28. Gaddaale kin cindha reezanto

Wuli max, wuli cindha gaddaale kin reezanti Yeesusulle yemeeteh taginah kaa essere: "Mece mucallimo, umman geedit aniina geyo ayim abo yolle tane?" Yeesus lel: "Aymihi 'mecetiya' yok tarhxem? Mecetiyah tanem inketta kinni. Amaati lel Yalla kinni. Umman geedit aniina taallo laakin Yallih sercat ibbirh" ake.

“Amayimko awlihim abbarho yolle tane?" yeh kaa essere. Yeesus: "Magdafin. Maznayin. Migaracin. Mizirabbitin. Ishi ina kee ishi abba xishmat. Ishi xuggatto lel ishi balih ikxin" yeh alle deheye.

Amaa xiyawti laakin: "Cindhiikoh ta sercat inkoh ibbirheh aniyo. Umman gedda maro ciloh abo missilamah ayim yok racteh tane?" ake. Yeesus kulux adde yerhxeyaako kaa yikxine.

Yeesus: "Naqhuus hintiya takko fadhdhemko, aduwaaki tamaa litom inkoh teebexeh, amaa solaadi baaxentah uxuu. Jannadde lel gadda taallo kito. Sarrah temeeteh yi kataa" ake.

Amaa xiyawti Yeesus yerhxem yoobbe gedda, naba gaddaale kii yinemhi sabbatah amaa lii yinem inkoh yoxoyeh akko raaco mifarhinnamhi sabbatah mangum yindime. Yeesusko wuli gabolle umfukun-yeh lel amulalle yedee.

Sarrah Yeesus ishi darasak: "Gaddaalit Yallih nigsinnadde oroboona mangum akko siriya! Yoo, gaddaale kinti Yallih nigsinnadde orobamko, gaalatti ibrat intiiko tillaabam akko ruhuwa" ake.

Amaa darasa Yeesus yem yoobbin gedda birriigeniyaako: "Miya kinni haye gargeerimto lem?" aken.

Yeesus amaa darasadde kulux-yeh: "Tayim xiyaw dhiicaanam maki. Yallah laakin ummannim akah takke" ake.

Bithroos Yeesusuk: "Nanu ummannim xabneh ku katayne. Ni jaza ayim kinni?" ake.

Yeesus: "Tamaa inkoh carwa, sacul, abba, ina, cindham, hido iraaro yoyyah ayik xabeh yane mari, amyimko 100 waqhtiya akah ziyaddeh umman geedit aniina geyoona kinon. Laakin afti maraako mango mari sarroomadde, sarroorimat maraako mango mari lel afadde gaxoona kinon" ake.

Quddus kin Kitaabhi zanta: Maatiyos 19:16-30; Markos 10:17-31; Luukas 18:18-30