18. Barhsimte nigsinna

Mango iggiditik sarralle, Dawud rabeyaako kaa Suleymaan kaa barhi Israa-eelille reezo erhirhishe. Yalli Suleymaanlih aalih waanisheyaako ziyaada ayim farham kaa essere. Suleymaan kas kaa essere gedda, Yalli xedeneyaako caalamalle ummanimko kasletiya akkabe. Suleymaan mangum yudruseyaako mango kas le daaniya yekke. Yalli lel naba gaddaale akkabe.

Suleymaan tamaa kaa abba abo yexeesebeh nuwaa gantah akko yesketteh yine Maqhdas Care Yerusaalemille abe. Xiyaw kado tamaa Rakhbi Tendadde abaanamhi idhdhah Maqhdas Caredde Yallah yacbadoona kee sadaqha aboona dhiicen. Yalli yemeeteh amaa Maqhdas Caredde yine. Amadde lel ishi xiyawlih maraa yine.

Suleymaan laakin aki wathunhi sayyo kixinii yine. Mango sayyo, wuli 1000 takkeya, marcisheteyaako lel Yalla yaabbo xine! Ta sayyooko mango mari lel aki wathunko temeetem yekkiinih sinni yallit sinneelih bahiteniyaako sinni yallit hi cibaada daw-ishinnixem kii yinin.

Yalli Suleymaanalle mangum alle kurrayeyaako Suleymaan thalumehi maqhtsactih Israa-eel wathan Suleymaan rabiiko sarrah lamma nigsinnalle barhisho kinamah cahde saye.

Suleymaan rabek sarrah Rexabcaam kaa barhi nugus yekke. Rexabcaam duuda kii yine. Umbuka Israa-eel dik hi xiyaw kaa yaynagasoona inkidde yekkiinih lel nugus akkaben. Suleymaan mangum ten ayshuqhuli yinem kee mango gibre ten askifilii yinemhi tharaaco lel Rexabcaam fanah baahen.

Rexabcaam lel ishi duudiinoh: "Yabba mangum sin yuyshuqhulem tekkelinhaaki, anu kaako ziyaada sin ayshaqhalo kiyo, kaako umaatih lel sin aqhtsaco kiyo" yeh eldeheye.

Israa-eel dikko tamana kisho Rexabcaam diddeh uguten. Lamma kisho bisah kaalih raacen. Ta lamma kishosh lel Yahuudaati nigsinna yekkin.

Tamaa aki Israa-eel dik hi tamana kisho Rexabcaam diddeh ugutteya Yaarobcaam akyan nugus yesseecin. Sinni nigsinna lel amaa baarhoh qilbat zifralle dhisheniyaako Israa-eel nigsinna aken.

Yaarobcaam Yallih diddeh uguteyaako amaa xiyaw zambedde akah saanaakah akkabe. Kaa xiyaw Yahuudaati nigsinnahi Maqhdas Caredde Yallah yacbudiinim hidhdhah kah yacbadoona lamma asnaam akah abe.

Yahuudaati nigsinna kee Israa-eel le caduwa yekkiniyaako wuli gedda sittiyaalih angaaci yinin.

Cusub Israa-eel nigsinnadde, nuguusa inkoh uma mara kii yinin. Ta nuguusaako mango mari lel aki ten caradde nuguusa takko fadhdha Israa-eel xiyaw gabah rabtem kinon.

Inkoh amaa nuguusa kee amaa Israa-eel nigsinnah xiyawko mango mari asnaamah yucbudin. Ten cibaada asnaamah abeniya lel zina kee wuliili gedda irro gantah asiddiqhi yinin.

Yahuudaati nuguusa Dawudko raddam kinon. Ta nuguusaako gari mece mara, cadleh taxkumeh Yallah tacbudeya kii yinin. Yahuudaati nuguusaako mango mari uma mara, masxittem kee asnaamah tacbudem kii yinin. Amaa nuguusaako gari inkinnah sinni irro asnaamah tasiddiqhem kii yinin. Yahuudaati xiyawko mango mari gantah Yallih diddeh uguteenih aki yallitih tucbudem kinon.

Quddus kin Kitaabhi zanta: 1 Nuguusa 1-6; 11-12