34. Yeesus aki zanta warisha

Yeesus Yallih nigsinnah zacabah mango aki zantat warishe. Masalan, Usuk yerhxe: "Yallih nigsinna wuli akkinnanti ishi dhagedde yizriye adratto balih kinni. Adratti lel umman zaraako cindhatiya kinam taarhigin."

"Amaa adratto carsimta gedda amaa dhagedde yane takleeko tanabeh, kimbir gantah yamiiteh xakukukke akko yacrufem takke."

Yeesus aki zanta warisha: "Yalli nigsinna tamaa numa folo akkabto cagunudde sittadde yakmilendah hayte aras balih kinni."

"Yallih nigsinna akkinnanti ishi dhagedde yoocore gadda balih kinni. Aki xiyawti amaa gadda geyah lel malaamih yaacure. Xedenih yemmeegeh lel yedeyeyaako lii yinem inkoh yaabixeh amaa solaadih amaa dhage dhaame."

"Yallih nigsinna limo naba luul balih kinni. Undhurhti bacashaara tee geya gedda, lem inkoh yaabixeh amaa solaadih teya dhaama."

Sarrah Yeesus sinni mece ciyyoh taamineh aki mara ilactamhi zanta warishe. Usuk: "Lamma xiyawti yassallawna Maqhdas Care yedeyin. Tenko wuliti gibre yaskatte kii yine, wuliti lel diina manabotta kii yine.

"Amaa diin manabotti ta ginah dhaaco abe: 'Ko yi Rabbiyo, anu tamaa zambi-wannun, garaacen, xaqqe abinnixem, tazniyem, hido lel too gibre yaskatti balih makiyomuh xamde koh takko.'"

"Masalan, anu baxuurodde lamma gedda asoomeh inkoh geya solaadi kee nuwaako lel taman-ya af akko ayyaace'" yerhxe.

"Amaa gibre yaskatti laakin amaa diin manabottaako miriix-yeh defeyayaako ishi naxar gummaadeh aatukik caranade kulux-yerhxeh: "Yi Rabbiyo, anu zambi-wanna kiyomhi sabbatah yolle raxmat' yeh dhaaco abe."

Sarrah Yeesus: "Yalli amaa gibre yaskatti dhaaco yoobbeyaako 'Xaqqi-wanna kinni' akem rummah sinak arhxii aniyo. Amaa diin manabottahi dhaaco laakin makxaninna. Yalli yamnanabbetiya yascandhaw kinni, ishi yascundhuwetiya lel xaf-isho kinni" yerhxe.

Quddus kin Kitaabhi zanta: Maatiyos 13:31-33, 44-46; Markos 4:30-32; Luukas 13:18-21; 18:9-14