13. Yallih cahde Israa-eellih
Yalli Israa-eel xiyaw Casa Badko ten yeyyeecek sarrah, saxraako Siina akyan kooma fanah ten beye. Ta kooma lel amaa Moosa xarara garab alle yuble kooma kii tine. Amaa xiyaw lel amaa koomah rigidille tendad yittikilin.
Yalli Moosa kee Israa-eel xiyawak: "Atin yoh tim-izziziinih yi cahde dhawudhdheenimko anu makkole yi buxta, qashshitti nigsinna kee quddus kin wathan takkoona kitin" akye.
Adooxa lellecik sarrah amaa xiyaw sinni ufayko yinqirribiinik sarrah, Yalli angud, xankarha, tika kee wac-tarhxe machambraalih Siinaati koomah bukak oobe. Amaa koomah bukakke tawco fiqhaad geytem Moosa bisa kii yine.
Yalli lel: "Anu Yahweh, sin Yalla, Masriiti garuuzinnaako sin gargeereya kiyo. Aki yallitih macbadina" yeh cahde akah yoxoye.
"Anu, Yahweh, Anu ashshiina Yalla kiyomhi sabbatah, asnaam maabina, akah lel macbadina. Yi migac xishma hin xibarah maaqhacina. Sambatak lel quddus akko abanta. Wuli ginah lel inkoh sinni ciyyi lixa lellecidde abitteenih, malxinya lellec atin adde tacrufiinih yoyya adde tazzikkirin lellec kinni"
"Sinni ina kee sinni abba xishmatanta. Magdafina. Maznayna. Migarciitina. Mizirabbitina. Sinni xuggattih numa, kaa care, hido lel inkoh kaayim akkinnannim sinneh miduumutina"
Amaymik sarrah Yalli, ta Tamana Amre wuli lamma luxulle yuktubeh Moosalle yoxoye. Yalli, aki mango sercat kee amrit yakkeedo katattawna yoxoye. Xiyaw ta sercat yoobbiinimko, Yalli adde yebeerekeh ten dhawrho kinamah wacde akah saye. Aabbe waynimko laakin tan yaqtsaco kii yine.
Yalli Israa-eel xiyaw aboona akko farhe tendah sharxe yakkeedo tiya-tiyah akah warishe. Rakhbi Tenda akkay yinin, naba goloh barhsime lamma care lel lii tine. Yalli amaa goleenaako wuli gaza marak yinemhi sabbatah, amadde tantabo fiqhaad lii tinem naba qashshe bisa kii yine.
Yallih sercat cidinnanti amaa Rakhbi Tendah nifille yine mazbaxalle Yallih sadaqha yakko sacatto baahak yine. Qashshi amaa sacatto yarxudeh lel amaa mazbaxalle solaa yine. Amaa yimsiddiqhe sacattohi biili amaa xiyawtih zambe alifayaako amaa xiyawti Yallih nifidde yimsiffiyetiya akkii yine. Yalli Ahaaroon sacal kee Ahaaroonko raddam Kaa qashshit yakkona ten doore.
Inkoh amaa xiyaw Yalli akah yoxoye sercat yoobbiniyaako inki Yallah yacbadoona kee barhsimte Kaa xiyaw yakkoona gaba beeten. Yalla yaabboona wacde saynimko dago waqhtek sarrah sirii ginah zambedde sayen.
Moosa Yallaalih waanishak Siinaati koomah bukakke mango lellec suge. Usuk gaxo lel xiyaw kaa ilaladde kafte. Amaymih lel, usun zirabti yalla akah abo yeenih Ahaaroonulle dahab baahen!
Ahaaroon lel rugi misleh dahab asnaam akah abe. Amaa xiyaw asnaam yacbadoona kee sadaqha akah aboona erherhishen! Yalli lel ten zambih sabbatah mangum kurrayeyaako ten yaylawo yixiggire. Moosa dhaaco akah abemhi sabbatah laakin Yalli kaa dhaaco yoobbeh ten maylayinna.
Moosa amaa koomaako oobeh amaa asnaam yuble gedda, mangum kurrayeh amaa Yalli Tamana Amre alle yuktubeh yine luxukke dhaytih yootoke.
Amaymik sarrah, Moosa amaa asnaamak doron akko abeyaako, wuli layedde xarheh yaacaboona amaa xiyawah yoxoye. Yalli amaa xiyawalle bala alle oobisheh mango mari akko raben.
Moosa amaa yigdileh yine Tamana Amre yasqayyaro dhayitko cusub lux akah siraaxe. Sarrah amaa malammih amaa koomakke yewceh Yalli amaa xiyaw yasaamaxo dhaaco abe. Yalli Moosa yoobbeyaako amaa xiyaw yeseemexe. Moosa amaa Tamana Amri cusub luuxalle yineya yibbirheh amaa koomaako oobe. Sarrah Yalli Israa-eel xiyaw amaa Siinaati koomaako amulalle Wacdi Baarhoh gabolle ten beye.
Quddus kin Kitaabhi zanta: Muuca 19-34