၁၇။ ဘုရားရှင်အိမ်း ဒါဝိဒ်ရက်ပီဒက်က ပဋိညာဉ်

ရှောလုနာ ဣသရေလရက်က ပထမဆုံး ဘုရင်ဖြစ်ကို လူရက်ကစိုးကက်ကအတိုင်း အဟောင်ကိ(ရ်)ကို အရုပ်အ(လ်) ကနင်းဟေ။ ရှောလုနာ ဣသရေလရက်က ပထမအုပ်ချူပ်က ဆနိန်အနန်းငှာ မီဟေကဘုရင်ဖြစ်ကယဲ့ နောက်ပိုင်းယာ ဘုရားရှင်ယင် အလိုက်နာကို စိတ်အမီးကလူဟူးဝါဖြစ်လင်ကဟေ။ မှအကြောင်းအိမ်း ဘုရားရှင်စာ အမှာကနေရာ ယက်တာဘုရင်ဖြစ်ဗားက အယောက လူဟူးဝါ် ရွေးချယ်လင်ကဟေ။

ရှောလုဘုရင်ဖြစ်ကို အယောက်ယက်တာ ကတစ်ချိန်ချိန်ယာ ဘုရင်ဖြစ်ဗာက ဒါဝိဒ်ငါကိုအော်က ဣသရေလလူမန်ဆာဟူးဝါ ဘုရားရှင်စာ ရွေးချယ်စီစဉ်လင်ကဟေ။ ဒါဝိဒ်နာ ဗက်လင်က သိုးကျောင်းသားဟူးဝါဖြစ်ကို တစ်ချိန်ယာ အဗားဖြစ်ကသိုးရက်အင် ယူကိုစောင်တုံ့ကရပ် ဗန်ကိုတိုက်ခိုက်ဟေက ခြင်္သေ့တစ်ကောင်းအိမ်း ဝက်ဝံတစ်ကောင်း ကတိုက်ဒက်ဟေ။ ဒါဝိဒ်စာ ရိုးသားဖြောင့်မတ်ကဟူးဝါဖြစ်ကို ဘုရားရှင်ယင် ယုံကြည်ကိုးကွယ်က လူဟူးဝါဖြစ်ဟေ။

ဒါဝိဒ်နာ မန်ဆာဘဝကရပ် ဂေါလျတ်ငါကို အော်က လူဘီလူးပြောင်ဟူးဝါအိမ်း တိုက်ခိုက်တက်ဟေ။ ဂေါလျတ်စာ တစ်ဗျင်းတော်က စစ်ဆာဟူးဝါဖြစ်ကို တစ်ဗျင်းသန်မာကို အဟောင်ဂ(လ်) ၉ပေကျော်ကိ(ရ်)ဟေ။ ညီငါဒင်းယဲ့ ဘုရားရှင်စာ ဣသရေလရက်အင် ကယ်တင်ကဇိဉ် ဒါဝိဒ်ယင် ဂေါလျတ်အင် ကတိုက်လူမှာကူညီလင်ကဟေ။ ကျီးကအိမ် ဒါဝိဒ်နာ ဣသရေလရက်က ရန်သူရက်အင် အောင်မြင်မူရက် လူလင်ကဟေ။ ဒါဝိဒ်နာ တစ်ဗျင်းတော်က စစ်ဆာဟူးဝါဖြစ်ကို ဣသရေလရက်က စစ်တပ်က တိုက်ပွဲဘောင်းကိုယင် ဦးဆောင်လင်ကဟေ။ လူရက်နာ အမင်ချီးကျူးလင်ကဟေ။

လူရက်စာ ဒါဝိဒ်အင် တစ်ဗျင်းချစ်ခင်ကို ရှောလုဘုရင် အနာလိုနန်း။နောက်ဆုံးယာ ရှောလုနာ ဒါဝိဒ်ယင် ကတိုက်ကဇိဉ် ကြံစည်ကို အမှာအိမ်းအမှာကစစ်ဆာရက်ကမှပင် လွှတ်မြောက်ကဇိဉ် မလိမ်းကန္တာရထဲယာ ကိုက်လင်ကဟေ။ ရှောလုဘုရင်အိမ်းအမှာကစစ်ဆာရက်စာ ဒါဝိဒ်အင် ဆုံးဟေက အယောက်ယက်တာ ရှောလုဘုရင် ဂူဆူယာကအထဲယာ ဆင်လင်ကဟေ။ အိမ်မှာဂူစာ ဒါဝိဒ်အဆေးတုံးက ဖြစ်ကို ရှောလုဘုရင်နာ အမင်အပေါ်ပါ(လ်) ဒါဝိဒ်နာ ရှောလုဘုရင်ကနား ကပ်လင်ကို ရှောလုဘုရင်က အဝတ်စ ပိုက်တာအဆိုက်ကို လာလင်ကဟေ။ ကျီးကအိမ်း ရှောလုဘုရင်စာ လိူင်ဂူထဲယာပင် ပြုကျီကရပ် အမှာကအကိုးပီက အဝတ်စ ဆနပ်ကို အော်လင်ကဟေ။ မှနည်းအိမ်း အမင်ကတိုက်ကို ဘုရင်ဖြစ်မှာကြံစည်က အရိ(ရ်)ကအကြောင်းယင် ရှောလုဘုရင် ချေလင်ကဟေ။

အချိန်ရက်ကြာကရပ် ရှောလုဘုရင်စာ တိုက်ပွဲယာဆီးလင်ကို ဒါဝိဒ်စာ ဘုရင်ဖြစ်ကာလင်ကို အမှာနာမီဟေက ဘုရင်တစ်ပါးဖြစ်ကို လူရက်စာ အမင်ချစ်ခင်လင်ကဟေ။ ဘုရားရှင်နာ ဒါဝိဒ်ဇိဉ် ကောင်းကျိူးအီကို အောင်မြင်မူရက် လုပ်အီးလင်ကဟေ။ ဒါဝိဒ်နာ တိုက်ပွဲဘောင်းကို တိုက်ကရပ် ဘုရားရှင်စာ ဣသရေလရက်က ရန်သူယင် နိ(လ်)မှ ကူညီအီလင်ကဟေ။ ဒါဝိဒ်နာ ယေရုရှလင်မြို့ယင် သိမ်းပိုက်ကို မြို့အဖြစ်သတ်မှတ်ကို အမှာကိုယ်တိုင် အုပ်ချူပ်လင်ကဟေ။ ဒါဝိဒ်နာ နှစ်လေးဆယ်ကြားမှဘုရင်ဖြစ်ကို အိမ်မှာအချိန်ယာ ဣသရေလရက် တစ်ဗျင်းအင်အားမီးကို ချမ်းသာယောယန်ကဟေ။

ဒါဝိဒ်နာ ဣသရေလလူမျိူးရက်စာ ဘုရားရှင်ယင်ကိုးကွယ်ကို ပူဇော်ကလူမှာ ဗိမန်တော် ဆူယာ ပြုကဇိဉ် စိတ်ငါကဟေ။ လူရက်စာ နှစ်ပေါင်းလေးရာခန့်ကြားမှနီး မောရှေလုပ်တက်က လက်တာက တာဂေါ်ယာ ဘုရားရှင်ယင် ကိုးကွယ်ကိုပူဇော်မူရက် လုပ်တက်ကကြောင်းဖြစ်ဟေ။

ညီငါဒင်းယဲ့ နာသန်ငါကို အော်က ရှေ့ဖြစ်ဟော ပညာရှိဟူးဝါငါလင်ကဟေ။ ဘုရားရှင်နာ အမင် ဒါဝိဒ်ကမှဖြောင်ကို “နင်စာ တိုက်ပွဲဘောင်းကို နိ(လ်)ကအကြောင်းအိမ်း ငါကအတွက် မှဗိမန်တော်ပြုကို အအီယန်ယဲ့ နင်ကအဆာမယ် ဗိမန်ပြုအီးပေါ်က ညီငါဒင်းယဲ့ ငါစာ နင်ယင်ပြောင်က ကောင်းကျိုးအီကဖြစ်ကို နင်ကနောင်လာ နောင်သားရက်စာ ငါကလူရက်ကအပေါ်ယာ ထာဝရ အုပ်ချူပ်လင်ပေါ်ကဖြစ်ဟေ။”ငါကို င့လင်ကဟေ။ ထာဝရအုပ်စိုးလူက ဒါဝိဒ်က ဟူးဝါတည်က မျိူးဆက်နာ (မေရှိယ)ဟူးဝါဖြစ်ကို (မေရှိယ) ငါကနာ ကမ္ဘာပေါ်ယာ ငါဟေကလူရက်အင် အပြစ်အာပင် ကယ်တင်ကဇိဉ် ဘုရားရှင် ရွေးချယ်ပီက ဟူးဝါဖြစ်ဟေ။

ဒါဝိဒ်နာ နာသန်က တူယင်တိုက်ကအချိန်ယာ အမှာနာ ဘုရားရှင်က ကျေးဇူးတော်ယင် ချီးမွမ်းလင်ကဟေ။ ဘုရားရှင်နာ အမင်ဂုဏ်ကျေးဇူးရက်အင် ချီးမွှမ်းကို တစ်ဗျင်းဟစ်ကို ကောင်းကျိူးအီလင်ကဟေ။ ညီငါဒင်ယဲ့ ဒါဝိဒ်နာ ဘုရားရှင်စာအဆာတက်ကအချိန်ယာ မှအကြောင်းအရာရက်အင် လုပ်အန်ကယား အချေးနိန်ပါ(လ်)။ အတတ်ကအခါ ညီရက်နာ ဣသရေလလူမျိူးရက်စာ၊ မေရှိယ အကြွမှီနှစ်တစ်ထောင်ခန့်စောင်ပေါ်က ချေလင်ကဟေ။

ဒါဝိဒ်စာ အမှာကလူမျိူးရက်အင် တရားမျှတမနီး နှစ်ပေါင်းဘောင်ကို အုပ်ချူပ်လင်ကဟေ။ အမှာနာ ဘုရားရှင်ယင် သစ္စာရှိရှိအိမ်း လိုက်နာကို ဘုရားရှင်ယဲ့ အမင်ကောင်းကျိုးအီလင်ကဟေ။ ညီငါဒင်ယဲ့ အယောက်ကနှစ်ပေါင်းဘောင်းကိုကြားကရပ် အမှာနာ ဘုရားရှင်ကအပေါ်ယာ ပြောင်ဟေက အပြစ်ရက် ကျူးလွန်လင်ကဟေ။

ယက်တာကရပ် ဒါဝိဒ်စာ အမှာကနန်းတော် အတာဟုန်းယာပင် အပြင်ယာယူတုံ့ကရပ် တစ်ဗျင်းကနင်းဟေက တာဆာလှောင်ဟူးဝါ အိ(လ်)ကူး(ဖ်)တုံ့က ပေါ်လင်ကဟေ။ အမှာနာ မှတာဆာလှောင်ဆာ အချေပါ(လ်) ။ ညီငါဒင်ယဲ့ မှတာဆာလှောင်အမိန်းနာ ဗာသရှေငါကို ချေလင်ကဟေ။

အမှာနာအယူထမ်း တုံ့ပေါ်ကအစာ လူဟူးဝါယင် မှတာဆာလှောင်ဆာ အမှာကမှာ အော်ကဇိဉ် ဖြောင်နက်ကဟေ။ အမှာစာ မှတာဆာလှောင်ဆာအိမ်းမက်တာ အိပ်ကို တာဆာလှောင် ကိန်းယာပြန်ကိုပါ(လ်)ကဟေ။ အချိန်အတိုတွင်ယာ ဗာသရှေဘစာ ဒါဝိဒ်ယင် အမှာက ကိုယ်ဝန်ငါတုံ့နန်ငါကို စာပါ(လ်) လင်ကဟေ။

ဗာသရှေဘက တာဆာပြိုင်က အမိန်းနာ ဥရိယ ဖြစ်ဟေ။ အမှာစာ ဒါဝိဒ်က တစ်ဗျင်းမီက စစ်ဆာ ဟူးဝါဖြစ်ကို အိမ်းမှာအချိန်ယာ တိုက်ပွဲဆူယာ လင်ကိုတိုက်ခိုက်တုံ့ကဖြစ်ဟေ။ ဒါဝိဒ်နာ ဥရိယအော်ကို အမှာက အအိပ်ထာအိမ် မက်တာတုံ့ကဇိဉ် င့လင်ကဟေ။ ညီငါဒင်းယဲ့ ဥရိယစာ အယောက်က စစ်ဆာရက် တိုက်ပွဲယာငါတုံးကို ကိန်းယာပြန့်ကဇိဉ် ငြင်းလင်ကဟေ။ မှအခါ ဒါဝိဒ်စာ ဥရိယယင် ကတိုက်စာဟင်းမနီး ရန်သူအင်အား ဘောင်းကိုငှာကနေရာ ဖြောင်ကဇိဉ် စစ်သူကြီးယင်ဖန်းကို ဥရိယစာ တိုက်ပွဲယာ ဆီးလင်ကဟေ။

ဥရိယ တိုက်ပွဲယာ ဆီးကျီးကရပ် ဒါဝိဒ်နာ ဗာသရှေဘ မောင်းနင်းလုပ်လင်ကဟေ။ အချိန်ရက် ကြားကရပ် ဗာသရှေဘစာ ဒါဝိဒ်က အဆာကယ်လင်ကဟေ။ ဘုရားရှင်စာ ဒါဝိဒ်ကလုပ်က အလုပ်ရက်အင် တစ်ဗျင်းမန်ချေကို အမှာနာ ရှေ့ဖြစ်ဟောပညာရှိ ဟူးဝါ နာသန်ကမှလင်ကို အမှာကအပြစ်စာ အဆာတတ်အမီးကအကြောင်းယင် င့ဆနပ်ကဇိဉ် င့လင်ကဟေ။ ဒါဝိဒ်စာ အမှာကအပြစ်ရက်အင် နောင်တလူကိုကအကြောင်းအိမ်း ဘုရားရှင်စာ အမှာကအပြစ်ရက်အင် ခွင့်လွတ်အီကို အမှာနာ ကျန်ဟေက အချိန်ယာ ခက်ခဲ့ဟေကအချိန်ယာ ဘုရားရှင်ကတူယင် စုတ်ရက်အင် လိုက်နာကဟေ။

ညီငါဒင်ယဲ့ ဒါဝိဒ်က အဆာမန်ဆာ ဆီးကလင်ကို ဘုရားရှင်စာ မှနည်းအိမ်းဒါဝိဒ်ယင် အပြစ်အီကဖြစ်ဟေ။ ကျီးကအိမ်းဒါဝိဒ်အဆီးမိန်း အမှာကမိသာစုရက် အမင်ဆန့်ကျင်ကို အမကမှာငါဟေက စွမ်းအားရက်အ(လ်) အငှာနန်း။ ညီငါဒင်းယဲ့ ဘုရာရှင်းစာ ဒါဝိဒ်က ကတိတူးယင်တည်ကို ဒါဝိဒ်ဂ(လ်) ဘုရားရှင်က တူးယင် အလိုက်နာကယဲ့ ကတိတူးအတိုင်း လုပ်အီးလင်ကဟေ။ ကျီးကအိမ်း ဒါဝိဒ်အိမ်း ဗာသရှေဘရက်ကနာ အယောက်ကအဆာဟူးဝါကယ်ကို အမင် (ရှောလမုန်)ငါကို အမိန်းအီလင်ကဟေ။

ဓမ္မရာဇဝင်ပဌမစောင် ၁၀; ၁၅-၁၉; ၂၄; ၃၁; ဓမ္မရာဇဝင်ဒုတိယစောင် ၅; ၇; ၁၁-၁၂