38. Yeesus yinthillime

Yahuud iggida-iggidah Faasiga axtifilii yinin. Tayim lel boolaat iggidiyak basoh Yalli Yahuud abbub Masriiti garuuzinnaako aaginah ten gargeerem ishaarisha cid kinni. Yeesus erherhih xiyaw yaybassaro kee yaydaraso erherhishemko adooxa iggidak sarrah, Yeesus ishi darasaalih ta Faasiga yaxtafalo farham kee amalle kaa yagdafoona kinoonim akah warisheh yine.

Yeesus darasaako wulitiyak lel Yahuuda akkay yinin. Yahuuda amaa katattaynitti solaadit borsahi mas-uuliya lii yine. Solaadi kixinii yinemhi sabbatah lel wuli gedda amaa borsaako solaadi garciita yine. Yeesus kaa darasa Yerusaalem gufeenik sarrah, Yahuuda amaa Yahuud naba maralle yedeeh Yeesus solaadih tenalle kaa yayrhabaro yittifiqhe. Usuk Yahuud naba mari: 'Yeesus Masiix maki' arhxii yiniinim kee kaa yagdafoona farhaa yiniinim aarhigii yine.

Yahuud naba mari, naba qashsheh yimmirrixiinih, Yahuuda Yeesus tenalle yasxaw fiddat solaadih soddom yoxoyin. Tayim lel amaa nobowa akah yerhxiinih yiniiniikah tekke. Yahuuda yittifiqheh solaadi bishshiiteyaako yedee. Usuk lel usun Yeesus yabbarhoona akah dhiican caashir xattiimo wagiya yine.

Yerusaalemille, Yeesus ishi darasaalih Faasiga yixtifile. Amaa Faasigah beetoona farhen gedda lel Yeesus folo beyeh yigdile. Usuk: "Tati sinah yomxowwe yi nabse kinnik, beyteenih betanta. Tayim yi zikrah abanta" akye. Taginah lel, Yeesus kaa nabsi ten beezza yakko lem akah warishe.

Sarrah Yeesus wuli kobbaayatto yooqhoceyaako: "Tayim sin zambe cakalisho xarhitak yane yi biilo Cusub Cahdihiya kinnik ucubanta. Ummaan aacubinnan gedda yi tazzakkaroonak tayim abanta" akye.

Sarrah Yeesus amaa darasak: "Sinko wuliti yi yasxaw kinni" ake. Amaa darasa lel birriigeenih taginalem abto lem miyatto kinni, yeenih esserimen. Yeesus lel: "Anu ta folottat dhacto akah axayik aniyotii thallaam kinni" ake. Sarrah amaa folotta Yahuudah yoxoye.

Yahuuda amaa folotta beetek sarrah, Sheethan adde orobe. Yahuuda lel Yeesus yabbarhoona amaa Yahuud naba mara xattiimo yedee. Baarho lel bar kii tine.

Folo beetenik sarrah, Yeesus kee kaa darasa Oolac kooma fanah gerhen. Yeesus: "Kabar atin inkoh yi xabtoona kitin. 'Anu loyna aatako kiyo, ciido lel inkoh faax-tarhxo kinni' yaanam tunkuttubeh tane" ake.

Bithroos lel: "Aki mari walaa inkoh ku xabeenimih, anu ku mixaba!" ake. Sarrah Yeesus Bithroosuk: "Sheethan inkoh sin bishshiito farhe, Bithroos, anu laakin imaan xabtaanamko dhaaco sinah abeh aniyo" ake. Yakko kibah laakin, kabar, dor-hotti andhaxamko basolle atu inkinnah yi mitaarhigemih adooxa gedda tammaskaro kito" ake.

Sarrah Bithroos Yeesusuk: "Anu walaa rabo eelemih ku mixina!" ake. Aki darasa lel inkoh amayim yerhxin.

Sarrah Yeesus ishe ishi darasah Get-seemani akanikke fanah yedee. Yeesus ishi darasak cakanadde sayaanamko yassallawna akah warishe. Sarrah isheh yassallaw ulah yedee.

Yeesus adooxa gedda yissiliiye: "Yi Abbaw, dhiicimtemko, ku beezza ta weexelti kubbaaya yi mashshacin. Ta xiyawhi zambi aki ginah akah xabbiima arax waytimemko laakin, ku farhi takko" yerhxe. Yeesus mangum yomroocodeyaako kaako obta dhiimo biili dhimmiyoh higgidii tine. Yalli lel kaa yasquwwe malaykatto akah dhirhiye.

Tamaa inki salat bakinnan gedda, ummaan gaxah ishi darasa yable gedda, dhiinaanah akah sugan. Maddaxit waqhte gaxe gedda, Yeesus: "Yi thallaam yemeeteh yanek, ugutanta!" ake.

Yahuuda, Yahuud naba mara, caskar kee mango xiyaw yibbirheh yemeete. Amaa mari seefa kee ilol yibbirhiinih yinin. Yahuuda yemeeteyaako Yeesusuk: "Nagaa, Mucallim" yeh kaa fugute. Tayim lel Yahuud naba marah miyatto yabbirhiinim yaarhagoonahi ishaara kii tine. Sarrah Yeesus: "Yahuuda, fugtoh yasxay tanito?" ake.

Amaa caskar Yeesus abbirhik, Bithroos ishi sef yeyyeeceyaako wuli naba qashshih khaddaamko cokka akko yigrice. Yeesus: "Asac-ish tamaa sef! Anu yi deesoona Yabba malaykutti maxaaarho kaa essere dhaarhe. Laakin inni Abba aabbo yolle tane" ake. Sarrah Yeesus amaa labhattih cokka uruse. Yeesus yindhibbirhemko sarrah, amaa darasa inkoh kuden.

Quddus kin Kitaabhi zanta: Maatiyos 26:14-56; Markos 14:10-50; Luukas 22:1-53; Yohannis 12:6; 18:1-11