4. Yallih cahde Abraahimlih

Amaa weecaako mango iggiditik sarralle, malammih caalamalle mango xiyaw yinin, inkoh lel inki waanih waanishak yinin. Yalli akah yeemereekah caalam yamagiinim hidhdhah inkille yekettiniyaako katama siraaxen.

Mango amnonobba lii yinin, Yalli yerhxemidde lel macal lii miyiniini. Carshe aleeloona gantah lel dherh qobba siraaxoona erherhishen. Yalli lel taginah inkidde umaani abaanam katattaysheenimko, mango zambe kinam aboona dhiicaanam yuble.

Amaymih lel, Yalli ten luqha barhsimte caynah luqhaqhalle yiybiddileyaako, amaa xiyaw umbuka caalamalle faax-ishe. Tamaa siraaxoona erherhisheenih yinin katamak lel 'Baabel' akkay yinin, tee macna lel 'amalolokka' yarhxiinim kinni.

Mango iggiditik sarralle, Yalli wuli Abram akyarhxin xiyawtoolih waanishe. Yalli: "Ishi wathan kee ishi xawaz xabteyaako anu ku aybulluwe baarho fanah aduu. Anu kodde ebeerekeh lel naba dik kok abo kiyo. Ku migacak nabatiya akko abo kiyo. Koyyah dhaaco aba mara aybaarako kiyo, koyya abaara mara lel abaaro kiyo. Umbuka diika caalamalle taneya lel ku sabbatah yambaarakoona kinon" akyerhxe.

Amaa gedda Abram Yalla yoobbe. Ishi numa, Saaray kee inkoh ishi khaddamte kee isheh yabbuxutem bishshiiteyaako Yalli kaa yuybulluwe baarho, Kancaan akyarhiniya fanah yedee.

Abram Kancaanalle yemeete gedda, Yalli: "Ishi wakalelle kulux-erhex. Ta inkoh ablii tanito baarho koo kee ku zurriyah miiraasah sinah axaw kiyo" akyerhxe. Amaymik sarrah Abram amaa baarholle sige.

Wuli lellec, Abram Malkitsedeq akyarhxin Nabamko Naba Yallih qashshe geye. Malkitsedeq Abramah dhaaco akah abeyaako: "Nabamko Naba Yalli caran kee baarho leya Abramidde yabaarako" yerhxe. Abram lel isheh yabbuxutemko taman-ya af akah yoxoye.

Mango iggidit tillaabe, Abram kee Saaray laakin barha lii miyiniini. Yalli Abram waanisheyaako lel barha baaho kinam kee caranalle yane xutuk balih kin zurriya yaallo kinamah malammih wacde akah saye. Abram Yallih wacdeh yeemene. Yallih wacde yeemenemhi sabbatah lel Yalli Abram xaqqi-wanna kinam caddoyshe.

Amaymik sarrah, Yalli Abramlih cahde saye. Cahde akyaanam lammaati fanadde yakke ittifaaq kinni. Yalli: "Ku rooxeeko barha koh axaw kiyo. Ku zurriyah lel Kancaan baarho akah axaw kiyo" akyerhxe. Abram laakin toyendah barha lii miyine.

Quddus kin Kitaabhi zanta: Erhedhdho, curfa 11-15