16. Gargeereenit

Yehooshuca rabek sarrah, Israa-eel xiyaw Yallah mangazzayinnooni, Kancaan xiyawko ractem lel hadane kee Yallih sercat akah yaabbiiniikah akmaabinooni. Israa-eel xiyaw Yahweh, rummaahit Yallah, yacbudiinim hidhdhah Kancaan yallitih yacbadoona erherhishen. Israa-eel xiyaw nugus lii miyiniinimhi sabbatah ummanti isheh mecem akkalinnannim abitak yine.

Israa-eel xiyaw Yalla yaabboona xineenimhi sabbatah, Yalli ten caduwa akah ten yasciriiniikah akko abeyaako ten yiqhtsice. Ta caduwa Israa-eel xiyawko nuwa akko garacen, ten iraaro akko bayshen, mango mara lel akko yigdifin. Yalli akko yerhxem xineenih, sinni caduwah dhuunumeenimko mango iggiditik sarrah, Israa-eel xiyaw yotoobiinih ten gargeero Yalla esseren.

Sarrah Yalli amaa ten caduwaako ten yayyaaceh amaa baarholle salaam baaha gargeereena akah yoxoye. Amaymik sarrah laakin amaa xiyaw Yalla biyashshiiteenih malammih asnaamah yacbadoona erherhishen. Amaymih, Yalli amaa tenah dhayelle tine, Midyaan xiyaw akyarhxin caduwa kin xiyawhi kisho akah ten yasciriiniikah akko aben.

Midyaan xiyaw lel malxina iggida Israa-eel xiyaw ilaw inkoh bishshiiten. Israa-eel xiyaw mangum mashshiitenih, Midyaan xiyaw ten geyaanamko galubudde sucuten. Abayshimalle, ten gargeero Yalladde zeeren.

Wuli max, Gidcoon akyarhxin Israa-eel xiyawti Midyaan xiyaw akko garacaanamko sucuteh ilaw askiyyidii yine. Yallih malaykatti yemeeteh Gidcoonuk : "Naba bahar kin Yalli koolih yane. Aduwaaki lee Midyaan xiyawko Israa-eel garger" akye.

Gidcoon abba asnaamah yitbirrice mazbax lii yine. Yalli Gidcoonuh amaa mazbax yagdalo akah warishe. Gidcoon laakin xiyawko mashshiiteh, baarho bar takkendah ilaale. Sarrah amaa mazbax yigdileyaako dhacto-dhacto akko abe. Amaa asnaamah mazbax alle yinekkehi agaagalle lel cusub mazbax abeyaako Yallah sadaqha alle abe.

Malammit max amaa xiyaw amaa mazbax yiggidileyaako cayniteh yinem yublin gedda mangum kurrayen. Gidcoon yagdafoona lel kaa care fanah yedeyin. Kaa abba laakin: "Aymihi sinni yalla xattoona fadhdhaanam? Yalla yekkemko ishe dhawrhoo" ake. Usuk tayim yerhxemhi sabbatah lel Gidcoon magdafinnooni.

Sarrah Midyaan xiyaw malammih Israa-eel xiyawko garacoona yemeetin. Usun lel mangah loyyiiminnixoonim kii yinin. Gidcoon Israa-eel xiyawuh tenlih dhibbawna inkidde akah deecime. Israa-eel gargeero ciloh kaa atneefecik yanem yaythammato ciloh Gidcoon Yalla lamma ishaara kaa essere.

Erherh ishaarah, Gidcoon ciidot anada baarholle sidisheyaako dhaxiinit asxayta aki baarholle radekkah amaa anadalle bisah raddo Yalla essere. Yalli lel mayim abe. Malammit bar lel baarho unnayteyaako amaa anada kafinih racto esserime. Israa-eel xiyaw Midyaan xiyawko gargeero Yalli kayya yatnaafaco kinam lel Gidcoon ta lamma ishaarah yeemene.

Israa-eel xiyaw caskarko 32,000 Gidcoon fanah yemeetinhaaki, Yalli tamari yemmengin ake. Amaymih lel Gidcoon dhibbaako mashshittamko 22,000 ten dik ten yedebbe. Yalli Gidcoonuk ku labha kado gantah mangum yemmengin ake. Amaymih, Gidcoon 300 caskartiyaako bextih ractem inkoh ten dik ten yedebbe.

Amaa bar Yalli Gidcoonuk: "Aduwaaki Midyaan xiyaw macaskar fanah obteh usun yarhxiinim toobbemko mashshiita racto makito" ake. Amaymih, amaa bar, Gidcoon amaa macaskar fanah oobeh wuli Midyaan xiyaw caskarti wuli soonoh yublem ishi zoobah warishak yoobbe. Amaa labhattih zoobatti: "Ta soonoh macna Gidcoon maxaarhi Midyaan xiyaw maxaarho yascaroona kinon yaanam kinni!" ake. Gidcoon tayim yoobbe gedda Yallah yucbude.

Sarrah Gidcoon ishi caskar fanah gaxeh babbarhi gashsha, kallat citro kee shiig akah yoxoye. Amaa Midyaan xiyaw alle dhiinak yinin macaskar lel makar-ishen. Gidcoon 300 caskartiya Midyaan xiyaw amaa shiig ifo yabliinimko shiig citrorudde hayen.

Sarrah, Gidcoon caskar citror inkoh inki waqhte yigdiliniyaako, gar-heeko amaa shiighi gira faaken. Sinni gashshush yootokiinih lel: "Sef Yahweh kee Gidcoonuh!" yeenih andhaxen.

Yalli Midyaan xiyaw akah yamlalakkiiniikah akko abeyaako sitta yaatakoona erherhisheenih sittiya yigidifin. Akkanih lel amaa racte Israa-eel xiyawah Midyaan xiyaw yayraraddoona ten carwaako akah deecimen. Tenko mango mara akko yigdifiinih lel amaa ractem Israa-eel xiyaw baarhooko ten hadanen. Amaa max Midyaan xiyawko 120,000 raben. Yalli Israa-eel gargeereh yine.

Amaa xiyaw Gidcoonuk nugus akko aboona farhen. Gidcoon amayim aboona akah masmaxinnaaki, amaa usun inkoh Midyaan xiyawko beyeenih yinin dahab khawattim akah yaxawna ten essere. Amaa xiyaw lel Gidcoonuh mango dahab akah yoxoyin.

Sarrah Gidcoon amaa dahabko naba qashshi saritak yinetiya balik kin mece sareena abe. Amaa xiyaw laakin tamaa asnaam balik akko abeenih akah yacbadoona erherhishen. Amaymih Yalli Israa-eel asnaamah yucbudiinimhi sabbatah malammih yiqhtsice. Yalli ten cangit akah ten yasciriinikah akko abe. Usun abayshimalle, Yalla malammih xatoh kaa esseren, Yalli lel aki gargeereena akah dhirhiye.

Taginalem mango gedda gabbabbaacitte: Israa-eel xiyaw lee ansirik, Yalli lee ten aqhtsicik, usun lee atoobik, Yalli lee gargeereena akah dhirhiyak. Mango iggiditidde, Yalli Israa-eel xiyaw ten cangitko ten naggoyishshe mango gargeereenit dhirhiye.

Abayshimalle, amaa xiyaw umman aki wathun nugus akah lii yiniiniika balih, Yalla nugusuh Kaa esseren. Usun dherhtiya kee quwa leh dhibadde ten santisho dhiica nugus farhen. Yalli ta essero makxaninnaahaaki, usun akah kaa essereeniikah akax yoxoye.

Quddus kin Kitaabhi zanta: Daanayti 1-3; 6-8