27. Mece Samaariyatti zanta

Wuli max, wuli Yahuud sercat hi dhiiceeni Yeesusulle tah arhxii alle yemeete: "Mucallim, umman geedit aniina geyo ayim abo yolle tane?" Yeesus lel: "Yallih sercatalle ayim tunkuttubeh tane?" yeh alle deheye.

Amaa sercat dhiiceeni amaa Yallih sercat yarhxem: "Maddara kin ishi Yalla, umbuka ishi afcaadooko, ishi rooxeeko, ishi xaylaako kee ishi xangalko ikxin. Ishi xuggatto ishe balih ikxin" yeh alle deheye. Yeesus lel: "Meceetih tanito! Marto kitok amayim ab" yeh alle deheye.

Amaa sercat dhiiceeni ishi yasxaqqaqho farheyaako: "Miyatto kinni yi xuggatti?" yeh kaa essere.

Yeesus amaa sercat dhiiceenah wuli zantah abeh radde akah yoxoye. "Wuli Yahuuddi Yerusaalemko Yerikho beya araxalle adii yine.

"Amaa xiyawti arax adiik wuli garaacen kaa yootokin. Lii yinem inkoh akbishshiiteenih lel rabo farham fanah kaa yootokin. Sarrah amalle xabeenih akko yedeyin."

"Dago waqhtek sarrah, wuli Yahuud qashshi amaa araxalle oobak yine. Amaa diin manabotti ta yumuttukeh yinsillibe xiyawto yuble hanik, xato farha xiyawto xabeyaako wuli gabooko gaxeh ishi gerho katattayshe ".

"Dago waqhtek sarrah lel wuli Leewiiti xiyawti amaa araxalle guballe oobak yemeete. Leewi wuli Yahuud kisho yekkiinih Maqhdas Caredde qashshit xattiima yine mara kinni. Amaa Leewiiti xiyawti yakkeedo yimsillibeh yumuttuke xiyawto yuble hanik wuli gabooko akko tillaabeh yedee.

“Toyek sarrah amaa araxalle oobe xiyawti lel wuli Samaariyatto kii yine. (Samaariyaati Yahuudko raddam yekkiinih aki diikaalih temweesebem kinon. Samaariyaati xiyaw kee Yahuud lel sittiya nicibii yinin.) Laakin amaa Samaariyatti amaa Yahuuddo yuble gedda, mangum kaa raxmatishe. Amaymih kaa baclaysheyaako amaa biyaake akah yusxukume."

"Sarrah amaa Samaariyatti ayyih xiyawto xaf-isheyaako ishi zananak hayeh wuli arax afalle tine birgo fanah beyeyaako amadde kaa baclayshe."

“Malammit max, amaa Samaariyatti ishi kallaaxe katattaysho alle tine. Amaa birgot nabatiyah yine xiyawtoh solaadi yoxoyeyaako: 'Tatiya kaa baclayish, ta solaadiiko ziyaada teyleemko lel anu gaxa gedda koh akfalo kiyo" ake.

Sarrah Yeesus amaa sercat dhiiceena: "Aymih kolle higgida? Amaa yinsillibeh yumuttuke xiyawtoh ta adooxa xiyawtooko awlihtiya kinni kaa xuggatti?" yeh kaa essere. Usuk: "Tamaa kaalle raxmatetiya" yeh alle deheye. Yeesus: "Atu lel aduwaaki amah ab" ake.

Quddus kin kitaabhi zanta: Luukas 10:25-37