37. Yeesus Alazaar rabaako ugusa

Wuli max, Yeesus Alazaar laxuutemhi farto alle temeete. Alazaar kee kaa sacul Maryam kee Marta Yeesus dhaye kaxantoolit kii yinin. Yeesus amaa ware yoobbe gedda: "Kaa laxuu rabi kaa guddussam makiiki, laakin Yallih nabneh kinni" yerhxe. Yeesus ishi kaxantoolit ten kixinii yine, laakin tamaa alle yinelle lamma max suge.

Lamma max tillaabishek sarrah, Yeesus ishi darasak: "Kata Yahuuda fanah gaxnok" ake. Kaa darasa lel: "Mucallimo, ta dhaye waqhtedde makini amalle tine xiyaw ku yagdafoona farheenim" yeenih alle deheyen. Yeesus: "Alazaar ni kaxantooli dhiineh yaneyaako kaa uguso yolle tane" ake.

Yeesus darasa: "Mucallimo, Alazaar dhiineh yinniyemko yashsho kinni" yeenih alle deheyen. Sarrah Yeesus caddoysheyaako: "Alazaar rabeh kinni. Atin yoh taamanoona ciloh lel anu amalle suge wayemih xedeneena kiyo" yerhxe.

Yeesus Alazaar dikille yemeete gedda, Alazaar rabemko affara lellec kaleh yine. Marta lel Yeesusuh akah garayteyaako: "Mucallimo, atu talle sugteh takkeedo yi sacal rabeh anniye mirhaarho. Atu kaa esserinnannim Yalli koh yaxaymih lel aamine" akte.

Yeesus: "Anu Rabiikoh ugut kee Aniina kiyo. Yoyyah aamininnanti walaa raba hanik maro kinni. Yoyyah aamininnanti caduruh miraba. Taymih taamine?" yeh eldeheye. Marta lel: "Yoo, Mucallimo! Atu Masiix, Yallih Barha kitom aamine" teh radde akah toxoye.

Sarrah Maryam temeete. Yeesus iballe raddeh lel: "Mucallimo, Atu bisah sugteh yakkeedo, yi sacal rabeh anniye mirhaarho" akte. Yeesus: "Alazaar adde hayteeni?" yeh ten essere. Usun lel: "Qabredde. Amowaaki ubul" aken. Sarrah Yeesus weece.

Amaa qabri wuli dhayitti afadde akko gaxe galba kii yine. Yeesus amaa qabrelle yemeete gedda: "Dhayitto asac akko ishanta" ake. Marta laakin: "Usuk rabemko affara lellec sugeh yane. Uma ure yaallo kinni" akte.

Yeesus: "Yoyyah teemeniinimko Yallih nabne tabloona kitin" sinak erhxeh miiniyoho?" yeh alle deheye. Amaa gedda amaa dhayitto asac akko ishen.

Sarrah Yeesus caranadde kulux-yeh: "Abba, yi taabbemih xamde koh takko. Atu umman gedda yi taabbem aarhigehaaki, atu yi dhirhiitem yaamanoona ciloh talle daw-teh tane xiyawah arhxik tayim arhxik aniyo" yerhxe. Sarrah Yeesus wac-yerhxeyaako: "Alazaar, ewec!" yerhxe.

Sarrah Alazaar yewce! Kaddiinah lel maknazadde sawlimeh yine. Yeesus: "Tamaa maknaz asac-isho kaa xatteenih kaa dhirhiyanta" ake. Ta bexsishshamhi sabbatah lel Yahuudko mango mari yeemenin.

Yahuud diin manabottit lel ashshiineenih, yekettiiniyaako Yeesus kee Alazaar aaginah yagdifiinimidde zatteyen.

Quddus kin Kitaabhi zanta: Yohannis 11:1-46