2. Kənzìtə̀ kə Mbyɨ

Adàm wenə̀ wì ə wen ndìʔ nə̀ saŋlə ghə tsiə a ŋges ə əsɨm yì a Nyìngòŋ ə̀ nshìtə̀ à vəwenə lì. Vəwenə nko mòʔə̀ njisə bwen, a lì kèn la kəchʉ kə wìʔ kə njìʔə̀, byèʔə mbyɨ ŋko dìʔ a mbyi. Və̀wene njèʔə̀ a əsɨm ayì gàʔə̀ wenə̀ və̀ Nyìngòŋ a mənzhʉ a mə nzhʉ.

A lì zhù ə̀ kəmbàŋmbàŋ ətsen ə̀ ndìʔ a əsɨm ayì. Ghə̀ bə̀m à wùwì yì, “Wù gàʔ la Nyìngòŋ ə̀ ngàʔə̀ la kə ghə̀ŋ pfiʔ əshɨ ə fəkòʔ fa fəkòʔ fətsen a əsɨm yèn a?”

Wuwì yì bwìnsə̀, “Nyìngòŋ ə̀ ngàʔə̀ la yès zì yès pfiʔ noʔə̀ ashɨ ə nkòʔ əntsèm ə̀ kye tà əshɨ ə fəkòʔ fyì a fə nèə̀ wìʔ kɨə njùŋ nə̀ mbyɨ lì. Nyìngòŋ gàʔ la sətsèn yès pfiʔ, ko yès kùm noʔə̀ tà kùmə yès a pfɨ.

Zhù yì bwìnsə̀ gàʔ à wùwì yì, “A ko dìʔ nə̀mwìn! Ghə̀ŋ ə ko a pfɨ. Nyìngòŋ ə̀ kɨ li la sətsèn ghə̀ŋ pfiʔ ashɨ ə ghə̀ŋə à bòʔtə̀, ghə̀ŋ tòf, ə̀ kɨ̀ə̀ njùŋ bènə̀ mbyɨ ta nə̀ wen.”

Wuwì yì yen la əshɨə fəkòʔ ayì ŋkə̀ʔə̀ bòŋə̀ bɛ fwomə. Andə ghə̀ ŋkòŋə̀ ətof, ghə̀ kwòŋə̀ pfiʔ. Ghə̀ pfiʔ ə̀ ku lɨm ə wen a ghə̀ ndìʔə wenə̀ wen, ŋkà wen pfiʔ.

Ə sə bvɨ̀tə̀ ashɨ ə vəwenə bòʔtə̀, vəwenə yen la vəwenə dìʔ nə̀ ənàʔə̀ ntsuʔ. Vəwenə tàŋkə̀ ə bo təfʉ ə tam a nə̀ njisə.

Sətsèn wulɨm yì wenə̀ wì ə wen zhʉ Nyìngòŋ jèʔə̀ vì a chì əsɨm ayì. Vəwenə nyɨŋ ə lyòmtə̀ fà Nyìngòŋ. Nyìngòŋ dzàŋ wulɨm, “Wù dìʔ fenə a?” Adàm bwìnsə, “Mà yì zhʉ tà àndə wù ə jèʔə̀ vì a əsɨm, mà ə mfwayn, ə lyòmtə̀ byì àndə mà dìʔ nə̀ kənàʔ kə ntsuʔ.”

Nyìngòŋ bə̀m a wen, “A gàʔ ndə̀ à wù la wù dìʔ nə̀ kənàʔ kəntsuʔ kə a? Wù ə bɛ yì pfiʔ əshɨ ə fəkòʔ yì a mà ntensə la kə wù pfiʔ lì?” Adàm bwìnsə̀ gàʔ à Nyìngòŋ, “Wù ŋku wuwì yèn à mò, ghə̀ ə ŋku əshɨə fəkòʔ ayì à mò.” Nyìngòŋ bɛ̀ bə̀m à wùwì, “A dìʔ kənyʉ̀ kə̀ kɔ̀ á wù mwòmə̀ lə̀?” Wuwì bwìnsə̀ gàʔ, “A yì lòbtə zhù nlobtə mò.”

Nyìngòŋ gàʔ à zhù, “Wù ə lu yenə ngəʔ! Wù ə lu nsì à wù əbə̀m bɛ zhɨə kətsòʔ. Kəbàyn kə lu ndìʔ à ghə̀ŋə̀ kəntintìn, vunə vyəŋə nə̀ vunə vunə ə lu nkyiʔ kəbàyn. Vunə wuwì ə lu nghòmə̀ kəchʉ kyə̀ sàstə̀, wù lɨmə ətsɨŋ ə kəwʉ ə̀ wən.”

Nyìngòŋ gàʔ à wuwì, “Mà a nè ə kəbwi kə nto à wù noʔə̀ nànto. Wù a nku lɨm ə̀ wù, ghə̀ soʔə wù.”

Nyìngòŋ gàʔ à wùlɨm, “Wù yì zhʉ wì ə wù nto kəchʉ à mò. Mà ə byɨfsə li nse luwèn, nwʉ la wù a nshyèʔə̀ mimbu əfozhɨ və nkwiə. Wù ə ne pfɨ əwen ə wù ə bwìnə̀ djʉ̀ a kətsoʔ.” Wùlɨm chʉ əzhiʔ wì ə wən la If, à dìʔ “wù kəbwi,” byì àndə ghə̀ a ndìʔ lì viʔ vətsèm. Nyìngòŋ ku gʉ̀ nyàm a Adàm wenə̀ If vəwenə mòʔ.

Nyìngòŋ gàʔ, “luwèn tà àndə viʔi kɨ li njùŋ fa mbyɨ ə sə dìʔ tà a nə yès lə̀, mà ə ko a kye vəwenə pfiʔ əzhɨə fəkòʔ fə bwòŋ ə sè a mbyi kèn la vəwenə benə a pfɨ.” Nyìngòŋ mə dzɨm Adàm wenə̀ If fa ŋges ə̀ əsɨm yì. Nyìngòŋ wʉ ntsɨ̀ŋsə əngə̀ŋ ə̀ Nyìngòŋ a ə̀chʉ ə əsɨm ayì ti vəwenə tùʔmə̀ la kə wìʔ pfiʔ əzhɨ ə fəkòʔ fə bwòŋ afyì.

Fətitì fa nwàʔlə̀ ə̀ Nyìngòŋ//: Jènesìs 3//