48. Yeesus wacdi Masiix kinni

Yalli baarho yukhluqhe gedda, ummannim naqhuus hinam kii tine. Zambi miyine. Adam kee Xaawa sitta kixinii yinin, Yalla lel kixinii yinin. Laxuu yakko rabi mitine. Yalli lel ta baarho tagina takko kinni farheh yinem.

Sheethan Xaawa doolabo ciloh caroorah yimmingideh eelih waanishe. Sarrah Adam kee Xaawa zambedde sayen. Usun zambe abeenimhi sabbatah baarholle ummanti laxuute ummanti lel rabe.

Adam kee Xaawa zambe abeenimhi sabbatah, amayimko ziyaada umam tekke. Usun Yallahi cangit yekkin. Amayidhdhah, amaa maxko taahe ummanti makhaaliqhoh zambeelih yaabuke. Yallih cange yakkeedo yekke. Xiyaw kee Yallih zamoodinni lel zambi sabbatah yiggirice. Yalli laakin amaa zamoodinno yadabbo xagara lii yine.

Yalli Xaawat zurriyaako wuliti amaa Sheethan amo yaxarmacho kinam kee Sheethan ishi sune yacammajo kinamah wacde saye. Tayim lel Sheethan Masiix yagdafo, Yalli lel Masiix malammih aniinalle kaa uguseh, Masiix umman gedih amaa Sheethan xayla yaxarmacho yaanam kinni. Mango iggiditik sarrah lel Yalli Yeesus Masiix kinam caddoyshe.

Yalli umbuka baarho weecah yeylee gedda, kayyah aamini yine mara gargeero jalba akah yoxoye. Amayim balih lel ummanti zambi sabbatah yalaw akah eedda hanik, Yalli inkoh kayyah yaamine mara gargeero ciloh Yeesus yoxoye.

Tenah eedda meqhtsacti amaa xiyaw yayballawna, boolaat iggidiya qashshit Yallah sadaqha abaa yinin. Amaa sadaqha laakin ten zambe beyto mirhiicinna. Yeesus Naba Qashshe kinni. Usuk aki qashshit balih akkekkah, umbuka caalamti xiyawhi zambe beyo ciloh ishi nabse yisiddiqhe. Yeesus ummanti abeh yine zambehi meqtsacti ishelle hayemhi sabbatah naqhuus hin naba qashshe kii yine.

Yalli Abraahimik: "Umbuka baarhot kishosh hi xiyaw ku araxah yambaarakoona kinon" ake. Yeesus Abraahim zurriya kii yine. Yeesusuh aamininnanti zambeeko gargeerimeh tislixe Abraahim zurriya yekkemhi sabbatah umbuka kishosh hi xiyaw kaa araxah yembeerekiinih yanin.

Yalli Abraahimih ishi barha, Isxaaq, sadaqhah yaxaw akah warishe gedda, kaa barha kin Isxaaq idhdhah, Yalli sadaqhatah ciidotta yoxoye. Nanu ninni inkoh zambeh rabi noh missila. Yalli laakin, Yeesus, Yallih Ciidotta, niidhdhadde rabo sadaqhah yoxoye.

Yalli Masrille sarroorimat bala dhirhiye gedda, inkoh Israa-eel xiyawak naqhuus hin ciidotta yurxudiinih kaa biilo sinni dorkokitko guba kee aganaako alle hayoona akah warishe. Yalli amaa biilo yuble gedda, ten riishosh akko agdifekkah ten careeko akko tillaabe. Taymik lel Faasiga akyan.

Yeesus ni Faasigahi Ciidotta kinni. Usuk naqhuus male kee zambe male yekkeyaako, Faasigaati cid hi waqhtedde lel kaa yigdifin. Akkinnanti Yeesusuh yaamine gedda, Yeesus biili kaa zambe akah yakfileyaako, amaa xiyawtoh Yallih maqhtsacti aganaako akah tillabta.

Yalli amaa doorimte kaa xiyaw kin Israa-eel xiyawlih cahde abeh yine. Kado laakin Yalli ummantiyah yakke Cusub Cahde abeh yane. Ta Cusub Cahdih sabbatah lel akkinnanti farhinnan kishohi xiyawko yekkeh, Yeesusuh yeemeneh Yallih xiyawhi zoobatto yakko dhiica.

Moosa Yallih waani warroyshe naba nabii kii yine. Yeesus laakin ummanimko naba kinni. Usuk Yalla kinni. Inkoh usuk yerhxeh abem lel Yallih abitto kee waani kii yine. Amaymih kinni lel Yeesusuk 'Yallih Waanitta' akyarhxiinim.

Yalli Nugus Dawuduh, kaa zurriyaako wuliti Yallih xiyawah umman gedda nugus akah yakko kinam wacde akah sayeh yine. Yeesus Yallih Barha kee Masiix kinamhi sabbatah, usuk umman geddah yaxkamo dhiica barhsime Dawud zurriya kinni.

Dawud Israa-eel nugus kii yine, Yeesus laakin umbuka udduuniyat nugus kinni! Usuk ishi nigsinnalle cadle kee salaamah umman gedda yaxkamo malammih yamaato kinni.

Quddus kin Kitaabhi zanta: Erhedhdho 1-3, 6, 14, 22; Muuca 12, 20; 2 Shemuu-eel 7; Cibraan 3:1-6, 4:14-5:10, 7:1-8:13, 9:11-10:18; Waxye 21