29. Naxrurtahin casbenti zanta

Wuli max, Bithroos Yeesus: "Mucallim, yi sacal umam yokke abemko ayidhdhale gedda cafuu akah arhxo yolle tane? Malxina gedda fanah kinniho?" yeh kaa essere. Yeesus: "Malxina gedda makiiki, malxintomon waqhtiya malxin kinni" ake. Tayim lel, Yeesus umman gedda cafuu-narhxo nolle tane yan macnah yem kinni. Sarrah Yeesus ta zanta warishe:

"Yallih nigsinna wuli ishi casbentitih xisaab dhiinisho farhe nugus balih kinni. Kaa casbentitko wulitii naba cidaa 200,000 iggidiyahi maahiyah idhdha takkeya lii yine.

“Amaa casbentit yakfalo mirhiicinnamhi sabbatah, amaa nugus: 'Ta xiyawto kee kaa dik kaa cida akko tankaffalo kinnik garuuzinnah ibixanta'" yerhxe.

"Amaa casbenti amaa nugusko dhaacimtoh gulubulle akkoobeh: 'Ku beezza, tamaa yodde lito cida inkoh koh akfalo kinnik, dagum yolle cur!' ake. Amaa nugus amaa casbenti kaa raxmatishemhi sabbatah amaa cida inkoh akah xabeyaako natsah kaa dhirhiye."

"Amaa casbenti amaa nugusko yewce gedda, wuli affara alsih maahiyahi idhdha takke cida adde lii yine wuli kaa zoobatto kin casbenti geye. Amaa casbenti amaa kaa zoobatto kin casbenti ibbirh-isheyaako: 'Tamaa kodde liyo solaadi yoh ikfil!'" ake.

"Amaa casbenti lel dhaacimtoh gulubulle akkoobeyaako: 'Ku beezza, tamaa yodde lito cida inkoh koh akfalo kinnik dagum yolle cur!' ake. Amaa casbenti laakin kaa cida akah yadabbendah kaa ilaam hidhdhah, akah yadabbendah ishi zoobatto yisxisbishe."

“Aki casbentit tamaa tekkemk yubliinimhi sabbatah mangum berriigen. Amaa nugus fanah yedeyinih lel yubliinim inkoh akah warishen."

"Amaa nugus amaa casbentoh akah deecimeh: 'Ko qeema male kin casbento! Atu yi dhaacimte gedda ku cida koh xabe. Atu lel amayim balih abto kolle tine' ake. Amaa nugus mangum kurrayeyaako amaa casbenti ishi cida yadabbendah kaa yixbishe."

Sarrah Yeesus: "Atin sinni sacal sinni afcaadooko aseemexe wayteenimko tayim kinni Yabba abo lem" yerhxe.

Quddus kin Kitaabhi zanta: Maatiyos 18:21-35