40. Yeesus takarime
Amaa caskar Yeesusulle tsaggaroweenik sarrah, kaa takaroona kaa beyen. Tamaa akrabo le masqal lel kaa yushshuqhucin.
Amaa caskar Yeesus wuli karhkadhdhe akyarhxinille kaa baaheenih lakuk kee gabubuh masqalak kaa yisimmirin. Yeesus laakin: "Abba, usun abaa yaniinim miyaarhigiiniiki alle xab" yerhxe. Pilaatos lel: "Yahuud Nugus" yarhxe kutuub wuli luxulle yuktubiinih amaa masqalko Yeesus amoh bukalle hayoona ten yeemere.
Amaa caskar Yeesus saralle qumaarah alle digiren. Tayim aben gedda lel amaa: "Yi natsala sinni fanadde xazziiliteenih yi saralle qumaarah alle digiren" terhxeh tunkuttubeh tinem yiskimilin.
Yeesus wuli lamma garceenih fanadde takarimeh yine. Tenko wuliti Yeesusulle tsaggarowe gedda wuliti: "Atu Yallih mashshi malito? Nanu cagab-wannun kino, ta xiyawti laakin cagab-male kinni" yerhxe. Usuk sarrah Yeesusuk: "Ku beezza ishi nigsinnadde yizzikkir" ake. Yeesus lel: "Kaafa, Jannadde yoolih takko kito" yeh alle deheye.
Amaa Yahuud naba mara kee amaa tekette xiyaw Yeesusulle alle tsaggarowen. "Yalli Barha tekkemko, tamaa masqalko obaaki ishe garger! Sarrah nanu lel ku naamano kino" yerhxin.
Sarrah lellecti abrha kii tine hanik, umbuka amaa manthiqhah bukalle yine caran dite yekke. Lellecti abrhah dite tekkeyaako amaa dite adooxa saaca sugte.
Sarrah Yeesus wac-yerhxeyaako: "Bakitte! Abba inni ufaye ku gabadde haak aniyo" yerhxe. Sarrah amo guballe cunuunuseyaako ofa akko tewce. Usuk rabe gedda, naba kirdidimo tekkeyaako Maqhdas Caredde amaa xiyaw kee Yallih aniina barhishak yine goleeni aganaako guba fanah candhiirheh lammalle xazziime.
Yeesus ishi rabih abeyaako xiyaw Yallalle yamaatoona arax fake. Amaa Yeesus dhawrhak yine caskarti tamaa tekkem yuble gedda: "Rummah ta xiyawti cagab-male kii yine. Usuk Yallih Barha kii yine" yerhxe.
Sarrah, Yoosuf kee Nikodeemos, wuli lamma Yahuuddi Yeesus Masiix kinam teemeneya, Yeesus rashsha akah yaxawo Pilaaatos esseren. Kaa rashsha wuli saradde agoogisheenih wuli qooqhaxadde faraacime qabredde kaa hayen. Wuli galaalacin dhaa baaheenih lel afadde akko alifen.
Quddus kin Kitaabhi zanta: Maatiyos 27:27-61; Markos 15:16-47; Luukas 23:26-56; Yohannis 23:26-56; Yohannis 19:17-42