14. Zibollehi heeliyotta

Yalli ishi cahdehi masarratah Usuk Israa-eel xiyaw katattawna akko farha sercat akah warishemko sarrah, usun Siinaati koomaako yedeyin. Yalli Wacdi Baarho, Kancaan gantah akkarhxii yininiyahi gabolle ten beyo erherhishe. Amaa darurtat camiddi lel Kancaan gabolle afadde akko yedee, usun lel kaa katattayen.

Yalli Abraahim, Isxaaq, kee Yacqoobuh ta Wacdi Baarho ten zurriyah yaxaw kinam wacde akah sayeh yine. Kado laakin amalle mango xiyawhi kishosh maraa yinin. Tenak lel Kancaan xiyaw akkay yinin. Amaa Kancaan xiyaw Yallah acbudii miyiniini, walaa Kaa aabbii miyiniini. Asnaamah yacbudiinih mango umaani abaa yinin.

Yalli Israa-eel xiyawuk: "Tamaa Wacdi Baarholle tane Kancaan xiyaw inkoh hadantoona sinalle tane. Tenlih salaam maabinanta, waasibo lel aalih maabinanta. Ten asnaaminkoh tayfarasoona sinalle tane. Yotta aabbe wayteenimko, yiidhdhadde ten asnaamah tacbadoona kitin" ake.

Israa-eel xiyaw Kancaan darat gufen gedda, Moosa kishollehi inketta kin lammankee tamana labhatto doore. Amaa labha yedeyinih amaa baarho aagina lii tinem idhdhitoona masxassa akah yoxoye. Usun amaa Kancaan xiyaw quwa le mara kii yiniinim kee rukut mara kii yiniinim yakkedo idhdhitoona kii yinin.

Amaa lammankee taman labhattiya Kancaanadde marootom lellectiya yedeynih gaxen. Sarrah amaa xiyawakke: "Baarho mango kasbele baarho kinni, ilaw lel rakha kinni!" aken. Amaa idhdhiteenitko taman laakin: "Amaa katamum mangum nabam kinni, amaa xiyaw lel cagugguure kinon. Ten nootokemko, thummutuh ni yisciriinih ni yagdafoona kinon!" yerhxin.

Akkanih lel Kaaleeb kee Yehooshuca amaa lamma idhdhiteeni: "Kancaan xiyaw dherh mara kee quwa-le mara rumma kinon, nanu laakin thummutuh ten nascaro kino! Yalli noh dhibbaw kinni!" yerhxin.

Amaa xiyaw laakin Kaaleeb kee Yehooshuca ten mabbinnooni. Moosa kee Ahaaroonlih kurrayniyaako: "Aymihi tayidhdha cur-ta baarholle ni bahteenim? Xarbadde rabneh ni sayyo kee ni cindham garuuza yakkiinimko Masrille defeyno nolle tine" aken. Amaa xiyaw Masri fanah ten yadabbe aki manabotta dooroona farhen.

Yalli mangum kurrayeyaako amaa Rakhbi Tenda fanah yemeete. Yalli: "Yi diddeh ugutteenimhi sabbatah ta xiyawakke inkoh zibolle hel-tarhxoona kitin. Kaaleeb kee Yehooshucaako bextih lamaatanna iggidiya hido amayimko aganalle kin marak inkoh amalle rabtoona kitin, Wacdi Baarho lel caduruh moorobtaana" ake.

Xiyaw tayim yoobbin gedda, zambe abeenimih yeththeecesin. Sinni aslaxa beyeenih lel Kancaan xiyaw yaatakoona yedeyin. Yalli tenlih miyinemhi sabbatah Moosa yadiinimko ten asuuse. Usun laakin kaa mabbinnooni.

Ta xarabadde Yalli tenlih maadayinna, amaymih lel yimsicciriniyaako mango mari akko raben. Amaymik sarrah Israa-eel xiyaw Kancaanko gaxeenih marootom iggidiya zibolle hel-yerhxin. .

Israa-eel xiyaw zibolle hel adde yerhxin marootom lellectiyadde Yalli ten yeyteele. Carsheeko "manna" akyarhxin folo akah yoxoye. Beetan xazo geyoona gantah gilgilishti filco ten sifra fanah akah dhirhiye. Toyidhdha kalen hanik lel ten sartim kee kabel ziramko Yalli akah dhawrhe.

Yalli laye gantah dhayitko cibra kin araxah akah yoxoye. Tayim kinni hanik laakin, Israa-eel xiyaw Yalla kee Moosat diddeh antheerici kee angoroozomi yinin. Amayim kinni hanik lel Yalli Abraahim, Isxaaq kee Yacqoobuh saye wacdelle yisbite.

Wuli max xiyaw laye wayen gedda, Yalli Moosak: "Laye akko tawco kinnik tamaa dhayittoolih waanish" ake. Moosa laakin dhayittoolih aalih waanisham hidhdhah iloh lamma gedda iloh akko yootokeyaako umbuka xiyawhi afalle Yalla xishma kalite. Ummanti yaacube laye amaa dhayittooko tewce, Yalli laakin kurrayeyaako Moosak: "Wacdi Baarhodde sayto makito" ake.

Israa-eel xiyaw marootom iggidiya zibolle hel-yerhxiinimko sarrah, inkoh tamaa Yallih diddeh ugutteh tinem inkoh raben. Sarrah Yalli malammih amaa Wacdi Baarhohi wasanalle ten baahe. Amaa gedda Moosa mangum baarroweh yinemhi sabbatah amaa xiyaw yaymaraxo Yehooshuca doore. Yalli lel Moosah wuli max kayyah iggidin nabii dhirhiyo kinamah yakkeedo wacde akah saye.

Sarrah Yalli Moosa amaa Wacdi Baarho yablo ciloh koomak yawco akah warishe. Moosa amaa Wacdi Baarho yuble, adde orobo laakin Yalli akah masmaxinna. Sarrah Moosa rabeyaako Israa-eel xiyaw soddom lellectiya akah yixzinin. Yehooshuca ten cusub manabotta yekke. Yehooshuca Yalla yaamineh yaabbetiya kii yinemhi sabbatah mece manabotta kii yine.

Quddus kin Kitaabhi zanta: Muuca 16-17; Cadad 10-14; 20; 27; Gabbabbaaacite Sercat 34