3. Weeca

Dherh muddaako sarralle, mango xiyaw ta caalamalle maraa yinin. Uma maraa kee kakalat wannun lel yekkiinih yinin. Yalli umbuka caalam naba weecah abeh yaylawo farhanda fanah lel umaatih yoomiinih yinin.

Nuux laakin Yallaako macruuf geye. Usuk uma marih fanadde mara xaqqi-wanna kin xiyawto kii yine. Yalli amaa dhirhiyo farhak yine weecahi zacabah Nuuxuh warishe. Nuuxuh lel naba jalba siraaxo akah warishe.

Yalli Nuuxuh 140 mitrotiya dhedhdhanko, 23 mitrotiya fidaaneeko (masangale) 13.5 mitrotiya lel xafentah le jalba siraaxo akah warishe. Nuux amaa jalbadde adooxa daraja, mango qoraflih agaanako alifeh boxooko abo kii yine. Amaa jalba lel Nuux kee kaa xawaz, amayim balih babbarhi caynah baarhot bahayimko inki-inki tsimde weecaako raacishsho ciloh tekke tiya kii tine.

Nuux Yalla yoobbe. Kaa kee kaa adooxa barha yekkiinih tamaa Yalli akko akah tenak yerhxeekah lel jalba siraaxen. Amaa jalba mangum nabatiya kii tinemhi sabbatah siraaximto mango iggidit beyte. Nuux lel amaa xiyaw yamaato le weecaako ten asuuseh sinni Yallalle gaxoona akah warishe, usun laakin kaa maamaninnooni.

Yalli Nuux kee kaa xawaz dhicta folo sinne kee sinni bahaymih yassaqarraboona yakkeedo ten yeemere. Ummanim tinqirribe gedda, Yalli Nuuxukke, ishe kee ishi numah, kaa dhayloh adox kee ten sayyo, sittiyadde baxxara xiyawtok jalbadde oroboona akah warishe.

Yalli umbuka bahayim kee kimbirko saytiya kee labbtiya jalbadde orobeenih weecaako naggoona ciloh Nuux fanah dhirhiye. Yalli umman caynah bahayimko, sadaqhah takko dhicta lab malxin kee say malxin Nuux fanah dhirhiye. Usun inkoh jalbadde oroben gedda Yalli maczo isheh alife.

Amaymik sarrah, rob yane sanah rado erherhishe. Daweena maleh lel marootom lellectiya kee marootom bartiya rade. Laye lel baarhot addaako forhoorhoxitte. Umabuka baarholle tinem lel dherh koomam akko raacinnixak inkoh layeh agoogitte.

Umbuka ta kafin baarholle tinem, amaa jalbadde tine xiyaw kee bahayimko bextih inkoh bakitte. Amaa jalba lel layet bukalle seleelikitteh tee addadde tinem yamundhuciinimko inkoh ten naggoyishshe.

Rob xabek sarrah amaa jalba koona alsa layet bukalle seleelekitte, amaa gedda lel laye addah sayto erherhishshe. Amaymik sarrah, amaa jalba wuli max koomat bukalle tucrufe, baarho laakin kaddih layeh agoogitteh tine. Malammih adooxa alsak sarrah lel koomamti amom yamballaw erherhishe.

Malammih marootom lellectiyak sarrah Nuux laye fuucuttemke yablo kaakotta irolle dirhiye. Amaa kaakotti lel kafin baarho wagiyo tawla amulalle firiirixite, laakin walaa inkikke geyo mirhiicinna.

Amayek sarrah lel, Nuux xamaama irolle dhirhiye. Laakin ishi yakkeedo walaa inki kafinikke migeyinnaaki, Nuux fanah gaxte. Baxuurok leddelle, amaa xamaama malammih irolle tee dhirhiye gedda oolactot xak afakke tibbirheh gaxte. Laye guballe fuucutaa tine, xorh lel malammih carsimak yine.

Nuux aki baxuuro ilaaleyaako amaa xamaama maddaxit gedda irolle dhirhiye. Ta waqhte alle tacrufe cara geyteyaako migaxinna. Laye lel fuucutaa tine.

Lamma alsak sarralle Yalli Nuuxuk: "Koo kee ku xawaz kee inkoh bahaymik tamaa jalbaako tawcoona dhictan. Mango cindham kee abuusa bahteenih baarho emeganta" akyerhxe. Amaa gedda lel Nuux kee kaa xawaz amaa jalbaako yewcin.

Amaymik sarrah, Nuux amaa jalbaako yewceh, mazbax siraaxeyaako, sadaqha yakke bahayimko babbarhitiya yisiddiqhe. Yalli amaa sadaqha yikxineyaako Nuux kee kaa xawazadde adde yebeereke.

Yalli: "Walaa xiyaw cindhiikoh zambi-wannun yakkoona kibah, taymik sarrah xiyaw abta umaanih sabbatah ta baarho caduruh maabaara, weecah abeyaako lel ta baarho maylayem wacde yok yakko" yerhxe.

Yalli lel ishi wacdih ishaarah erherhih robraat abe. Robraat caranalle ambullyinnan gedda Yalli ishi wacde azzikkirii yine, Kaa xiyaw lel amayim balih.

Quddus kin Kitaabhi zanta: Erhedhdho, curfa 6-8