45. Stivə̀n wenə̀ Filib

Stivə̀n ə̀ ndìʔ wìʔ fa bisə viʔi a və nghaʔ kənyʉ̀ kə Nyìngòŋ ke to. Viʔi nkɨə wen noʔə̀ nkàyn kɨ la a dìʔ wu juŋə kiʔ Kəzhwì kə nwoʔə kə bɛ̀nə̀ ətof. Stivə̀n ə nèə̀ li ənyʉ̀ ə̀ kanə və tà a kədɨ̀ŋ ə̀ shə̀ʔtə̀ a viʔi la kə bòŋ la vewenə byɨmə à Yesù.

Əchʉʔ ə tsenə ghə, Stivə̀n sə ngàʔə̀ kənyʉ kə Nyìngòŋ, Vəju vətsenə və a və nko byɨmə a Yesù və zìtə̀ ə̀ sə̀ taŋmə wenə̀ və̀ Stivə̀n. Tyinsə vəwenə sə mfwi li vəwenə djʉ̀ ə̀ zhò ntsɨ̀ŋ byì Stivə̀n à əchʉ əchʉ ə əngə̀ŋ ə̀ Nyìngòŋ. Vəwenə gàʔ, “Yès yì zhʉ wìʔ yèn gàʔə̀ ənyʉ̀ ə̀ byɨfə və byì Musìs bɛ̀nə̀ Nyìngòŋ!” Əchʉ əchʉ ə əngə̀ŋ ə̀ Nyìngòŋ ə mə̀ ghaʔ Stivə̀n ə̀ djʉ̀ nə̀ wen à kəchʉ kə nshə̀ʔtə̀sə ə̀ əngə̀ŋ ə̀ Nyìngòŋ wenə̀ əchʉ əchʉ ə Vəju vətsenə və, viʔi vətsenə və bɛ̀ kwʉ̀ʔsə̀ ndzɨ̀ŋ sətsen byì Stivə̀n.

Kəchʉ kə nshə̀ʔtə̀sə ə̀ əngə̀ŋ ə̀ Nyìngòŋ kə bə̀m à Stivə̀n, “A dìʔ nə̀mwìn à?” Stivə̀n zìtə̀ ə̀ shə̀ʔtə̀ ənyʉ̀ ə̀ kanə və à vəwenə a Nyìngòŋ ə nèə̀ li fa kəlyɨŋ kə Abàham ə zaʔə a kəlyɨŋ ə̀ Yesù, a lì viʔi ə Nyìngòŋ toə kəchʉ tà toə a wen. Ghə̀ bɛ̀ gàʔ, “Ghə̀ŋ ə viʔi ə toə kəchʉ ghə̀ŋ ə chen li Kəzhwì kə nwoʔə kə, tà a jì a vətìʔ ə vəŋə ə̀ nchen Nyìngòŋ fa tsu ə̀ zhwilə nshə̀ʔtə̀ sə wen. Ghə̀ŋ ə nnèə̀ li kənyʉ̀ a kə byɨfə chò kə vəwenə kə! Ghə̀ŋ ə nzhwi li Mèzayà!”

Əchʉ əchʉ ə əngə̀ŋ ə̀ Nyìngòŋ avyì nzhʉ li wokèn kə zaf vəwenə ə̀ chòsə̀, vəwenə chiʔtə̀ ətyiʔityiʔi vəwenə ə̀ zɨmə. Vəwenə gùf Stivə̀n ə̀ fʉ̀ fa chì əloʔ ə̀ temə wen nə̀ ngùʔsə ti zhwi.

Stivə̀n sə mpfɨə djʉ̀ə̀ ə̀ gàʔ, “Yesù, shisə kəzhwì ə̀ kom.” Ghə̀ shiə a wen ə nchiʔsə alwi ə̀ jɨ̀m, “Masà, lyèsə̀ ə̀ ku vəwenə.” Ghə̀ mə̀ pfɨ.

Wùlɨm ə tsen a və ndzàŋə̀ nə̀ Sɔ nkòŋə̀ li tà àndə və nzhwi Stivə̀n. Sɔ ə̀ ntsɨ̀ŋə̀ njisə viʔi a və ntəmə Stivə̀n nə̀ nkuʔsə li. Əzìtə̀ fa zòyn ayì viʔi sə̀ nyàblə̀ nə̀ viʔ və byɨmə və a Jèlusalèm, vəwenə sàskə̀ ə̀ djʉ̀ a təloʔ tə kəjàŋ. Tɛ̀ a lì, vəwenə ngàʔə̀ djʉ̀ byì Yesù noʔə̀ fənə a vəwenə ndjʉ̀ə̀.

Ndzɨ̀mtə̀ ə̀ Yesù ətsen və dzàŋə̀ nə̀ Filib ndìʔ fa viʔi a və nnyɨŋə fa Jèlusalèm byì ngəʔ a viʔi nkuə à viʔ və byɨmə və. Ghə̀ nyɨŋ ə̀ djʉ̀ a Sàmalyà ə̀ sə̀ shə̀ʔtə̀ byì Yesù tsu. Viʔi mbyɨmə li noʔə̀ vəghoʔə. Kətsi kətsen, ntsɨ̀ŋ ə̀ əngə̀ŋ ə̀ Nyìngòŋ gàʔ a Filib la ghə̀ djʉ̀ a jì ətsen ghə̀ zɨmə tà la kwas. Tà àndə ghə̀ njèʔə̀ djʉ̀ə̀ a jì ayì, Filib yen wù əloʔ ə Itopyà ə ghoʔə tsen à wen ə məntù. Kəzhwì kə nwoʔə kə gàʔ a Filib la ghə̀ djʉ̀ ə̀ gàʔ à wìʔ ayì.

Filib djʉ̀ a wen ə məntù amyì ə̀ zhʉ ghə̀ dzàŋə̀ fa nwàʔlə̀ Azayà. Wìʔ ayì dzàŋə̀, “Vəwenə ntensə ə wen tà a nə̀ byìnjɨ̀, a nə̀ byìnjɨ̀, ghə̀ djʉ̀ə̀ tà à chì a chi. Vəwenə nyàblə̀ nə̀ wen, ə̀ zhwiə wen.”

Filib bə̀m à wù əloʔ ə Itopyà ayì, “Wù zhʉ ətof a kənyʉ̀ a wù dzàŋə̀ lə̀ à?” Wù əloʔ ə Itopyà bwìnsə̀, “Aiʔ. Wìʔ dìʔ kə shə̀ʔtə̀ à mò ko mà əzhʉ ətof tsu bwen. Nsensen vì nwʉ̀ʔmə̀ à mò ə ben. Azayà nnyoʔə̀ byì wen mula ghə̀ nnyòʔə̀ byì wù kəjàŋ à?”

Filib shìtə̀ shə̀ʔtə̀ à wù əloʔ ə Itopyà la Azayà nnyòʔə̀ byì Yesù. Filib shə̀ʔtə̀ byì Yesù a wen fa əshi nwàʔlə̀ Nyìngòŋ ə kəjàŋ.

Andə Filib wenə̀ wù əloʔ ə Itopyà ayì ndjʉ̀ zaʔə a muʔu məntsenə mə̀. Wù əloʔ ə Itopyà yì gàʔ, “Yen a! Yen muʔu a fà a! Ku muʔu à mò?” Ghə̀ gàʔ à ngùf ə̀ wen la ghə̀ tɨmə.

Vəwenə shiə ə̀ djʉ̀ a muʔu amyì, Filib ku muʔu à wù əloʔ ə Itopyà ayì. Vəwenə fʉ̀ fa a muʔu amyì, Kəzhwì kə nwoʔə kə lyɨ̀ Filib ə̀ djʉ̀sə̀ a kəshi kə kəjàŋ ghə̀ bɛ̀ sə̀ shə̀ʔtə̀ djʉ̀ə̀ byì Yesù.

Wù əloʔ ə Itopyà sə̀ pfwoə tà wen, saŋlə djʉ̀ la yì ə kɨ li Yesù, mbyɨmə a wen.

Fətitì fa nwàʔlə̀ ə̀ Nyìngòŋ//: Aks 6:8-8:5; 8:26-40//