၄၇။ ဖိလိပ္ပိယာထုပ်တုံးက ပေါလုအိမ်းသိလ

ရှောလုစာရောမအင်ပါယာ အတွင်းယာလင်တုံ့ကရပ် အမှာကအမိန်းယင် ရောမအမိန်းဖြစ်ဟေက ပေါလုအဖြစ်ယာပြောင်းနက်ကဟေ။ ယက်တာကရပ် ပေါလုအိမ်းအမှာက အဖက်ဖြစ်ဟေက သိလရက်စာ ဖိလိပ္ပိမြို့ထဲယာဆင်ကို ကိုယ်တော်ယေရူကသတင်းမီးရက်အင် ငါ့ဆနပ်ကဇိဉ်လင်ကဟေ။ အမှာရက်စာ လူရက်အင်စုံရုံးကို ဘုရာဝတ်ပြုကို ဆုစိန်တုံးကမြို့အပြင်ယာက မြစ်ဆူယာလင်ကို အိမ်မှာနေရာက လုဒိငါကိုအော်ဟေက ကုန်သည်တာဆာလှောင်ဟူးဝါအိမ်း လင်ကိုလက်အာကဟေ။ မှတာဆာလှောင်ဆာနာ ဘုရားရှင်ယင် တဗျင်းကြည်ညိုကိုးကွယ်က လူ့ဖြစ်ဟေ။

ဘုရားရှင်စာ လုဒိယင် ကိုယ်တော်ယေရူအကြောင်းသတင်းမီးရက်အင် လက်ခံကိုလူမှလုပ်အီး လင်ကဟေ။ ပေါလုအိမ်သိလစာ တာဆာလှောင်ဆာအိမ်းအမှာကမိသာစုရက်အင် အိ(လ်)မြုပ်(လ်)မင်္ဂလာလုပ်အီးနက်ကဟေ။ တာဆာလှောင်ဆာနာ ပေါလုအိမ်းသိလယင် အမှာက ကိန်းယာတုံ့ကဇိဉ်ဖိတ်ကို မှတာဆာလှောင်ဆာက ကိန်းယာတုံးဒက်ကဟေ။

ယုဒလူမျိူးရက် ဘုရားဝတ်ပြုတုံးကနေရာယာ ပေါလုအိမ်းသိလရက်စာ ယက်တာကရ လူ့ဘောင်းကိုအိမ်းလက်တက်ကဟေ။ အမှာရက်စာ ယက်တာကရအိမ်မှာနေရာယာလင်ဟာကို လင်တိုင်းယာ အမီးကဟမန်းပူးတုံးက တာဆာလှောင်ဆာဟူးဝါနာ အမှာရက်ကအလိုယာ ရက်ပိုက်ယောဝိုင်ဟေ။ အိမ်မှာတာဆာလှောင်ဆာနာ အမီးကဟမန်းပူးတုံးကအစွမ်းအိမ်း လူရက်ကအနာဂတ်ရှေ့ဖြစ်ရက်အင် ဟော်ကိုအီက အမှာကသခင်းအတွက် တင်ဂါဘောင်းကို ဆုံးကိုအီးဟေ။

အိမ်မှာအငှားဆာ တာဆာလှောင်ဆာနာ အမှာရက်လင်းဟာတုံးကအချိန်ယာ အဆက်မပြတ်ဟော်တုံးကို “မှလူရက်စာ အမြင့်မြတ်ဆုံးဘုရားရှင်က အငှားဆာရက်ဖြစ်ဟေ။ အမှာရက်စာ နနိန်ရက်အင် ကယ်တင်ဟေကနည်းလမ်းရက်အင် ငါ့ဆနပ်တုံးကဖြစ်ဟေ။”ငါကို မှတာဆာလှောင်ဆာနာ မကြာခဏဟော်ကိုငါ့တုံးကအကြောင်းအိမ်း ပေါလုစာ စိတ်အနှောက်ယှက် ဖြစ်ယောယန်ကဟေ။

နောက်ဆုံးယက်တာယာ အိမ်မှာအငှားဆာတာဆာလှောင်ဆာ ဟော်တုံးကအချိန်ယာ ပေါ်လုစာ အမှာကမှလှည့်ကို မှတာဆာလှောင်ဆာကခန္တာကိုယ်ထဲယာ ငါဟေကအမီးကဟမန်းယင် “ကိုယ်တော်ယေရူကအမိန်းအိမ်း မှတာဆာလှောင်ဆာက ခန္တာကိုယ်ထဲယာပင်ပြုယန်”ငါကို ငါ့နက်ကအိမ်း ချက်ချင်းအမီးကဟမန်းစာ အငှားဆာတာဆာလှောင်ဆာပင် ပြုယောယန်ကဟေ။

အိမ်မှအမီးကဟမန်အ့ငါကရပ် အငှားဆာတာဆာလှောင်ဆာနာ အနာဂတ်ရက်အင် ကြိုတင်ကိုအချေးလူနန်းက အမှာရက်သတိပီတိမ်ကို အိမ်မှာအငှားဆာ ပိုင်ဆိုင်ဟေကသခင်နာ တဗျင်းမန်ချေလင်ကဟေ။ အဇာရီကအကြောင်းယားငါနဲ့ အမှာစာ အနာဂတ်အင် ကြိုတင်အချေးလူနန်းက အကြောင်းအိမ်း အမှာကသခင်ယင် တင်ဂါဆုံးကိုအအီးလူနန်းက အကြောင်းဖြစ်ဟေ။

မှအကြာင်းအိမ်း အိမ်မှာအငှားဆာ တာဆာလှောင်ဆာက ပိုင်ရှင်စာ ပေါလုအိမ်သိလရက်အင် ရောမအာဏာပိုင်ရက်ကမှ အော်လားကလင်ကို ပေါက်ကိုထောင်ထဲယာ ထည့်နက်ကဟေ။

အမှာရက်စာ ပေါလုအိမ်းသိလရက်အင် လုံခြုံးရေးဘောင်းကိုငါဟေက အချူပ်ထောင်ဖက်အာ ထည်ပီးကဟေ။ အမှာရက်အ(လ်) အမှာရက်က အတာရက်အင် ထိပ်တုံးအိမ်ဒင်း တိုင်ကိုပီကဟေ။ ညီးငါဒင်းယဲ့ နက်တိုက်ထုပ်ကရပ် ပေါလုအိမ်သိလရက်စာ ဘုရားရှင်ယင် အတေးခြင်းအိမ်း ချီးမွမ်းပူဇော်လင်ကဟေ။

ဗြန်းမနီး ပြင်းထန်ဟေက ကဇက်ငလျင်ဆူးယာဖြစ်ယောယန်ကို ထောင်အဟားရက် ဖွင့်ကလင်ကဟေ။ ထောင်ငါကလူရက်အင် တိုင်ပီးက ဆိမ်ရဖူ(ဖ်)ရက်အ(လ်) ပြုတ်ကလင်ကဟေ။

ကျီးကအိမ်း ထောင်မူးချေးကိုင်ကအချိန်ယာ ထောင်အဟားရက်ဖွင့်တုံးက ပေါ်ကိုထောင်းငါကလူရက် ကပ်ကိုပြုကလင်နန်းငါကို ထင်လင်ကဟေ။ အမှာစာ ထောင်ငါကလူရက်ကပ်ကလင်ကို ရောမအာဏာပိုင်ရက်စာ အပြစ်အီယန်ကငါကိုထင်ကို အပါနာကအပါနာ အဆုံးစီရင်ကဇိဉ်လုပ်လင်ကဟေ။ ကျီးကအိမ်း ပေါလုစာ အိမ်မှာလူယင်ပေါ်ကိ “တန့်ယင်ဒတ်။အပါနာကအပါနာ ကနာမှအလုပ်အေး ။ညီးရက်စုတ်ရက်မှငါဟေ”ငါကို ဟော်ကိုငါနက်ကဟေ။

အိမ်မှာထောင်မူးစာ ရမာ(လ်)ကိုပေါလုအိမ်းသိလကမှ ဗန်(ဖ်)ကို “ငါကယ်တင်ကဟင်းပေါ်မှ အဆာမည်လုပ်ပေါ်ကယား” ငါကို ကထာလင်ကရပ် ပေါလုနာ “အရှင်သခင်ဖြစ်ဟေက ယေရူယင် ယုံကြည်ယင့်။နင်အိမ်းနင်ကမိသားစုရက် ကယ်တင်ကဟင်းပေါ်ယန်က”ငါကို ပြန်ကိုဖြေနက်ကဟေ။ ကျီးကအိမ်း ထောင်မူးစာ ပေါလုအိမ်သိလယင် အမှာကကိန်းယာ အော်လားကလင်ကို အမှာကဒဏ်ရာ ရက်အင်ကဇမ်းကို အီလင်ကဟေ။ ပေါလုစာ ကိုယ်တော်ယေရူက သတင်းမီးရက်အင် အမှာကကိန်းယာ ငါဟေကလူရက်ဇိဉ် ငါ့ဆနပ်လင်ကဟေ။

ထောင်မူးအိမ်းအမှာက မိသားစုရက်နာ ကိုယ်တော်ယေရူယင် ယုံကြည်ကို ပေါလုအိမ်သိလရက်စာ အမှာရက်အင် အိ(လ်)မြုပ်(လ်)မင်္ဂလာလုပ်အီးလင်ကဟေ။ကျီးကအိမ်း ထောင်မူးစာ ပေါလုအိမ်းသိလယင် ဆာဇတ်ရက်အီကို မက်တာပျော်ကိုတုံးလင်ကဟေ။

အယောက်ယက်တာကရပ် မြို့ယာကခေါင်းဆောင်ရက်စာ ပေါလုအိမ်သိလရက်အင် ထောင်ယာပင် ဖြောင်ဇိဉ်ကို ဖိလိပ္ပိယာပင်လင်ဇိဉ်ကဟေ။ ပေါလုအိမ်းသိလစာ လုဒိအိမ်းအယောက်က အဖက်ရက်အင် လင်ကိုနူတ်ဆက်ကို မြို့ယာပင်ပြုယောယန်ကဟေ။ ယေရူကသတင်းမီးနာ ဆက်လက်ကို ပြန့်ပွားကလင်ကို ကိုယ်တော်ယေရူယင် ယုံကြည်ကလူရက်ပွားယောယန်ကဟေ။

ပေါလုအိမ်းယုံကြည်ကလူခေါင်းဆောင်ရက်စာ မြို့ဘောင်းကိုယင် ဆက်လက်ကိုခရီးပြု ယန်ကဟေ။အမှာရက်စာ လူတိုင်းယင် ယေရူကသတင်းမီးရက်အင် မျှဝေကိုဆနိန်ကိုအီဒက်ကဟေ။ အမှာရက်စာ ဘုရားကျောင်းယာက ငါဟေကယုံကြည်ကလူရက်အင် ဆက်လက်ကိုဆနိန်အီးကဇိဉ် အားအီကိုငါပီးဒက်ကို အချို့စားရက်စာ သမ္မာကျမ်း စာအုပ်ဖြစ်ယောယန်ကဟေ။

တမန်တော် ၁၆း၁၁-၄၀