14. Əjə̀ʔ ə Vunə Isrèl a Ətoʔ

Nyìngòŋ ə̀ nku li təsoʔ a vunə Isrèl ə ndìʔ ə dzɨ̀mtə̀ ti məkàyn myì bòŋ, vəwenə mə̀ lù fa pfèn ə̀ Sanà ə̀ sə̀ djʉ̀ə̀. Nyìngòŋ ə̀ nzìtə̀ li ə̀ sə̀ jə̀ʔsə̀ vəwenə djʉ̀ə̀ a əloʔ a ghə̀ ndìʔ ə ku à vəwenə, və dzàŋə̀ nə̀ Kanàn. Ntàŋ ə̀ mbòʔ yì ə̀ ndjʉ̀ə̀ fa mbì, vəwenə mu dzɨ̀mtə̀ djʉ̀ a əloʔ ə Kanàn.

Nyìngòŋ ə̀ ngàʔə̀ li à Abàham, Azìk, nə̀ Yàkob la yì ə lu ku əloʔ ə Kanàn à vəwenə bɛ̀nə̀ a vunə vəwenə, a li viʔi ətɨm ə kəjàŋ ə tsiə tsu luwèn. Və ndzàŋə̀ vəwenə la viʔi Kanàn. Viʔi Kanàn ə nko byɨmə à Nyìngòŋ bwen. Vəwenə nkuʔsə vənyìngòŋ və kəjàŋ nè ənyʉ̀ ə byɨfəvə noʔə̀ nànto.

Nyìngòŋ ə̀ ngàʔə̀ li a vunə Isrèl, “Ghə̀ŋ dìʔ ədzɨ̀m viʔi Kanàn fa əloʔ ə Kanàn. Kə ghə̀ŋ à nè mbwàʔmə̀ ghə̀ŋ vəwenə. Kə ghə̀ŋ à lam ghə̀ŋ vəwenə. Ghə̀ŋ dìʔ əsàstə̀ vənyìngòŋ və vəwenə noʔə̀ vətsèm. Sətsèn ghə̀ŋ dìʔ kɛ zhʉ mò ghə̀ŋ à zìtə̀ ə nkuʔsə vənyìngòŋ və vəwenə.”

Vunə Isrèl ə ndjʉ̀ə̀ li ə̀ zaʔə a əghomə ə̀ Kanàn, Musìs tsuʔ lyʉmə ndjù sə̀bò a wum, əmùʔ ə mùʔ fa məbə̀ŋ mə̀ Isrèl. Ghə̀ gàʔ la vəwenə djʉ̀ ə̀ lyeə jì a əloʔ ə Kanàn ə dìʔə̀. Vəwenə ndìʔ ə lye la viʔi ə Kanàn ə to mu və bwaʔə lɔ.

Lyʉmə avyi ndjù sə̀bò a wum ə̀ njə̀ʔə̀ ə̀ kaʔ fa Kanàn məntsi məwum ə̀ nkàʔ mimbu bwìnə̀ ə vì. Vəwenə gàʔ a vunə Isrèl, “Nse əloʔ ayì bòŋə̀ əfozhɨvə kwiə tsu noʔə̀ nkàyn!” A lì lyʉmə ə wum ə gàʔ, “Mbàynsə təghomə sə to nànto, viʔi əloʔ ayì jə̀fkə̀! Sətsèn vəghəŋ zì əsoyn vəwenə à zhwilə vəghəŋ!”

Lyʉmə vətsenə və vyi vəbo, Kalèb wenə̀ Joshwà gàʔ, “A dìʔ nəmwìn la viʔi əloʔ ə Kanàn ə djə̀fkə̀ bɛ̀ to, a lì vəghəŋ zì və zhɨ vəwenə! Nyìngòŋ a soyn à vəghəŋ!”

Tɛ̀ lì vunə Isrèl nko zhʉtə fa Kalèb wenə̀ Joshwà. Vəwenə bòŋsə̀ fwisə tyin a Musìs wenə̀ Aròn ə̀ gàʔ, “Byì ghɔ̀ a ghə̀ŋ tə̀ vì nə̀ yès a kəshi kə byɨ kèn kə a? Kə mbòŋə̀ la yès se a Igyìb kə və bòŋsə̀ vì zhwilə yès a shə̀ ə̀ kaʔsə kyiʔi vyesə nə vunə a əkòs.” Vəwenə nkəŋ li jì ə tsuʔ wìʔ ə̀ kə̀jàŋ ə ghə̀ lyɨ vəwenə ə̀ bwìnə̀ djʉ̀ a Igyìb.

Tin ə̀ Nyìngòŋ ə̀ mfwi li ghə̀ vì a əŋgə̀ŋ ə̀ ntsèntə. Nyìngòŋ gàʔ, “Tà àndə ghə̀ŋ ə to li kəchʉ à mò lə̀, ghə̀ŋ a faŋ ə njèʔə̀ kaʔkə̀ tà fa ətoʔ a shə̀. Ə bɛ chò tà Joshwà wenə̀ Kalèb, noʔə̀ ndə̀ a ghə̀ ə zaʔə li ngwʉ̀ʔ məwum mbò lu pfɨ tà a shə̀ kèn la ghə̀ a kwen a əloʔ Kanàn.”

Vəwenə nzhu li a lì kənyʉ̀ əkyikə nè vəwenə zafkə byì ə to ə kəchʉ ayi. Vəwenə lyɨ̀ li əfo ə ghoŋ ə djʉ̀ ə soyn viʔi Kanàn. Musìs ə ntaŋkə̀ li ə tensə la kə və djʉ̀ byi àndə Nyìngòŋ ə̀ nko dìʔ wenə̀ vəwenə, tɛ̀ a lì vəwenə ko nzhʉtə wen.

Viʔi Kanàn ə nzhɨ li vəwenə a əghoŋ àndə Nyìngòŋ ə̀ nko dìʔ tsu. Və nzhwi li vətsenə və, ə vyi a və faŋə lì və bwìnə̀ vì ə̀ sə̀ jèʔə̀ kaʔə tà a ətoʔ ayì ngwʉ̀ʔ məwum ə̀ nkàʔ.

A ngwʉ̀ʔ a sèn məwum ə̀ nkàʔ a vunə Isrèl ə ŋkaʔə tà a ətoʔ ayì lì, Nyìngòŋ ə̀ nzhisə vəwenə. Ghə̀ nku kəbayn à vəwenə fa əkaŋ, və dzàŋə̀ nə̀ “manà.” Ghə̀ ntɨmə ədɨ̀ŋ ə mənyin a vəwenə ti vəwenə nkiʔ nyàm ə mpfɨə. A chì ngwʉ̀ʔ asèn Nyìngòŋ nè la kə njisə nə gwʉ̀sə vəwenə sə a byɨ̀fkə.

Nyìngòŋ ə̀ nku li tɛ̀ muʔu à vəwenə fa ngùʔ. Tɛ lì vunə Isrèl bɛ̀ də̀mkə̀ tà də̀mkə̀ ə̀ gàʔ byì Nyìngòŋ nə̀ Musìs. Tɛ̀ a lì Nyìngòŋ bɔ̀ wʉ məkàyn a ghə̀ nkiʔi wenə̀ Abàham, Azìk, nè Yàkob.

Əzhʉ ətsenəghə nvì li vəwenə ko kiʔ muʔu, Nyìngòŋ gàʔ a Musìs, “Gàʔə̀ à ngùʔ yì, muʔu a fʉ̀ fa tsu.” Musìs to kəchʉ à Nyìngòŋ a əshɨ ə viʔi ə bòŋsə̀ ghòmə̀ ngùʔ ayì aghayn abò. muʔu ə fʉ̀ə̀ li fa tsu noʔə̀ viʔ vətsèm ə nyʉ, a lì tyin ə Nyìngòŋ fwi a Musìs ghə̀ gàʔ, “Wù ə ko lu kwen a əloʔ Kanàn ayi.”

Vunə Isrèl avyi nkaʔkə li fa ətoʔ ayì ngwʉ̀ʔ məwum ə̀ nkàʔ, ə vyi noʔə̀ vətsèm a və nto kəchʉ à Nyìngòŋ və pfɨkə. Nyìngòŋ mə̀ nè vəwenə bɛ̀ djʉ̀ boʔsə Kanàn. Musìs ə̀ ndìʔ mu ghə̀ ə dwìnə̀ li noʔə̀ nkàyn, Nyìngòŋ mə̀ tsuʔ Joshwà la ghə̀ ə ngyàmtə̀ wen ti a mbì vunə Isrèl. Nyìngòŋ ə̀ ngàʔə̀ li à Musìs la a lu ndìʔ a kəlyɨŋ kətsen ə yì tɨmə nshə̀ʔtə̀ ə tsen tà a nə̀ Musìs.

Nyìngòŋ mə̀ gàʔ a Musìs la ghə̀ kuʔ a kwì ə pfèn ə̀ yen əloʔ ayi a yì kə ku a vunə Isrèl. Nyìngòŋ ə̀ nkye li Musìs yen əloʔ ayi kèn la ghə̀ ə nkye li la Musìs kwen tsu. Musìs mə̀ pfɨ, vunə Isrèl ə dì əpfɨ ə wen məntsi məwum ə̀ ntaʔ. Joshwà mə̀ sə̀ dìʔ wìʔ a ghə̀ ti a mbì. Joshwà ə̀ ndìʔ noʔə̀ wìʔ ə jùŋə byì tà àndə ghə̀ zhʉə Nyìngòŋ, tsi a jì a Nyìngòŋ ə̀ ngàʔə̀.

Fətitì fa nwàʔlə̀ ə̀ Nyìngòŋ//: Eksedòs 16-17; Numbàs 10-14; 20; 27; Dìtoromì 34//