12. Muuca
Israa-eel xiyaw Masriiko yadawna mangum xedeneenit kii yinin. Garuuza yakkiinim racteh, amaa Wacdi Baarho fanah adii yinin! Masri xiyaw lel Israa-eel xiyawah farh-isheenim dahab, burur kee aki limolem akah yoxoyin. Wuli aki diikah xiyawko gari Yallah yeemeniinih, Israa-eel xiyaw Masriiko tenlih yedeyin.
Yalli, lellec lee wuli dherh camidda kin darur, bar lee wuli dherh camidda kin giralle yambiddileyalle ten santishe. Yalli ummangedda ten santisheyaako isheh aalih yedee. Usun aboona alle tinem lel Kayya kataanam bisa kii yine.
Dago waqhtek sarrah, Fircawun kee kaa xiyaw sinni xasaab yisqiyyiriiniyaako Israa-eel xiyaw malammih ten garuuza yakkoona farhen. Usuk isheh Rummaahit inki Yalla kinam xiyaw yabloona kee Yahweh Fircawun kee kaa yallitko nabam yaarhagoona ciloh Yalli Fircawun afcaado yiytirire.
Amaymih, Fircawun kee kaa maxaarho malammih sinni garuuza akko abitoona yeyrereddin. Israa-eel xiyaw Masriiti maxaarhi amiiti yublin gedda, Fircawun caskar kee Casa Bad hi fanadde yinqirqiriinim yeerhegin. Mangum mashshiiteenih lel: "Masri aymih xabne? Inkoh rabno kino!" yerhxiinih zeeren.
Moosa Israa-eel xiyawuk: "Mashshiitaanam xabanta! Kaafa Yalli sinah dhibbayeh sin gargeero kinni" ake. Amaymik sarrah yalli Moosak: "Ta xiyawah Casa Bad hi gabolle yadawna akah warish" ake.
Amaymik sarrah Yalli amaa Masri xiyaw Israa-eel xiyaw yabliinimko ciloh amaa camiddi darurta fanadde akko haye.
Yalli Moosak Casa Bad hi bukalle gaba xaf-isheh laye barhisho akah warishe. Amaymik sarrah Yalli, amaa badadde arax adde yawco ciloh xaaxatti amaa badti laye gura kee mizgalle akah dufuwaakah akko abe.
Israa-eel xiyaw layet qaana lamma gabo akko tane kafin baarholle yeecetiinih badti addaako yedeyin.
Amaymik sarrah Yalli amaa Masri xiyaw Israa-eel xiyaw kudak yabloona ciloh amaa darurta aganalle xaf-ishe. Masri xiyaw lel ten sarradde yardoona abayshen.
Sarrah usun Israa-eel xiyawadde amaa araxko adde katayen, Yalli laakin Masri xiyaw birriigeenih ten karrossas akah yandhibbirheekah akko abe. "Kuda! Yalli Israa-eel xiyawah amxeerebii yane!" yerhxiinih zeeren.
Israa-eel xiyaw inkoh nagaadde badko amaa carhi wasanalle tabeenik sarrah, Yalli Moosah malammih gaba yayfaddago akah warishe. Usuk amayim abe gedda, amaa laye Masri xiyaw maxaarholle raddeyaako tamaa ishi awwalaahit caralle gaxte. Masri xiyaw maxaarhi lel inkoh yumundhucin.
Israa-eel xiyaw Masri xiyaw rabeenim yublin gedda, Yallah yeemeniinih Moosa Yallih nabii kii yinem yeemenin.
Yalli rabi kee garuuzinnaako ten gargeerem hi sabbatah Israa-eel xiyaw mango xedenih xedenen. Israa-eel xiyaw Masri xiyaw maxaarhooko ten gargeeremhi sabbatah sinni cusub xuriya simbilishoona Yallih faylah mango margaddiinon margadishen.
Masri xiyaw bukalle nasre akah yoxoyeyaako garuuzinnaako ten yeyyeecem yazzakkaroona ciloh, Yalli Israa-eel xiyaw Faasiga iggida-iggidah simbilishoona ten yeemere. Usun lel kaamil kin ciidotta yurxudiiniyaako qichchaalih beetenih simbilishen.
Quddus kin Kitaabhi zanta: Muuca 12:33-15:21