33. Xarastaa zanta

Wuli max, Yeesus mango xiyaw wuli igil afalle aydurusik yine. Yeesus yaabboona mango mari yemeetiinimhi sabbatah, tenlih akko waanisha cara geyo ciloh lel jalbadde koreyaako igil wasanakke gaxe. Jalabadde defeyeh lel amaa xiyaw yuyduruse.

Yeesus ta zanta akah warishe: "Wuli xarastaa ilaw yazraw yedee. Amaa zara gabah azriik, amaa zaraako gari araxadde radeyaako kimbir yemeeteh amaa zara inkoh beete."

"Amaa zaraako gari lel fire buure alle dago dhayitidde rade. Amaa dhayitle baarholle rade zari dheh yubqulehaaki, rimiida meceetih buuredde guballe dhirhiyo mirhiicinna. Ayro temeeteh lacte gedda lel amaa buqhli caamuuleyaako xarare."

"Amaa zaraako wulim lel keenan-le xorhudde rade. Amaa zari carsimo erherhishehaaki keenan kaa yisniqhe. Amaa keenanle baarhodde yubqule zari lel walaa inki fire baaho mirhiicinna."

"Amaa zaraako gari mece buuredde rade. Ta zari lel 30, 60, inkinnah 100 waqhtiya amaa yimzirriyeh yine zaraako ziyaada sasane. Cokka leti yaabboo!"

Amaa darasa ta zanta ten teylelekke. Amaa gedda Yeesus taginah yishrixe: "Amaa zari Yallih waani kinni. Amaa arax lel Yallih waani yaabbe xiyawto kinnihaaki miyafhime, ibliis lel amaa waani akko beya.

Amaa dhayitle baarho Yallih waani yaabbeh xedenlih kabbata xiyawto kinni. Nabra alle tasriye gedda, hido yamcizzibe gedda lel xabbishita.

Amaa keenanle baarho Yallih waani yaabbeh, waqhti adiik yadiye gedda, maxada, gadda kee raaxale nabra Yallahi kaa kaxano kafishsha. Abayshimalle lel tamaa usuk yaabbe darsi fire mibaaha.

Tamaa mece buure laakin Yallih waani yaabbeh, yaamineh fire baaha xiyawto kinni."

Quddus kin Kitaabhi zanta: Maatiyos 13:1-8, 18-23; Markos 4:1-8, 13-20; Luukas 8:4-15