47. Pawlos kee Silaas Filippoyalle

Shaa-uul umbuka Roomaati Doolalle kalaaxak, Roomaati xiyawhi migac "Pawlos" yetneefece. Wuli max Pawlos kee kaa zoobatto kin Silaas Filippiiti katamalle yemeetiinih Yeesus zacabah bissiraata warroyshen. Wuli xiyaw takatteh alle yassilliin kataamaako irolle kin nahaar afhi makaanolle yemeetin. Amalle wuli taybicshire numa, Liidiya akyarhxiniya geyen. Tikxineh lel Yallah tucbude.

Yalli Liidiya Yeesus fartoh taamano afcaado akah faakeyaako, ishe kee ishi dikih inkoh yinthimmiqhin. Pawlos kee Silaas tee carelle defeyoona ten ticzimeyaako, usun tee diklih defeyen.

Pawlos kee Silaas mangih amaa xiyawlih salaat makaanolle geytimaa yinin. Maaxi yamaato usun amalle adiik, wuli timjinnine garuzzo kin barhä adde katattayte. Ta jinnetti araxah lel xiyawah faala ciddayaato takko lem akah warishshah tamaa tee wannunuh mango solaadi akah tesketteh tine.

Amaa garuzzo kin barhä usun adiik sarradde akko zerteh: "Ta mari Nabamko Naba Yallih khaddamte kinon. Atin akah gargeerimtaanaakah kinni sinah warishak yaniinim" terhxe. Tayim lel Pawlos gantah gurrassandah maaxi yamaato abte.

Abayshimalle, wuli max amaa garuzzo kin barhä zerto erherhishshe gedda, Pawlos teyadde yufkuneyaako amaa teyadde yine jinnettak: "Yeesus migacalle, teeko ewec" ake. Akkanih lel amaa jinnetti tee xabe.

Tamaa tee wannun lel mangum kurrayen! Amaa jinnetta hinnim amaa barhä takko lem xiyawah warishsho mirhictam yeerhegin. Tayim lel amaa xiyaw tee wannunuh ishe tenalle takko lem akah warishsho, solaadi akah yaxawna maki macnah kinni.

Amaa gedda, amaa garuzzo kin barhähi wannun Pawlos kee Silaas yibbirhiinih Roomaati mas-uuliinhi gabadde ten hayen. Usun lel ten yootokiinih xabshedde ten ciden.

Usun Pawlos kee Silaas sirii ginah dhawrhuma xabshedde ten haynih ibaako gantah ten yurhuyin. Usun lel barti abrhah Yallih fayla qannishaa yinin.

Gar-heeko lel amalle dhacuma kirdidimo tekke! Umbuka xabshi caraf fakkiteyaako, umbuka maxaabush katiinan lel fakkiteh baarholle rade.

Amaa xabshi dhawrheeni ugute gedda, amaa xabshi caraf fakkiteh yubleyaako, mangum birriige! Umbuka maxaabuush kudeenim yekkeleh ishe yagdafo yixiggire. (Maxaabuush dhirhiyemko Roomaati mas-uuliin kaa yagdafoona loonim aarhigii yine.) Pawlos lel kaa yubleh: "Daw-erhex! Ishi maacammajin. Nanu inkoh tadde nanino" ake.

Amaa xabshi dhawrheeni, Pawlos kee Silaasalle qathqath-arhxik yemeeteyaako: "Gargeerimo ayim abo yolle tane?" yeh ten essere. Pawlos: "Yeesusuh imin, Maddarah, koo kee ku xawaz lel gargeerimtoona kitin" yeh eldeheye. Sarrah amaa xabshi dhawrheeni Pawlos kee Silaas ishi careh ten beyeyaako ten biyok akah cakalishe. Pawlos lel kaa caredde ummantiyah Yeesus zacabah bissiraata warroyshen.

Amaa xabshi dhawrheena kee kaa xawaz Yeesusuh yeemeniinih yinthimmiqhin. Sarrah amaa xabshi dhawrheeni Pawlos kee Silaasah folo akah yoxoyeh inkidde xedenen.

Malammit max amaa mas-uuliin Pawlos kee Silaas xabsheeko ten yeyyeeciinih Filippoyko yadawna akah warishen. Pawlos kee Silaas Liidiya kee aki ten kaxantoolit gufeenih amaa katamaako yedeyin. Bissiraata Yeesus zacabah dhuguuguluh faax-yerhxeyaako, kaniisa anabi tenebe.

Pawlos kee aki Kishtan naba mari Yeesus zacabah bissiraata warroyshak mango diikalle kallaaxen. Amaa kaniisadde yaamine mara aydukumusoona kee yaydarasoona lel mango jawawub yuktubin. Ta jawawubko gari Quddus kin Kitaabadde kitob yekke.

Quddus kin Kitaabhi zanta: Fartottit hi Abittot 16:11-40