2. Zambi caalamadde orobe

Adam kee kaa numa Yalli akah abe carha mece jardiinidde xedeneenih maraa yinin. Tenko sara inketti akko hashshiitak miyine, amayim laakin caalamalle zambi miyinemhi sabbatah ten mixoolayshinna. Wuliili gedda lel jardiinidde gerhak Yallaalih waanishaa yinin.

Amaa jardiinidde laakin wuli xikma le caroora tine. Amaa caroora lel numak: "Rummah Yalli ta jardiinidde yane xorhko walaa inkettat daro mibeetina sinak yerhxe?" teh tee esserte.

Amaa numa lel: "'Yalli umaani kee mecaanit irhgahi xarhaako bextih farhinnan xarhaako daro benno dhicnam noh warishe. Yalli 'amaa daro betteenimko hido dhagteenimko, rabtoona kitin' nokyerhxe" teh alle deheyte.

Amaa caroora amaa numak: "Amayim rumma maki! Rabtoona lel maki. Yalli laakin atin amaa darooko dhag-ishshan geddaakoh Yallah timmingidiinih umaani kee mecaani Kayya balih taarhagoona kitiinim yaarhigeh (kinni amah sinak yerhxem)" teh alle deheyte.

Amaa numa ta daro carha mecem kinam kee basak-tarhxem kinam tuble. Maarhaga takko gantah fadhdhemhi sabbatah amaa darooko dagum beyteh bette. Amaymik sarrah, amaa teelih yine ishi baclah gantah akko toxoyeh, usuk yakkeedo beete.

Gar-heeko lel ten intit fakkiteh casiinih yiniinim yeerhegin. Sara akkaboona lel darhaa sittiyadde yoorofiinih lel sinni rooxe agoogishoona yicikkinin.

Amaymik sarrah amaa labhatto kee kaa numa Yallih andhax jardiinidde tillaabak yoobbin. Inkoh lel Yallaako sucuten. Yalli labhattoh akah deecimeh: "Awla tanito?" akyerhxe. Adam lel: "Garabadde ku arco oobbe gedda, casiinih aniyomhi sabbatah mashshiite. Amaa gedda lel sucute" yeh alle deheye.

Yalli lel: "Cassinih tinitom miyatti koh warishe? Mibeetin kokko erhxe daro betteho?" yeh kaa essere. Labhatti lel: "Atu ta numa yoh toxoye, ishi lel amaa daro yoh toxoye" yeh alle deheye. Yalli lel numa: "Ayim kinni abtem?" yeh tee essere. Amaa numa lel: "Caroora yi doolabte" teh alle deheyte.

Yalli caroorak: "Abaarimteh tanito! Garbah gototimteh buure betto kito. Amaa numa kee koyya sittiya tancaboona kitin, ku cindham kee tee cindham gantah sittiya yancaboona kinon. Amaa numaako radati ku amo yaxarmacho kinni, atu lel kaa sune akko tacammajo kito" akyerhxe.

Amaa numak lel Yalli: "Anu umlaalo kolle aysaraw kiyo. Atu ishi bacla fadhdho kito, ku bacli lel ku amolle yaxkamo kinni" akyerhxe.

Yalli amaa labhattok: "Ishi numa toobbeh yi farhi akkinnixem abte. Kado lel baarho abaarimteh tane, atu ishi folo carrishitto ciloh mangum tashtaqhalo kito. Amaymik sarrah rabta gedda, ku nabsi buurelle yanqayyaro kinni. Amaa labhatti ishi numak 'Xaawa' akko yerhxe. Ishe umbuka xiyawhi ina takko kinamhi sabbatah 'aniina-taxaye' yarhxiinim kinni. Yalli lel Adam kee Xaawa bahayimti qarbatah ten sarishe.

Amaymik sarrah Yalli: "Kado xiyaw umaani kee mecaani yeerhegiinih nottah yimmingidiinih yanin. Umman gedih maraanamko lel aniinat xarhahi daro beetoona izne geyoona alle mitane" yerhxe. Amaymih Yalli, Adam kee Xaawa carha mece jardiinko asac ten ishe. Akkinnan mari orobeenih amaa aniinat xarhahi daro beetaanamko lel Yalli quwwa le malaykut amaa jardiin carafalle wardiyah akko haye.

Quddus kin Kitaabhi zanta: Erhedhdho, curfa 3