43. Və Zìtə̀ Əngə̀ŋ ə̀ Nyìngòŋ

Yesù mbwìnə̀ li ə̀ kuʔ a əkaŋ, ndzɨ̀mtə̀ sə wen sə sè a Yèrusalèm tà àndə Yesù ngàʔə̀ la vəwenə nè. Viʔi a və mbyɨmə li və ntsèntə̀ noʔə̀ mənzhʉ əntsèm jɨ̀mə̀.

Ngwʉ̀ʔsə nchòə̀ məwum ə̀ ntàyn Vəju ə̀ zhɨ kətsi kəghoʔə kətsen və dzàŋə̀ nə̀ Pentekòs. Vəwenə nzhɨə kətsi kyì a Nyìngòŋ ə̀ nzaʔsə aloʔ ə vəwenə və mə̀ zhɨ Pentekòs. Vəju ntsèntə̀ a Jèlusalèm noʔə̀ fa ətɨm ətsèm ə saŋlə byì əfozhɨvə a vəwenə mpfìə̀. Vəwenə nzhɨə Pentekòs a mwuʔu. A nchòə̀ tà ngàm mùʔ fa kətsi a Yesù mbwìnə̀ kuʔ a əkaŋ və mə̀ zhɨ Pentekòs a ngwʉ̀ʔ ayì.

Viʔ və byɨmə vyi ndìʔ a mwuʔu, à sə laʔtə əfwof ətsenə ghə kwen a əngə̀ŋ a vəwenə ndìʔ tsu. Əlwàŋ ə əzhiʔ ə kuʔ a əchʉ ə viʔ və byɨmə avyi. Kəzhwì kə nwoʔə̀ kə kwen à vəwenə təwen, vəwenə zìtə̀ sə̀ gàʔə̀ təgàʔ tà a kədɨ̀ŋ.

Viʔi Yèrusalèm nzhʉ àndə və wasə gàʔə̀ vəwenə tsèntə̀ vi ə lye la à chòə̀ ghɔ̀ lɔ. Viʔ avyi nzhʉ li tà àndə viʔ vəbyɨmə vyi gàʔə̀ byì ənyʉ̀ ə̀ juŋə və ə̀ Nyìngòŋ, kə chò vəwenə byì àndə noʔə̀ ndə̀ nzhʉ və gàʔə̀ a wenə gàʔ əloʔ.

Viʔi vətsenə və gàʔ la ndzɨ̀mtə̀ sə Yesù sə bomə li mənlyùʔ. Bità lù ə̀ tɨmə ə̀ gàʔ à vəwenə, “Ghə̀ŋ zhʉtə mò! Viʔ vənə ko bomə mənlyùʔ bwen! A dìʔ kənyʉ̀ a nshə̀ʔtə̀ ə̀ Nyìngòŋ ə Jwel ngàʔə̀, ‘A lu ndìʔ a əchʉʔ ə bàm, mà ə lu ku Kəzhwì ə̀ kom à ghə̀ŋ.’”

“Viʔi Isrèl, Yesù ndìʔ wìʔ a ghə̀ nnè ənyʉ̀ ə̀ kanə və byì kəjoʔ kə Nyìngòŋ, tà àndə ghə̀ŋ nkɨ li ə̀ bɛ̀ yen. Ghə̀ŋ bòŋsə̀ bayntə wen a fəkòʔ fə kəntò!”

“Yesù mpfɨ li, Nyìngòŋ lùsə̀ wen fa əpfɨ. Wokèn kə dìʔ kənyʉ̀ a və ngàʔə̀ byì Nyìngòŋ, ‘Wù ə ko lu kye Wayn ə̀ wù ə ghə̀ fwè a əsè.’ Yès ə yen li la Nyìngòŋ ə lùsə̀ li Yesù fa əpfɨ.”

“Yesù dìʔ luwèn a əkwoŋ ə̀ to ghə ə̀ Nyìngòŋ ə Tìʔ. Yesù ə tɨm li Kəzhwì kə nwoʔə̀ kə tà àndə ghə̀ ngàʔə̀ la yì a tɨm. A nè kəzhwì kə nwoʔə̀ kə ənyʉ̀ a ghə̀ŋ ə yen bɛ zhʉ lə̀ və fʉ̀ə̀.”

“Ghə̀ŋ ə̀ tə̀ bayntə Yesù a fəkòʔ fə kəntò. Ghə̀ŋ kɨ la Nyìngòŋ ə nèə̀ li la Yesù ndìʔ Nyìngòŋ, dìʔ Mèzayà!”

Ənyʉ̀ a Bità ngàʔə̀ və nkwen li a əwen ə viʔi vyi a və nzhʉtə wen lì. Vəwenə bə̀m a Bità bɛ̀nə̀ à ndzɨ̀mtə̀sə Yesù, “Vələ̀mə̀, yès nè ghɔ̀ luwèn a?”

Bità gàʔ à vəwenə, “Ghə̀ŋ byɨmə ə̀ shi muʔu a əzhiʔ nə̀ Yesù Kristò ti Nyìngòŋ lyèsə̀ ə̀ ku mbyɨ shə̀ŋsə̀. Ghə̀ bɛ a ku Kəzhwì kə nwoʔə̀ kə à ghə̀ŋ.”

Viʔi nkam sətaʔ (3,000) mbyɨmə li kənyʉ̀ a Bità ngàʔə̀ ə̀ sə̀ dìʔ ndzɨ̀mtə̀sə Yesù. Və ku muʔu à vəwenə, vəwenə sə̀ dìʔ viʔi əngə̀ŋ ə̀ Nyìngòŋ a Jèlusalèm.

Viʔi a və mbyɨmə və nzhʉtə ziʔi ə ndzɨ̀mtə̀sə Yesù, dìʔ a mwuʔu, zhɨə a mwuʔu, jɨ̀mə̀ a mwuʔu. Vəwenə nsaŋlə ə nkuʔsə Nyìngòŋ a mwuʔu bɛ gə̀tə̀ əfo à vəwenə ntìntìn. Noʔə̀ viʔ vətsèm ə̀ ngàʔə̀ njùŋ byì vəwenə. Kətsi kə sə̀ chò, viʔi byɨmə ghoʔtə djʉ̀ tà djʉ̀ə̀.

Fətitì fa nwàʔlə̀ ə̀ Nyìngòŋ//: Aks 2//