ အော်လားကလင်ပေါ်က”ငါကို င့လင်ကဟေ။

Frame 19-06

မှကရပ် ဣသရေလနန်းအတာဟုန်းယာ ငါဟေက လူစုတ်ရက်အင် ကရမေလ တာဂေါ်ယာ လင်ကရပ် ဘုရားအတုအယောင် ဗာလက သတင်းတူးရက်အင်ငါဟေက ဟမန်းရက်အ(လ်) ယောယန်ကဟေ။ မှလူရက်စာ ဗာလက ရှေ့ဖြစ်ဟောပညာရှိရက် ဖြစ်ကို လူပေါင်းလေးရာငါးဆယ်ခန့်ငါဟေ။ ဧလိယစာ အိမ်းမှာလူရက်အင် “အဆာမီကအကြောင်းအိမ်း နနိန်ရက်က စိတ်ရက် ဟက်တာဟက်တာ ပြောင်းတုံး ကယား?၊ယေဝါစာ ဘုရားဖြစ်နဲ့ ယေဝါကိုးကွယ်ကိုယ် ဗာလယဲ့ ဘုရားဖြစ်နဲ့ ဗာလမယ် ကိုးကွယ်ယင့်”ငါကိုင့လင်ကဟေ။

Frame 19-07

ကျီးကအိမ်း ဧလိယစာ ဗာလက ရှေ့ဖြစ်ဟောပညာရှိရက်အင် “ ကိ(ရ်)တာရာကတိုက်ကို အဆံရက်အင် အပိုင်းပိုင်းအထုတ်ကို ယစ်ပလ္လင်ဖုံးယာ ပူဇော်ကဇိဉ် တင်နက်အင့်။ ညီငါဒင်းယဲ့ ဗန်းအတိမ်(လ်)ဟာနိန်ယဲ့ ကျီးနဲ့ငါယဲ့ ကျန်ကယစ်ပလ္လင်ဖုံးယာ မှနည်းအတိုင်း လုပ်အန်က။ ဘုရားရှင်စာ ယစ်ပလ္လင်ဖုံးယာ ဗန်ခြူဇိဉ်နဲ့ အမှာစာ ဘုရားအစစ်ဖြစ်က နနိန်ရက်ချဲယန်က”ငါကို င့လင်ကဟေ။ မှအကြောင်းအိမ်း ဗာလက ရှေ့ဖြစ်ဟောပညာရှိရက်နာ ပူဇော်ကဇိဉ် ပြင်ဆင်ကို ဗန်အတိမ်(လ်)ထမ်း တုံးလင်ကဟေ။

Frame 19-08

ကျီးကအိမ်း ဗာလကရှေ့ဖြစ်ဟောပညာရှိရက်စာ ဗာလကမှ “ညီရက်အင် ချဲ့ဇိဉ်ယန်”ငါကို ဆုစိန်လင်ကဟေ။ အမှာရက်စာ ယက်တာလုံး ဟိုကိုဆုစိန်ကို အမှာရက်က ခန္ဒာကိုယ်ရက်အင် ကတင်အိမ်း ဟန်ကို ယက်တာလုံးဆုစိန်ကယဲ့ ဗာလစာ ပြန်ကိုဖြေက အငါထမ်း ဆုယဲ့ကဗန်ရက်အင် ဖြောင်ကအငါပါ(လ်) ။

Frame 19-09

ဗာလက ရှေ့ဖြစ်ဟောပညာရှိရက်စာ ဗာလထဲ့ ဆုစိန်ကို ယက်တာလုံးပြတ် အချိန်ဆုံဇိဉ်ကို နောက်ဆုံးယာ ဆုစိန်ကရက်အင် ရပ်တန့်လင်ကဟေ။ ကျီးကအိမ်း ဧလိယစာ အယောက်က ကိ(ရ်)တာရာက အဆံယင် လာကို ဘုရားရှင်က ယဇ်ပလ္လင်ဖုံးယာ တင်ကို လူရက်စာ အူကူ(လ်)ဆယ်နှစ်ကူ(လ်) လာကိုင်းဇိဉ်ကို အဆံရက်အိမ်း ယဇ်ပလ္လင်က ကဇက်ရက်အကျန်မှ အကျီးမှနီး ကော်ကဖမ်းလင်ကဟေ။

Frame 19-10

ကျီးကအိမ်း ဧလိယစာ “ယေဝါ၊ အာဗြဟံကဘုရား၊ ဣဇက်အိမ်းယာကုပ်၊ နနိန်ရက်စာ ဣသရေလရက်က ဘုရားဖြစ်ကို ငါစာ နနိန်ရက်ကအငှားဆာဖြစ်က ညီရက်အင် ယက်ဆနပ်အန် ။ မှလူရက်အင်ယဲ့ အရှင်စာ ဘုရားရှင် အစစ်ဖြစ်ကအကြောင်းယာ ညီရက်အင် ဖြေအီးယန်”ငါကို ဆုစိန်လင်ကဟေ။

Frame 19-11

ဗြုန်းမနီ ကောင်းဂါလက်အာပင် ဗန်ရက်ကျဆင်းဗန်ကို အဆံရက်၊ ဖုံဖင်းရက်၊ တာလုံရက် ကဇက်အိမ်း ယဇ်ပလ္လဘေးယာက ငါဟေက အိ(လ်)ရက်အင် ခြူဇိဉ်ကို လူရက်စာ ကဇက်ဖုံးယာ ပုတ်ကို “ယေဝါစာ ဘုရားဖြစ်ဟေ၊ယေဝါစာ ဘုရားဖြစ်ဟေ”ငါကို ဝန်ခံကို င့လင်ကဟေ။

Frame 19-12

ကျီးကအိမ်း ဧလိယစာ “ဗာလက ဆုယဲ့က ရှေ့ဖြစ်ဟောပညာရှိရက်အင် အလွတ်အအီယဲ့”ငါကို င့နက်ကဟေ။ မှကရပ် လူရက်စာ ဗာလက ရှေ့ဖြစ်ဟောပညာရှိရက်အင် ရိမ်ကို လင်စံဗြောင်ယာ အော်လားကလင်ကို ကတိုက်နက်ကဟေ။

Frame 19-13

ကျီးကအိမ်း ဧလိယစာ ဘုရင်အာဟတ်အင် “မိုးဗဲ့ယန်ကဟေဖြစ်ကို နင်က ကိန်းယာ အတတ်လင်ဒတ်”ငါကို င့နက်ကဟေ။ ကျီးကအိမ်း ဟင်းဂါ(ရ်)ရက်စာ ထင်းမုတ်ဖြစ်ကို မိုးရက်တစ်ဗျင်းဗဲ့ကဟေ။ ယေဝါစာ မိုးခေါင်းတုံးက ရပ်တန့်ကို အမှာစာ ဘုရားရှင်အစစ်ဖြစ်ဟေက သက်သေဆနပ်လင်ကဟေ။

Frame 19-14

ဧလိယကအလုပ်ရက်ကျီးကရပ် ဘုရားရှင်စာ ဧလိရှဲငါကို အော်ကလူဟူးဝါ ရှေ့ဖြစ်ဟောပညာရှိ အဖြစ်ရွေးချယ်ကို ဧလိရှဲယာပင် တစ်ဆင့် ထူးဆန်းအံ့ဩဖွယ်ရာရက်အင် လုပ်လင်ကဟေ။ မှအံ့ဩဖွယ်ရာ ဆုယာစာ နေမန်ငါဟေက လူဟူးဝါထဲ့ ထုတ်လင်ကဟေ။ အမှာစာ ရန်သူတပ်ရက်က စစ်ဗိုလ်မူးဟူးဝါဖြစ်ကယဲ့ အမှာကမ ဆိုးရွားဟေက အရေးပြားရောဂါဖြစ်လင်ကဟေ။ နေမန်စာ ဧလိရှဲကအကြောင်းယင် တတ်ကရပ် ဆီကုကဇိဉ် လင်ကိုအကူညီ စိန်လင်ကဟေ။ ဧလိရှဲစာ နေမန်ယင် အားယောဒန်မြို့ယာ လင်ကိုအိ(လ်)ယာ ခုနှစ်ခေါက် ပျက်ကဖန်းကဟေ။

Frame 19-15

အတတ်ကတယ်က ငါဟေက ရအူ(ဖ်)ဂျာထင်ကအကြောင်းအိမ်း နေမန်စာ ဧလိရှဲယင် တစ်ဗျင်းမန်ချေလင်ကဟေ။ အတတ်ကတယ် အလုပ်လူပါ(လ်)က ငါကိုငြင်လင်ကဟေ။ ညီငါဒင်းယဲ့ နောက်ပိုင်းယာ စိတ်ရက်ပြောင်းလဲ့ကို အမှာစာ ယောဒန်မြစ်အာ လင်ကို အိ(လ်)ယာ ခုနှစ်ခေါက်ပင်း လင်ကဟေ။ အမှာစာ နောက်ဆုံးအခေါက်ယာ အိ(လ်)ယာပင် ဖော်ကရပ် ဘုရားရှင်စာ အမှာက ကနာကြာရောဂါရက်အင် ပျောက်စဉ်လင်ကဟေ။

Frame 19-16

ဘုရားရှင်စာ ရှေ့ဖြစ်ဟောပညာရှိရက်အင် ဣသရေလယာက လူရက်ထနဲ့ဖြောင်လင်ကဟေ။ အိမ်းမှာလူစုတ်ရက်နာ လူရက်အင်ရုပ်ထုရက်အင် ကိုးကွယ်ဟေက ရပ်တန့်ကဇိဉ်ငါကို လူရက်စာ ရုပ်ထုရက်အင် ကိုးကွယ်ကအစား ဟူးဝါအိမ်းဟူးဝါမျှတမှ ဆက်ဆံကို သနားကြင်နာမူငါကဇိဉ် င့လင်ကဟေ။ လူရက်စာ အမီကလုပ်တုံးအစား ဘုရားရှင်ယင် ဆည်းကပ်ကို လိုက်နာကဇိဉ် ငါလင်ကဟေ။ လူရက်စာ အတတ်ကတယ် လိုက်နာက အာငါနဲ့ ဘုရားရှင်စာ အမှာရက်အင် အပြစ်တင်ကို ဆုံးမလင်က။

Frame 19-17

များသောအားဖြင့် လူရက်စာ ဘုရားရှင်က တူးယင်အလိုက်နာပါ(လ်)။ အမှာရက်စာ ဘုရားရှင်က ရှေ့ဖြစ်ဟောပညာရှိရက်အင် မီမှနီးတောင်ကအငါကအပြင် တစ်ခါတစ်လေ ကတိုက်ကရက် ရိ(ရ်)ဟေ။ ဟက်တဂါရပ် ယေရမိ ငါကိုအော်က ရှေ့ဖြစ်ဟောပညာရှိဟူဝါ အိ(လ်)ကြိမ်အမီးကမှာ ဝေးကိုဆီးဇိဉ်ကို အမှာစာ အိ(လ်)ကြိမ်ကအမုတ်အာ ငါဟေက ကဗုံဘင်ထဲ့ယာ မရုတ်ကလင်ကဟေ။ ညီငါဒင်းယဲ့ ဘုရင်စာ ယေရမိယင် သနားညှာတာမူးရက်ဖြစ်ကို အမှာက အငှားဆာရက်အင် အိ(လ်)ကြိမ်ဖုံးယာ တင်ကဇိဉ်လင်ကဟေ။

Frame 19-18

ရှေ့ဖြစ်ဟောပညာရှိရက်အင် လူရက်စာ အမှာရက်ကအပေါ်ယာ အပေါ်ကက်ကယဲ့ ဘုရားရှင်က ငါဟေကရက်အင် ဆက်လက်ကို ငါလင်ကဟေ။ အမှာရက်စာ လူရက်အင် နောင်တအလူနဲ့ ဘုရားရှင်စာ အမှာရက်အင် ဖျက်ဆီးယန်က ငါကိုသတိအီကို ဘုရားရှင်နာ လူရက်အင် မေရှိယ ကမှအော်လားကလင်က ငါကိုယဲ့ ပြန်ကိုကတိအီလင်ကဟေ။

ဓမ္မရာဇဝင်တတိယစောင် ၁၆-၁၈; ဓမ္မရာဇဝင်စတုတ္ထစောင် ၅; ယေရမိအနာဂတ္တိကျမ်း ၃၈