21. Yalli Masiix yaxaw wacde saa

Tamaa erhedhdhooko, Yalli Masiix dhirhiyo yixiggire. Erherh Masiix wacdi Adam kee Xaawalle yemeete. Yalli tamaa caroorat amo yabarchaqho le Xaawat zurriyatti yaabako kinamah wacde saye. Amaa Xaawa doolabte caroora lel Sheethan kii yine. Amaa wacdi macna lel Masiix Sheethan sittadde yascaro kinam kii yine.

Yalli Abraahimih kaa araxah umbuka xiyaw baraka geyoona kinoonimih wacde akah saye. Ta baraka lel niiroh Masiix yamiite gedda kaamil takko kii yine. Usuk lel xiyaw umbuka xiyawhi cayna caalamalle taneya gargeerimoona ten dhicshiisho kii yine.

Yalli Moosah niiroh aki kayyah higgidin nabii baaho kinamah wacde akah sayeh yine. Tayim Masiix sabbatah sarrah aki gedda yakko le wacde kii yine.

Yalli Dawuduh kaa zurriyaako wuliti ummangedda Yallih xiyawah nugus yakko kinamah wacde akah sayeh yine. Tayim lel Masiix Dawud zurriyaako wulitiya yakko kinamhi macna leya.

Nabii Ermiyaas araxah abeh Yalli Cusub Cahde abo kii yine, laakin amaa Cahdi Yalli Israa-eellih Siinalle abe wacde balih yakko maki. Cusub Cahdi lel Yalli xiyaw afcaadodde sercat yaktabo, xiyaw Yalla nif kee nifih yaarhagoona usun kaa xiyaw yakkoona, Yalli lel ten zabe alle xabo kii yine. Masiix lel amaa Cusub Cahde erherhisho kii yine.

Yalli nobowa yakkeedo Masiix nabii, qashshe kee nugus yakko kinam yerhxiinih kinon. Nabii akyaanam Yallih waani yaabbeyaako Yallih waani xiyawah warishatiya kinni. Tamaa Yalli dhirhiyo wacde akah saye Masiix lel naqhuus hin nabii yakko kii yine.

Israa-eel xiyaw qashshit ten zambih maqhtsactih xiyaw idhdhadde Yallah sadaqha abaa yinin. Qashshit xiyawah yakkeedo Yalla dhaacita yinin. Amaa Masiix lel naqhuus hin naba qashshe ishi nabse Yallah yasaddaqho leya kii yine.

Nugus lel wuli nigsinnat nugus yekkeh xiyaw afridii yine. Amaa Masiix lel amaa ishi abo kin Dawud nugus kurselle defeyo le naqhuus hin nugus kii yine. Usuk Umbuka caalamalle umman geddah reezeyaako meceetih yifrideh xaqhqhi firde yaxaw kinni.

Yallih nobowa Masiix sabbatah mangum takko kinni yeenih yinin. Nabii Mal-aaki Masiix amiitekkah naba nabii yamaato kinam yookomeh yerhxeh yine. Nabii Isayas lel Masiix wuli barhäk tane barhäako yaabako kinam yiywissiyeh yine. Nabii Miikaayaahu lel Masiix Beetlexem akan katamalle yaabako kinam yiywissiyeh yine.

Nabii Isayas Masiix Galiilalle defeyeyaako tixzine xiyawah yayrahaw kee tindhibbirhemih xurriya baaheyaako timxibbishem yayyaaco kinam warisheh yine. Usuk gaxisheh Masiix laxutte xiyaw kee cokka hin mara, tablo tantam, waanishsho tantam, amayim balih tadaw tantam uruso kinam yiywissiyeh yine.

Nabii Isayas Masiix walaa inki sabab hinnim yamnaccabo kee xinnitimo kinam yakkeedo warisheh yine. Aki nobowa yakkeedo tamaa kaa yagdife mari kaa saralle qumaar digiroona kinoonim kee kaa kaxantooli kaa yasxaw kinam warisheenih yinin. Nabii Zakariyya lel amaa kaa kaxantooli Masiix yosxoyemih fiddat solaadih soddom tacriifatiya akah tamxawo kinam yookomeh warisheh yine.

Nobowa Masiix aaginah rabo kinam warisheenih yinin. Nabii Isayas xiyaw Masiixille thuf alle yarhxoona, alle digiroona kee kaa yaatakoona kinoonim warisheh yine. Umaaniiko inkim maabinna hanik, kaa fiirishoona kee naba cazaab kin waaxeltah rabo kinam warisheh yine.

Nobowa, Masiix walaa inki nuqhuus hin zambe male yakko kinam yerhxiinih yinin. Aki xiyawhi zambeh lel maqhtsacti kabbaato kii yine. Kaa maqhtsacti Yalla kee xiyawhi fanadde salaam bahto kii tine. Tayimhi sabbatah lel Masiix yaxirmichem Yallih farhi kii tine.

Nobowa amaa Masiix rabo kinam kee Yalli rabiiko kaa uguso kinam yerhxiinih kinon. Masiix rabi kee kaa ugutuh Yalli zambi-wannunhi gargerti ishi xagara yiskimileyaako Cusub Cahde erherhisho kii yine.

Yalli nobowa Masiix zacabah mango xaaja ten yuybulluwe, Masiix laakin amaa nobowaako walaa inketti waqhtedde maamaatinna. Tamaa nobowa yerhxiinimko sarroorimattiyaako sarralle 400 iggidiyaako ziyaada kale gedda, amaa ishi xaqqi waqhtedde, Yalli Masiix ta caalamalle dhirhiye.

//Quddus kin Kitaabhi zanta: Erhedhdho 3:15; 12:1-3; Gabbabbaaacite Sercat 18:15; 2 Shemuu-eel 7; Ermiyaas 31; Isayas 59:16; Daaniy-eel 7; Mal-aakii 4:5; Isayas 7:14; Miikaayaahu 5:2; Isayas 9:1-7; 35:3-5; 61; 53; Zaabuur 22:18; 35:19; 69:4; 41:9; Zakariyya 11:12-13; Isayas 50:6; Zaabuur 16:10-11