19. E prorokura

Maškari celo istorija tare Izraelcura, o Dol bičhalda prorokuren. E prorokura šunde e Devlese habera taro Dol thaj vačarde e narodose.

O Ilija sasa proroko kana o Ahav sasa caro taro Izraelsko carstvo. O Ahav sasa bilačho manuš thaj čuta e manušen te klanjinpe hohavne devlese kaso alav sasa Vaal. O Ilija vačarda e Ahavese: "Ni ka avol bršnd thaj rosa ano Izraelsko carstvo dok me ni vačarav." Gova čerda e Ahave but holjame.

O Dol vačarda e Ilijase te đal đi ko jekh potoko ani pustinja thaj te garadol taro Ahav kaj manglja te mudarol le. Svako sabalje thaj rat, e čiriklja ande lese mas thaj mangro. O Ahav taj lese vojnikura rodije e Ilija, al naštine te aračhen le. O šučipe sasa gači zuralo kaj i o potoko šučilo.

Gija o Ilija đelo ane aver phuv. Jekh udovica thaj lako čhavo ačhile bizo hape kaj sasa šučhipe ki sa i phuv. A von dikhlje e Ilija, thaj o Dol čerda gija kaj lenđi posuda e aresa thaj e uljesa ni sasa čuči. Sasa len hamase ke kava bukhalipe. O Ilija ačhilo gothe berš đive.

Pale trin tepaš berš, o Dol vačarda e Ilijase te iril pe ano Izraelsko carstvo te vačarol e Ahavese kaj ka bičhalol bršnd. Kana o Ahav dikhlja e Ilija vačarda: "Kate san, tu savo ane problemura!" O Ilija vačarda lese: "Tu san gova savo anol problemura. Ačhaden e Jahve, pravone Devle, thaj klanjin tumen e Vaalese. An sa e manušen taro Izraelsko carstvo ko brego Karmel."

Sa e manuša taro Izraelsko carstvo, thaj 450 e Vaalese prorokura, avile ko brego Karmel. O Ilija vačarda e manušenđe: "Đi kana ka predomislin tumen? Ako si o Jahve tumaro Dol, lese služin, ako si o Vaal tumaro dol, lese služin!"

Tegani o Ilija vačarda e Vaalese prorokurenđe: "Čhinen guruve thaj spremin le sar kurbano, a ma phabaren jag. I me ka čerav gova. Dol savo phabarol jag si pravo Dol." Gija e Vaalese prorokura spremisade kurbano, a ni phabarde jag.

Tegani e Vaalese prorokura molisade e Vaale: "Šun amen, Vaale!" Celo đive molisade dije vika pa i čhinde pe čhurikencar, a naj sasa odgovor.

Ko kraj o đive, o Ilija spremisada e žrtva e Devlese. Vačarda e manušenđe te čhoren dešuduj bare čare pajesa pi žrtva po mas, pe kašta thaj pi phuv sa dok naj sasa sa čingo.

O Ilija molisada: "Jahve, o Dol e Avraameso, e Isakoso thaj e Jakoveso sikav avđive kaj san tu Dol taro Izrael thaj kaj sem ćo kandino. Šun ma te bi đanen kala manuša kaj san tu lengo čačukano Dol."

Odma i jag peli taro nebo thaj phabarda o mas, e kašta, e bara, i phuv, thaj i o paj so sasa pašo žrtveniko. E manuša gova dikhlje, pele ki phuv thaj vačarde: "O Jahve so o Dol! O Jahve so o Dol!"

O Ilija vačarda: "Ma mučhen nijekh e Vaaleso proroko te našol." E manuša dolde sa e Vaalese prorokuren, inđarde len gothar thaj mudarde len.

O Ilija vačarda e carose e Ahavese: "Akana iritu ano foro, iril pe o bršnd." Pal gova o nebo kalilo i lija te dolpese. O Jahve ačhada o šučipe thaj sikada kaj si Vov čačukano Dol.

Pale Ilijaso vreme, o Dol birisada e manuše palo alav Jelisije te avol proroko. O Dol čerda but čudura kroz o Jelisije. Jekh taro čudo sasa e Naamanesa, e dušmanengo zapovedniko, save sasa bilačho kožno nasvalipe. Šunda e Elisijese taj đelo o Elisija te sastarol le. O Jelisije vačarda e Naamanese te činđarol pe efta droma ani len o Jordan.

Angleder, o Naaman sasa holjamo thaj ni manglja te čerol gova, golese kaj sasa lese glupo. A kasnije predomislisajlo, činđarda pe efta drom ani len o Jordan. Kana eftato drom činđarda pe, lesi koža sastili! O Dol sastarda le.

O Dol bičhalda buten prorokuren. Von vačarena e manušenđe te ačhaven te klanjinpe e idolurenđe thaj te sikaven i pravda taj milost averenđe. E prorokura upozorisade e manušen te ačhaven o bilačhipe thaj te šunen e Devle, o Dol ka sudil len sar kriva thaj ka kaznil len.

Po but vreme, ni šunde e Devle. But droma ni čerde šukar e prorokurencar a nekad i mudarena len. Jekh drom, e proroko e Jeremija čute ano šuko bunari thaj ačhade le te merol. Ani čik lija te properol ko bunari, a tegani o caro pelo lese žal taj čuta pe slugen te ikalen e Jeremija taro bunari angleder so te merol.

E prorokura i dalje vačarde taro Dol thaj e manuša ni manglje len. Vačarde e manušenđe da o Dol ka uništil len ako ni pokajin pe. A i vačarde e manušenđe zako obećanje da ka avol e Devleso Mesija.

Biblisko paramič andaro: 1 lil e Caronenđe 16-18; 2 lil e Caronenđe 5; Lil e Jeremijaso 38