၃၆။ အဆင်းသဏ္ဍာန်ပြောင်းလဲဟေက
ယက်တာကရပ် ကိုယ်တော်ယေရူနာ အမှာကအတပည့် ဆုံးဟူးဖြစ်ဟေက ပေတရု ၊ ယာကုပ်အိမ်း ယောဟန်ရက်အင် အော်ကိုလာလင်ကဟေ။ “ယောဟန်ငါကိုအော်ဟေက အတပည့်ဖြစ်ကလူနာ ကိုယ်တော်ယေရူယင် အိ(လ်)မြိုပ်ကိုမင်္ဂလာလုပ်အီးကလူအရိ(ရ်)ပါ(လ်)။” အမှာရက်စာ ဘုရားဆာဗားကဇိဉ် တာဂေါ်အစောက်အာ ချေလင်ကဟေ။
ကိုယ်တော်ယေရူနာ ဘုရားရှင်ထနဲ့ ဆုစိန်တုံ့ကရပ် အမှာကအမန်းယာ စမိတ်တလေ လင်းကိုရိ(ရ်)ကိုအရောင်ပြုယောယန်ကဟေ။ အမှာကအဝတ်စားရက်အ(လ်) ကမ္ဘာပေါ်ယာငါဟေက ဟူးဝါယဲ့ကလူဆာရက် အလုပ်လူကအရောင်ပြုကိုကနင်းကို အရောင်ပြုယောယန်ကဟေ။
ကျီးကအိမ်း မောရှေအိမ်းရှေ့ဖြစ်ဟောပညာရှိ ဧလိယရက်ထုတ်ဗားလင်ကဟေ။ အိမ်မှာလူရက်စာ အတတ်က ကိစ္စရက်အဖြစ်နိန်ကရပ်ပင် ကမ္ဘာကြီးယာ နှစ်ပေါင်းရာအိမ်ချီးကို ထုတ်တုံ့ကလူရက်ဖြစ်လင်ကဟေ။ အမှာရက်အိမ်း ကိုယ်တော်ယေရူစာ ယေရုရှလင်မြို့ယာ ကိုယ်တော် အကြားနန်းက ဆီးကဇိဉ် ငါကို ငါ့တုံ့လင်ကဟေ။
မောရှေအိမ်း ဧလိယရက်စာ ကိုယ်တော်ယေရူအိမ်း တူးပိ(ရ်)တုံ့ကရပ် ပေတရုစာ ကိုယ်တော်ယေရူယင် “မှနေရာစာ ညီရက်ကအတွက်တစ်ဗျင်းမီးနက်ဟေ။ညီရက်နာ ကိုယ်တော်ယေရူအပါအဝင် မောရှေအိမ်းဧလိယရက်ကအတွက် တုံ့ကဇိဉ်နန်းဆုံးဆု ပြုကဇိဉ်ခွင့်အီယန်နက်နိမ့်”ငါကို လျှောက်တင်လင်ကဟေ။ ညီးငါဒင်းယဲ့ ပေတရုစာ အမှာကအမှာ အဇာငါနက်ဟေယာ အချေနက်နန်း။
ပေတရုတူးပိ(ရ်)တုံ့ကရပ် အရောင်ပြုတုံ့ကဟင်းဂြ(ရ်)ဆူယာ ဆပ်ယောယန်ကို အမှာရက်အင် လွှမ်းခြုံနက်ကဟေ။ ကျီးကအိမ်း “အမှစာ ငါတစ်ဗျင်းချစ်ဟေက ငါကအဆာဖြစ်ကို အမှာကအတွက် ငါတစ်ဗျင်းဝမ်းသာဟေ။ အမှာကတူးယင် အတေးယင့်။”ငါကို အိမ်မှားဟင်းဂြု(ရပ်)အတာဟုန်းယာပင် တူးပိ(ရ်)ကအကြားဆူးယာ တိုက်လင်ကဟေ။ အတပည့်ဆုံးဟူးစာ တစ်ဗျင်းအစက်ကလင်ကို ကဇက်အာ ပေါင်ကာလင်ကဟေ။
ကျီးကအိမ်း ကိုယ်တော်ယေရူစာ အမှာရက်အင် အာကိုးကိုယ် “ရိပ်အင်း အစက်ယဲ့”ငါကို င့လင်ကဟေ။ အမှာရက် ရိပ်ကိုယူနက်ကရပ် ကိုယ်တော်ယေရူ ဟူးဝါတည်းမယ် ကျန်ကဟေ။
ကိုယ်တော်ယေရူအိမ်းအတပည့်ဆုံးဟူးရက်စာ တာဂေါ်ယာပင် ဆပ်ယောယန်ကဟေ။ ကျီးကအိမ်း ကိုယ်တော်ယေရူနာ အမှာရက်အင် “အတတ် မှနေရာဖြစ်ပျက်တတ်က အကြောင်းအရာရက်အင် ဟူးဝါဇိဉ်ယဲ့ အငှားယဲ့ ၊ငါစာအကြားနန်းက ဆီးယန်ကဖြစ်ကယဲ့ အဆက်ပြန်ကိုဆိမ်းယန်က။ အိမ်မှာအချိန်ယာမယ် လူရက်အင် နနိန်ရက်ငှားဆနပ်အင်း။”ငါကို ငါနက်ကဟေ။
မဿဲ ၁၇◌း၁-၉; မာကု ၉း၂-၈; လုကာ ၉း၂၈-၃၆