22. Yohannis ubka

Basoh, Yalli ishi xiyawlih ishi malaykut kee nobowah abeh aalih zidhdhiimeh yine. Sarrah laakin ten zidhdhiimekkah 400 iggidiya takkem suge. Gar-heeko lel wuli malaykatti Yallih fartoolih Zakariyya akyarhxin baarra kin qashshelle yemeete. Zakariyya kee kaa numa kin Elsaabeeth yallih xiyaw kii yininhaaki ishi dhalaa lii mitine.

Amaa malaykatti Zakariyyak: "Ku numa barha bahto kinni. Yohannis lel aktarhxo kito. Usuk Quddus kin Ufayeh yammaago kinni. Masiixih lel arax yasqarrabo kinni!" akyerhxe. Zakariyya: "Yoo kee yi numa cindham bahnamko mangum baarroyneh nane! Tayim takko kinam lel aaginah aarhago kinni?" yeh alle deheye.

Amaa malaykatti Zakariyyak: "Ta mece ware koh baaho yi fartem Yalla kinni. Yi maamanitomhi sabbatah lel amaa ayci yaabukendah waanishsho dhicto makito" ake. Akkanih lel Zakariyya waani taane. Amaymik sarrah amaa malaykatti Zakariyya xabeh yedee. Toyek sarrah, Zakariyya careh gaxe, kaa numa lel soonowa tekke.

Elsaabeeth lix alsih soonowa tekke gedda, amaa awwal malaykatti Elsaabeeth ahlentö kin Maryamalle yemeete. Ishi barhäk tine, Yoosuf akyan labhattodde marcishimto lel timliisheh tine. Amaa malaykatti: "Atu soonowa takko kito, barha lel bahto kito. Yeesus lel migacah akah tayyaaco kito. Usuk Nabamko Naba Yallih Barha yakko kinni. Umman gedda lel reezo kinni" akye.

Maryam: "Anu barhäk aniyuk tayim aaginah takko dhicta?" teh alle deheyte. Amaa malaykatti: "Quddus kin Ufay kolle yemeeteyaako Yalli xayli ku silaalisho kinni. Amaymih lel amaa ayci Yallih Barha kin quddus yakko kinni" yeh akah caddoyshe. Maryam lel teemeneyaako amaa malaykatti akko yerhxem kabbatte.

Amaymi sarrah akkanih amaa malaykatti Maryamlih aalih waanisheyaako Elsaabeeth gufto tedee. Elsaabeeth Maryam salaamta toobbe geddaakoh tee ayci tee addadde tirtiire. Amaa sayyo Yallih akah abeh yinemih inkidde cafaden. Maryam lel Elsaabeethlih adooxa alsa sugtek sarrah ishi meelah gaxte.

Elsaabeeth barha bahtek sarrah amaa malaykatti akah ten yeemereekah Elsaabeeth kee Zakariyya amaa aycak migacah Yohannis aken. Sarrah Zakariyya Yalli kaa wanshiishe. Zakariyya lel: "Yalli ishi xiyaw yizzikkiremhi sabbatah xamde akah takko! Atu yi barhak lel Nabamko Naba Yallih nabii tekkeyaako xiyaw sinni zambeeko cafuuka akah geyaanaakah akah warisho letiya kito!" yerhxe.

Quddus kin Kitaabhi zanta: Luukas 1