46. Pɔ Byɨmə à Nyìngòŋ

Sɔ ə̀ ndìʔ wìʔ yì a ghə̀ ntsɨ̀ŋə̀ njisə viʔ lyʉmə vyi a və nzhwi Stivə̀n lì. Ghə̀ ə nko byɨmə a Yesù bwen ə̀ sə̀ kəŋə jì ə sàs viʔ və byɨmə və. Ghə̀ njèʔə̀ fa təchʉ̀ tə aloʔ a Jèlusalèm ghaʔtə lyʉmə nə̀ kyìʔi və byɨmə və djʉ̀ə̀ wyeə a mfɨŋ. Kəchʉ kə nshə̀ʔtə̀sə ə̀ əngə̀ŋ ə̀ Nyìngòŋ kə bɛ̀ ku nwàʔlə̀ a Sɔ la ghə̀ djʉ̀ a Dàmaskùs ə̀ djʉ̀ ə̀ ghaʔtə viʔ və byɨmə və fa tsu ə̀ vì nə̀ vəwene a Jèlusalèm.

Sɔ ə̀ ndìʔ a jì djʉ̀ə̀ a Dàmaskùs, əshi bvɨ̀tə̀ ə̀ bayn a wen ə̀kə̀ʔ, ə̀ fəŋ a nse. Sɔ ə̀ zhʉ gɨ̀ gàʔ a wen, “Sɔ! Sɔ! Wù ku ngəʔ ə̀ ghɔ̀ à mò a?” Sɔ bə̀m, “Masà, wù dìʔ ndə?” Yesù bwìnsə̀ a wen, “Mà dìʔ Yesù. Wù sàsə̀ viʔi ə vwomə!”

Sɔ sə lù fa nse mu ghə̀ fyɨ̀fə̀ li. Və jìʔ jì a wen ghə̀ djʉ̀ a Dàmaskùs. Sɔ ə̀ ntsi li məntsi ə̀ ntaʔ ghə̀ ə ko zhɨ kəfo kèn la ghə̀ ə nyʉ li kəfo.

Ndzɨ̀mtə̀ ə̀ Yesù ətsen ndìʔ a Dàmaskùs əzhiʔ ə wenə dìʔ Anàyas. Nyìngòŋ gàʔ a wen, “Djʉ̀ə̀ a əngə̀ŋ a Sɔ ə tsiə tsu ə̀ nyə̀ŋsə̀ avu ə wu a wen əwen ti ashɨ ə wenə bwìnsə̀ bòʔtə̀.” Anàyas gàʔ, “Masà, mà ə zhʉ li jì a wìʔ yen ə bànə̀ viʔ və byɨmə və fa tsu ghaʔtə vəwenə djʉ̀ə̀ wye a mfɨŋ.” Nyìngòŋ bwìnsə̀ gàʔ, “Djʉ̀ə! Mà ə tsuʔ li wen la ghə̀ shə̀ʔtə̀ byì mò à Vəju bɛ̀nə̀ viʔi təloʔ tə kəjàŋ. Ghə̀ a yenə ngəʔ byì mò.”

Anàyas mə̀ djʉ̀ a Sɔ, ənyə̀ŋsə̀ avu a wen əwen, ə̀ gàʔ, “Yesù, a ghə̀ nvìə̀ à wù a jì tà àndə wù nvì a shə̀ li yì tɨm mò à wù ti ashɨ ə wù ghə bòʔtə̀ Kəzhwì kə nwoʔə kə kwen a wù ətyɨm.” Tà a əzhʉ ayì ashɨ ə Sɔ bòʔkə̀ ghə̀ bɛ̀ sə̀ yenə əshi, Anàyas ku muʔu a wen. Sɔ zhɨ kəfo kəjoʔ kə bwìnə̀ vì a wen əwen.

Sɔ mə̀ zìtə̀ tà a əzhʉ ayì ə̀ sə̀ shə̀ʔtə̀ kənyʉ̀ kə Nyìngòŋ a Vəju a Dàmaskùs, ghə̀ ngàʔə̀, “Yesù dìʔ Wàyn ə̀ Nyìngòŋ!” Vəju ə ndìʔ nə̀ kanə la wìʔ a ghə̀ nsàsə̀ viʔ və byɨmə və nkaʔkə li ə̀ byɨmə à Yesù! Sɔ ə̀ nshə̀ʔtə̀ li à Vəju la Yesù ndìʔ Mèzayà.

Məntsi nchòə̀ li mənshə̀ʔ a lə̀ Vəju kəŋ jì a vəwenə a zhwi Sɔ. Vəwenə tɨm viʔi la və djʉ̀ kəŋə wen fa chi əloʔ ə̀ zhwi. Sɔ ə̀ zhʉ li kənyʉ̀ a vəwenə kə nè, viʔi ndoŋsə ə wen gyàmtə̀ wen ghə̀ nyɨŋ. Və nshiʔsə wen fa wèn əŋgə̀ŋ a chì ə̀ nkyè nə̀nchʉʔə. Sɔ ə̀ nyɨŋ fa Dàmaskùs ə̀ sə̀ gàʔə̀ kənyʉ̀ kə Nyìngòŋ djʉ̀ə̀.

Sɔ ə̀ ndjʉ̀ə̀ li a Jèlusalèm ə yen ndzɨ̀mtə̀ sə Yesù, vəwenə sə̀ fwànə̀ wen. Wu byɨmə ətsen və dzàŋə̀ wen nə̀ Bànabàs lyɨ̀ Sɔ ə̀ djʉ̀ kwetə ndzɨ̀mtə̀ sə Yesù ə̀ shə̀ʔtə̀ à vəwenə la Sɔ ti ngàʔə̀ kənyʉ̀ kə Nyìngòŋ a Dàmaskùs. Ndzɨ̀mtə̀ sə Yesù sə nzhʉ li a lì ə̀ byɨmə la Sɔ ə ndìʔ wenə̀ vəwenə.

Viʔ və byɨmə vətsenə və a və nnyɨŋə̀ fa Jèlusalèm və ndjʉ̀ə̀ li a əloʔ ə Antìyòʔ ə̀ shə̀ʔtə̀ byì Yesù. nghoʔ ə viʔi Antìyòʔ ə nko dìʔ Vəju, a lì vəwenə byɨmə və noʔə̀ kədɨ̀ŋ. Bànabàs wenə̀ Sɔ ə ndjʉ̀ə̀ li tsu ə ziʔi viʔ və byɨmə və byì ə̀gàʔ ə Nyìngòŋ ə bɛ tomsə vəwenə à vəwenə əbyɨmə. A ndìʔ a Antìyòʔ a və̀ nzìtə̀ dzàŋ viʔi a və byɨmə a Yesùla “Viʔ və byɨmə və.”

Kətsi kətsen, viʔ və byɨmə və a Antìyòʔ və mbamə əchʉ̀ jɨ̀mə̀, Kəzhwì kə nwoʔə kə gàʔ à vəwenə, “Ghə̀ŋ tsuʔ Bànabàs wenə̀ Sɔ vəwenə nè əshèʔ à mà a ku à vəwenə.” Viʔ və byɨmə və Antìyòʔ və jɨ̀m a Bànabàs wenə̀ Sɔ ə̀ nyə̀ŋsə̀ avu à vəwenə əwen. Vəwenə ntɨm li Bànabàs wenə̀ Sɔ la vəwenə djʉ̀ ə̀ shə̀ʔtə̀ byì Yesù a ngwàʔə̀ əshi. Bànabàs wenə̀ Sɔ ə̀ njìʔsə̀ viʔi təloʔ tə kəjàŋ, ngwàʔə̀ wìʔ byɨmə à Yesù.

Fətitì fa nwàʔlə̀ ə̀ Nyìngòŋ//: Aks 8:3; 9:1-31; 11:19-26; 13:1-3//