36. Yeesus badale

Wuli max; Yeesus ishi darasaako adox Bithroos, Yacqoob kee Yohannis isheelih beye. (Amaa Yohannis akan darasatti lel Yeesus yiythimmiqhetiya kii miyine.) Yassallawna yeenih lel naba kooma sinni ulah yewcin.

Yeesus assilliik, kaa nif ayrotta balih iffoye, kaa sari ifo balih caddowe. Ta baarholle lel amayidhdha inketti caddoysho mirhiica.

Moosa kee nabii Eliyaas alle yemeetin. Ta mari boolaat iggidiyak basoh ta baarholle maraa tinem kinon. Yeesuslih lel Yerusaalemille takko le kaa rabih zacabah waanishen. .

Moosa kee Eliyaas Yeesuslih waanishak, Bithroos Yeesusuk: "Nanu talle nemeetem temce. Kado adooxa tenda abnoo. Tiya koyyah, tiya Moosah, tiya lel Eliyaasah" ake. Bithroos ayim arhxii yinem aarhigii miyine.

Bithroos waansihak, camburre yemeeteyaako agoogish ten isheh, darurko lel: "Tati anu kixiniyo yi Barha kinni. Anu kaalih xedena. Kayya oobbaanta" yarhxe dhaw yemeete. Amaa adooxa darasatti lel birriigeenih baarholle raden.

Sarrah Yeesus ten dhageyaako: "Mimashshiitina. Uguta" akye. Sinni wakalelle kulux-yen gedda lel kaddih amalle tinem Yeesus bisa kii yine.

Yeesus kee amaa darasa lel amaa koomaako ooben. Sarrah Yeesus: "Ta tekkem kadookoh walaa inkettah miwarishina. Anu dheh rabo kiyo, sarrah lel rabeh gaxo kiyo. Amaymik sarrah xiyawak tarhxoona dhictan" ake.

Quddus kin Kitaabhi zanta: Maatiyos 17:1-9; Markos 9:2-8; Luukas 9:28-36