44. Bithroos kee Yohannis caageena urusan
Wuli max, Bithroos kee Yohannis Maqhdas Careh adii yinin. Amaa Maqhdas Careh kab-yerhxin gedda, wuli yixinkishe xiyawti solaadi caagensiitaya yublin.
Bithroos amaa xankish kin xiyawtodde kulux adde yerhxeyaako: "Anu solaadih walaa inkim maliyo. Liyom laakin koh axaw kiyo. Yeesus migacalle, ugutaaki aduu!" ake.
Akkanih lel Yalli amaa xankish kin xiyawto uruseh, gerho erherhisheyaako tirtiiraak Yalla fayslishite. Amaa Maqhdas Carehi kanshellodde tine xiyaw lel cibrah raben.
Mango xiyaw lel amaa ure xiyawto yabloona iba laceenih yeemetin. Bithroos lel: "Aymihi ta xiyawti urem cibra sinalle tekkem? Nanu ninni xaylah hido ninni mecaanih kaa mi urusino. Ta xiyawti urem laakin Yeesus yaxaye xayla kee imaanah kinni."
"Sina kinni Roomaati xiyawhi ammaxadaarih Yeesus yagdafo akah warishshem. Atin aniinat abeena tigdifin, Yalli laakin rabiiko kaa uguse. Abaa tiniinim walaa aarhige wayteenimih, tamaa 'Masiix waaxelsiito kee rabo kii yinem' yerhxiinih yininiya takmalo laakin Yalli sin abitto yetneefece. Amaydo, kado sin zambi sinah cakalo kinnik totoobiinih Yallalle ufkunanta" ake.
Bithroos kee Yohannis arhxii yiniinim lel amaa Maqhdas Carehi naba mara mangum ten kurrayishshe. Amaa gedda, ten yibbirhiinih ten yixbishin. Amaa xiyawko mango mari laakin Bithroos farto yeemeniinih, Yeesusuh teemene xiyawhi manga 5000 takkem gufen.
Malammit max, amaa Yahuud naba mari Bithroos kee Yohannis naba qashshe kee aki diin manabottit fanah ten baahen. Usun lel Bithroos kee Yohannis: "Ta yixinkishe xiyawto awlih xaylah urusseeni?" yeenih ten esseren.
Bithroos: "Ta xiyawti Masiix kin Yeesus xaylah ureh sin nifille daw-arhxii yane. Ati Yeesus masqalak kaa takarten, Yalli laakin malammih aniinalle kaa uguse! Atin kaa xinten, Yeesus xaylah yekkem maarhige aki ginah akah gargeeriman arax miyane!" yeh eldeheye.
Bithroos kee Yohannis atcilliminnixe gabbar kii yinin hanik sirii ginah waanishak yubliinimhi sabbatah, amaa mas-uuliin birriigen. Sarrah laakin ta mari Yeesuslih yiniinim yizzikkirin. Ten mashshiisheenimko sarrah laakin, Bithroos kee Yohannis yadawna ten xaben.
Quddus kin Kitaabhi zanta: Fartottit hi Abittot 3:1-4:22