35. Naxrurta-le abbahi zanta

Wuli max, Yeesus mango gibre yaskattit kee zambi-wannun kaa taabbo teketteya aydurisii yine.

Diin manabottitko gari amalle tineya lel Yeesus amaa zambi-wannun zooba balih ten ablii yubliniyaako sinne-sinneh kaa cadaloona erherhishen. Amaa gedda Yeesus ta zanta akah warishe.

“Wuli lamma barha le xiyawti yine. Amaa xiddagliido ishi abbak: 'Abba, anu inni miiraas kado farhak aniyo' ake. Amaymih abba ishi iraaro lamma barhah xaziile."

“Akkanih lel amaa xiddagliido inkok lii yinem yesseketteh dherh baarho yedeyeyaako ishi solaadi uma xibaradde yeylee."

“Amaymik sarrah, amaa xiddagliido alle yinelle sirii culul sayeyaako usuk macaasha akko dhaamita solaadi waye. Sarrah, bisah geyo dhiice shuqhle yibbirhe, amayim lel xasama bettiishaanam kii yine. Umaatih yine, sarrah lel mangum safriitemhi sabbatah amaa xasamat folo beeto farhe."

"Abayshimalle, amaa xiddagliido ishi rooxek: 'Ayim abak aniyom?' yerhxe. Yabbah casbentit inkoh ten dhicta macaasha lon. Anu laakin talle cululuh rabak aniyo. Edeyeyaako yabbak 'ku casbento akko farhak aniyo' akko arhxo kiyo."

"Sarrah, amaa xiddagliido ishi abbah dik fanah gaxe. Usuk mirixtalle aniikoh kaa abba kaa yubleh mangum kaa naxruuruse. Ishi barha fanah yerdeh lel kaa galeeliyeyaako kaa fugute."

"Amaa barhi abbak: 'Abba, koo kee Yallih nifidde zambe abe. Anu ku barha akko yoh meedda" ake.

"Kaa abba laakin ishi casbentitko tiyak, 'Iba lacteh aduwaaki mece sara bahteh yi barha sarish!' ake. Kaa gabadde khaatim, kaa ibadde lel kabel akah haa. Yi barhi rabeh yinemko aniinalle gaxeh yanemhi sabbatah xafla abinno kinnik ummannimko doorte ruga bahteh urxud! Usuk yeleeh yinemko kaado geytimeh yane!'"

"Amaymih, xiyaw xafla aboona erherhishen. Ummanimko basolle amaa naba barhi zibolle ashtuqhulii yinemko yemeete. Usuk muziqqa kee rigdo yoobbe gedda akkii tanemhi cibrah rabe."

"Amaa naba barhi kaa sacal careh yemeeteh yinemhi sabbatah xafla abaa yiniinim yeerhege gedda, mangum kurrayeyaako caredde orobo xine. Kaa abba alle yewceyaako tenlih yaxtafalo kaa dhaacime hanik, buurh-ishite."

"Amaa naba barhi: 'Anu inkoh ta iggidit macna kee makkoh koh ushtuqhule! Anu, atu yoktem xineh maarhige hanik, inni kaxantoolitlih xafla akko abito walaa cindhaa lax yoh toxoyeh mitaarhige. Ku solaadi uma xibaradde yeylee ta ku barhi yemeete gedda laakin doorime ruga akah turxude!"

Abba: "Yi barhaw, atu umman gedda yoolih tanito, tamaa anu liyom lel inkoh koyyah kinni. Ku sacal rabeh yimeko gaxeh yanemhi sabbatah laakin nanu xafal abinno xaqqe lino. Usuk yeleeh yimeko kado geytimeh yane!'" yeh alle deheye.

Quddus kin Kitaabhi zanta: Luukas 15:11-32