26. Yesù Zìtə̀ Əshyèʔ ə Wen

Yesù nchòə̀ li fa təmwòmsə̀ tə Satà àyn tyì Kəzhwì kə̀ nwoʔə kə bwìnsə̀ vìsə̀ wen ghə̀ sə̀ tsiə a Galìli. Yesù njèʔə̀ kaʔə̀ ziʔə̀ viʔi. Noʔə̀ viʔ vətsèm ə ngàʔə̀ ə gàʔ ə̀ juŋə ghə byì wen.

Yesù ə̀ ndjʉ̀ə̀ li a Nazarèt, a dìʔ kəshi a ghə̀ nkwiə tsu. A ndìʔ a kətsi kə kuʔsə Nyìngòŋ ghə̀ djʉ̀ a əngə̀ŋ ə̀ Nyìngòŋ. Və nku li nwàʔlə̀ Asayà a wen la ghə̀ dzàŋ. Yesù ə̀mbòʔə̀ li kəshi fa tsu ə̀ dzàŋ a viʔi.

Yesù dzàŋ, “Nyìngòŋ ə̀ ku li kəzhwì kə wen à mò la mà shə̀ʔtə̀ əgàʔ ə wen a viʔi kəmfem, ə̀ shìsə̀ viʔi fa mfɨŋ, ə̀ nè viʔi və fɨfkə̀ və yen əshi, ə̀ bwòŋsə̀ viʔi fa kəkòs. Ə yèn dìʔ ə̀ ngwʉ̀ʔ a Nyìngòŋ a bwòŋsə̀ viʔi ə wen.”

Yesù ə̀ nwʉʔmə li a nse. Noʔə̀ viʔ vətsèm ə nkyiʔə wen. Vəwenə nkɨə kəshi akyì a ghə̀ ndzàŋə̀ li, kɨ la kə gàʔə̀ byì Mèzayà. Yesù gàʔ, “Ənyʉ̀ vənə a mà dzàŋə̀ à ghə̀ŋ lə̀ və chòə̀ luwèn.” Kənyʉ̀ əkyikə nghoʔ li viʔi, və bə̀m. “A ko dìʔ wàyn ə̀ Jòsef lə̀?”

Yesù gàʔ, “A dìʔ nə̀mwìn la və ko nə mbyɨmə nshə̀ʔtə̀ a wenə əloʔ. A ndìʔ a kəlyɨŋ ə̀ nshə̀ʔtə̀ ə Elajà, kyìʔi ə mpfʉə ndìʔ a əloʔ ə Isrèl tà à a kədɨ̀ŋ. A ngwʉ̀ʔ shì sə̀tà aʔ a əwʉ nko nvìə̀ lì Nyìngòŋ ə̀ mbòŋsə̀ tɨm Elajà la ghə̀ djʉ̀ ə̀ gyàmtə̀ wùwì ə mpfʉ a əloʔ ə kəjàŋ, ghə̀ ə nko ntɨmə wen a wùwì ə mpfʉ a əloʔ ə Isrèl bwen.”

Yesù bɛ̀ gàʔ, “A ndìʔ a kəlyɨŋ ə̀ nshə̀ʔtə̀ ə Elishà, Viʔi ndìʔ a a əloʔ ə Isrèl tà a kədɨ̀ŋ nə̀ nkàsə a vəwenə təwen. A lì Elishà nko chʉʔ wìʔ fà vəwenə. Ghə̀ mbòŋsə̀ chʉʔ Namàn, a dìʔ kəchʉ kə vəsugèʔ və viʔi ə kəbàyn ə̀ Isrèl.” Viʔi a və nzhʉtə Yesù ndìʔ Vəju. Vəwenə zhʉ ənyʉ̀ a ghə̀ ə gàʔə̀ tyinsə vəwenə sə fwi.

Viʔi Nazarèt ə gùf Yesù fa əngə̀ŋ ə̀ Nyìngòŋ ə̀ djʉ̀ nə̀ wen a kəchʉ kə bam la və a djʉ̀ ə mòʔə̀ wen ə zhwi. Yesù bòŋsə̀ jèʔ ə̀ chò fa ntìntìn ə̀ viʔi ə̀ lù fa Nazarèt.

Yesù sə̀ jèʔə̀ djʉ̀ a chì ə̀ Galìli shə̀ʔtə̀ kənyʉ̀ kə Nyìngòŋ, ngwàʔə̀ viʔi vìə̀ zhʉtə wen. Və nvìə̀ nə̀ viʔ vəkwaʔkə və, viʔi kəmfɨ̀f, viʔi kəmpfɨ̀ʔtə̀, vəbɨbɨ̀, Yesù chʉʔə vəwenə.

Və nvìə̀ nə̀ kədɨ̀ŋ kə viʔi kəbwìn a Yesù a və nkyìʔə əzhɨ à vəwenə təbə̀m. Yesù nsoʔ li vəzhɨ avyi və fʉ̀kə̀ fa təbə̀m ə viʔi kəbwìn avyi. Və li fʉ̀ zɨmə̀, “Wù dìʔ Wayn ə̀ Nyìngòŋ!” Kənyʉ̀ əkyikə nchòə̀ li viʔi avyi vəwenə sə kuʔsə Nyìngòŋ.

Yesù mə̀ tsuʔ viʔi njù sə̀bò ə̀ dzàŋ nə̀ ndzìmtə̀ sə wen. Ndzìmtə̀ sə wen ashìsə ə̀ njèʔə̀ wenə̀ və Yesù ghə̀ ziʔə̀ vəwenə.

Fətitì fa nwàʔlə̀ ə̀ Nyìngòŋ//: Machò 4:12-25; Mak 1:14-15, 35-39; 3:13-21; Luk 4:14-30, 38-44//