30. Yeesus koona shiix xiyawtiya bettiisha

Yeesus ishi fartottit umbuka diikalle warroyshoona kee yaydarasoona ten dhirhiye. Amaa Yeesus alle yinille gaxen gedda, abeenih yiniinim akah warishen. Sarrah Yeesus xiyaw alle anniinixe igilko amaa carhihille wuli dago waqhte yacrafoona isheelih ten beye. Amaymih wuli jalbadde koreenih lel amaa igilko amaa carhihille taben.

Yeesus kaa darasa jalbadde adiik laakin mango xiyaw ten tubleya tine. Amaa xiyaw amaa igilko maklaliteenih amaa carha tenko yookomiinih sugoona yerdin. Yeesus kee kaa darasa amakke gufen gedda, mango xiyaw amakke tenko yookomiinih tena ilaalak akah sugen.

Amaa xiyaw sayyo kee irro akko xaban gedda, labha bisah 5,000ko aganalle kii yinin. Yeesus amaa xiyaw mangum kaa raxmatishen. Yeesusuh amaa xiyaw wuli ciido loyna hiniya balih kii yinin. Amaymih ten yuyduruseh, ten addadde laxutteh tinem lel uruse.

Baarho kaso tekke gedda, amaa darasa Yeesusuk: "Baarho dhumteh tane. Katamum lel dhayelle miyane. Ta xiyaw yedeynih beetaanam waggiishitoonaaki ten dhirhii" aken.

Yeesus laakin amaa darasak: "Atin beetaanamko wulim akah uxuwanta!" ake. Usun lel: "Amayim aaginah abno dhicna? Nanu folot koona kinnas kee lamma cindhaa caasatto bisah kinni linom" aken.

Yeesus amaa ishi darasak amaa xiyaw 'cashsholle kokkontom xiyawtiyah defeyenta' akyarhxoona akah warishe.

Sarrah Yeesus amaa koona kinnas kee amaa lamma caasatto yibbirheyaako carshedde kulux-yerhxeh, amaa foloh Yallah xamde yedebbe.

Sarrah Yeesus amaa folo kee amaa caasa cindhadhaahumuh yegeerece. Amaa yegeerece cindhadhdhaahum lel amaa xiyawah keloona ishi darasalle yoxoye. Amaa darasa yane sanaha amaa folo tillallaasen, caduruh lel bakitto xinte! Amaa xiyaw inkoh beeten, inkoh lel xayten.

Amaymik sarrah, amaa darasa amaa folooko bettiiminnixak ractem yeskettinih lel lammankee taman jambiiliya akko yamagin! Amaa macaasha lel amaa koona kinnas kee lamma caasattooko temeetem kii tine.

Quddus kin Kitaabhi zanta: Maatiyos, 14:13-21; Markos 6:31-44; Luukas 9:10-17; Yohannis 6:5-15