5. Wacdi barha

Saaray kee Abram Kancaanalle yemeetiinimko tamana iggidaaako bukalle sugen hanik, kaddih cindhawka mibaahinnooni. Amaymih Abram numa Saaray: "Yalli lee dhalaa yoh axaye wayek sarrah, anu lee dhalaa aallemko barah mangum nabatiya ekkek sarrah, taykinna yi khaddaamit, Hagaar. Cindham yoh bahtooki tee marcishit" akterhxe.

Amaymik sarrah, Abram Hagaar marcishite. Hagaar barha bahte, Abram lel Ishmaacil akyerhxe. Saaray laakin Hagaarlih ashshinte. Ishmaacil adooxankee taman iggidiya gufe gedda, Yalli Abramlih malammih aalih waanishe.

Yalli: "Anu Nabamko Naba Yalla kiyo. Cahde koolih abo kiyo" akyerhxe. Amaymik sarrah, Abram baarhodde kume. Yalli lel Abramak: "Atu mango diikah abba takko kito. Koo kee ku zurriyah Kancaan baarho tabbaxatoona sinah axaw kiyo, anu lel umman geedit ten Yalla akko kiyo. Ishi xawazadde lel labeetoh anniinnan marah inkoh askok kalum akah abto kolle tane"

"Saaray ku numa, barha bahto kinni, usuk lel wacdi barha yakko kinni. Isxaaq akko erhex. Anu inni cahde kaalih abo kinni, usuk lel naba dik yakko kinni. Ishmaacilik yakkeedo naba dik akko abo kiyo. Yi cahdi laakin Isxaaqlih yakko kinni" akyerhxe. Amaymik sarrah, Yalli Abram migac 'Abraahim'-ille yiybiddile. Abraahim yaanam lel 'mango marih abba' yaanam kinni. Saaray migac lel 'Saara' -lle yiybiddile, Saara yaanam lel 'nigisti' yaanam kinni.

Abraahim amaa lellecidde ishi xawazhi labeetoh inkoh askok kalum akah abe. Amayimko iggidi max, Abraahim 100 iggidiya abeh, Saara lel 90 iggidiya abte gedda, Saaray barha bahte. Tamaa Yalli abanta akah tenak yerhxeekah lel Isxaaq akyen.

Isxaaq wuli burgudda yekke gedda, Yalli Abraahimik: "Isxaaq beyteyaako, amaa inkettak lito barha, yi sadaqhah kaa urxud" akyerhxeyaako kaa imaan yeqheese. Kado yakkeedo Abraahim Yalla yoobbeyaako, ishi barha yasaddaqho yinqirribe.

Abraahim kee Isxaaq amaa sadaqhat makaanolle adiik, Isxaaq: "Abba! Sadaqhah takke boxo lino, ciidotti laakin awla yane" yeh kaa essere. Abraahim: "Yi barha, Yalli isheh sadaqhah yakke ciidotta noh yaxaw kinni" yeh alle deheye.

Amaa sadaqhat makaano gufen gedda, Abraahim Isxaaq ishi barha yurhuweyaako sadaqhat makaanolle carhah kaa haye. Usuk ishi barha yasaddaqho kab-yerhxe gedda: "Daw-erhex! Cindhooka maacammajin! Busah lito barha yok misuumutitomhi sabbatah yok mashshittam kaado eerhege" akyerhxe.

Abraahim ishi agaagalle wuli xorhudde yindhibbirhe maruu yuble. Yalla kinni Isxaaq yamsiddiqhemko maruu bahteh tinem. Abraahim lel kixinik amaa maruu sadaqhatah yisiddiqhe.

Amaymik sarrah Yalli Abraahimik: "Inkettak lito barha akxabekkah ummanim yoh taxayemhi farhi abittemhi sabbatah, kodde abaarako wacde koh saa. Ku zurriya carananlle yane xutukko yammangoona kinon. Yi toobbeh tanitomhi sabbatah lel umbuka caalamti diika ku dik hi araxah yambaarakoona kinon" akyerhxe.

Quddus kin Kitaabhi zanta: Erhedhdho, curfa 16-22