Babanki: Open Bible Stories

Updated ? hours ago # views See on DCS

19. Nshə̀ʔtə̀sə

Image

Andə viʔi Isrèl ə̀ ndìʔ, Nyìngòŋ ə̀ ntɨmə nshə̀ʔtə̀sə wen à vəwenə. Nshə̀ʔtə̀ ashì sə ə̀ nzhʉə ntɨmsə fà Nyìngòŋ vəwenə ə̀ djʉ̀ shə̀ʔtə̀ a viʔi.

Image

Elajà ə̀ ndìʔə̀ nshə̀ʔtə̀ a kəlyɨŋ a Ahàb ə̀ ndìʔ fòyn a Isrèl. Ahàb ndìʔ wubyɨfə gàʔə̀ a viʔi la və nkuʔsə nyìngòŋ a və ndzàŋə̀ la Bal. Elajà ə̀ ngàʔə̀ li à Ahàb, “Ə̀wʉ ko a vì à əloʔ ə Isrèl ə zaʔə fa kətsi a mà lu gàʔ la ghə vì.” Kənyʉ əkyikə nzáf li Ahàb.

Image

Nyìngòŋ ə̀ ngàʔə̀ li à Elajà ghə̀ nyɨŋ ə̀ djʉ̀ a kəshi kə zɨmə la kwas ə̀ djʉ̀ lyòmtə̀ fa Ahàb a ghə̀ nkəŋə ə zhwi ə wen. Ghə̀ ə ndjʉ̀ə̀ li ə̀ sə̀ dìʔ tsu mənyin vìə̀ nə̀ əfozhɨvə a wen a boŋgə̀ŋ nə̀ a mpfwomə. Ahàb wenə̀ vəsugèʔ və wen ə nkəŋ li Elajà ə̀ kəŋ, kèn la vəwenə yen li ə wen. Ə̀shi ə nzɨm li ə̀ zɨm təfwayn tə a muʔu tə zɨm.

Image

Elajà lù ə̀ djʉ̀ a əloʔ ə tseneghə a mboʔsə. Wùwi ə mpfɨ ə tsen wenə̀ wàyn ə wen ndìʔ mu əfozhɨvə sə̀ mèə̀ fa vəwenə byì àndə əwʉ ə nko vìə̀. A lì vəwenə ku əfozhɨvə à Elajà, Nyìngòŋ nè la kə kəbayn nə̀ mənzhiʔ mə̀ vəwenə bɛ̀ lu mè a chì ngwʉ̀ʔ ashì sə a əwʉ ko nvìə̀ lì. Elajà ə̀ nsèə̀ tà wenə̀ vəwenə ngwùʔsə tà a kədɨ̀ŋ.

Image

Ngwùʔ sətaʔ sə nə̀ kəbyəʔ kə nchòə̀ li, Nyìngòŋ gàʔ à Elajà la ghə̀ bwìnə̀ djʉ̀ gàʔ wenə̀ Ahàb byì àndə yì a bwìnsə̀ ə tɨm əwʉ̀. Ahàb nyen li Elajà ə̀ gàʔ, “Yen wù a, wù dìʔ wù kəŋə nsoʔ!” Elajà bwìnsə̀, “A dìʔ wù dìʔ wù kəŋə nsoʔ! Wù ə bwìnə̀ li dzèm à Yawè, Nyìngòŋ ə̀ nə̀mwìn, ə sə kuʔsə Bal. Lyɨ ə viʔi Isrèl noʔə̀ vətsèm ghə̀ŋ kuʔ a pfen ə Kamèl.”

Image

Viʔi Isrèl noʔə̀ vətsèm, nə̀ nshə̀ʔtə̀sə Bal təghɨ təkàʔ nə̀ məwum ə̀ ntàyn (450), nkuʔ li a pfen ə Kamèl. Elajà ngàʔə̀ li à vəwenə, “Byì ghɔ̀ a ghə̀ŋ ə kwitə tətyɨm ə tyəŋ a lə̀ a? Mu Yawè dìʔ Nyìngòŋ, ghə̀ŋə nkuʔsə wen! Mu Bal dìʔ nyìngòŋ, ghə̀ŋə nkuʔsə wen!”

Image

Elajà gàʔ à nshə̀ʔtə̀sə Bal, “Zhwi nyàm ə̀ nyʉʔ a kəku à Nyìngòŋ a lì kə ghə̀ŋ à jàyn əzhiʔ. Nkàynə̀ mò a nè ta lì. Nyìngòŋ a ghə̀ a jàyn əzhiʔ dìʔə̀ nkàynə̀ Nyìngòŋ.” Nshə̀ʔtə̀sə Bal sə mə̀ shìtə̀ əfo ə kəku ə̀ vəwenə kèn la vəwenə jàynə̀ li əzhiʔ.

Image

Nshə̀ʔtə̀sə Bal sə jɨ̀m a Bal, “Zhʉ yə̀s a Bal!” Vəwenə zhʉsə kətsi kəmpfen tà a jɨ̀m, zɨmə̀, tyintə təwen tə vəwenə nə̀ mənyì, Bal ə ko nè kənyʉ̀.

Image

A sə ndìʔ a mpfwomə, Elajà shìtə̀ kəwen kəku à Nyìngòŋ. Ghə̀ gàʔ à viʔi la və shʉʔ vəntòn və a mù njù sə̀bò à yì ə kwì. Vəwenə nshʉʔə li mə̀ lwin ə̀ shiʔə a chɨ, ə̀ zhʉ̀sə̀ nkòʔ nə̀ nse noʔə̀ ətsèm a wènə chɨ.

Image

Elajà ə̀ njɨ̀mə̀ li, “Yawè, Nyìngòŋ ə̀ Abàham, Azìk, nə̀ Yàkob, jìʔə̀ à yès layn la wù dìʔ Nyìngòŋ ə̀ Isrèl, mà dìʔ wù shyèʔ ə̀ wù. Nèə̀ kənyʉ a mà bèmə̀ ti viʔ və̀nə kɨ la wù dìʔ Nyìngòŋ.”

Image

Tà a əzhʉ ayi, əzhiʔ ə shiʔə fa əkaŋ ə̀ nyʉ̀ʔ nyàm ə̀ wen, nə̀ nkòʔə̀, nə̀ ntomsə, tɛ̀ muʔu a mə̀ ndìʔ a nse. Viʔi avyi nyen a lì ə̀ bvɨ̀kə̀ a nse ə̀ gàʔ, “Yawè dìʔ Nyìngòŋ ! Yawè dìʔ Nyìngòŋ!”

Image

Elajà gàʔ, “Kə ghə̀ŋ kye ə̀ nshə̀ʔtə̀sə Bal shisə nyiŋkə!” Viʔi ghaʔtə nshə̀ʔtə̀sə Bal ashì ə̀ djʉ̀ nə̀ vəwenə ə̀ zhwi lə.

Image

Elajà gàʔ à fòyn Ahàb, “Zàŋsə̀ bwìnə̀ djʉ̀ a ntuʔ byì àndə əwʉ ə kuʔə.” A sə laʔtə əkaŋ ə fen ə̀ vì, kəntonto kə əwʉ kə zì. Yawè nkye li la əwʉ ə bɛ vì ə jìʔ la yì dìʔ nkànə̀ Nyìngòŋ.

Image

Əzhʉ ə Elajà nchòə̀ li, Nyìngòŋ tsuʔ Elishà la ghə̀ ə ndìʔ nshə̀ʔtə̀ ə̀ wen. Nyìngòŋ ə̀ nnèə̀ li Elishà nè ənyʉ ə̀ kanə və tà a kədɨ̀ŋ. Ghə̀ nnèə̀ kənyʉ kə̀ kanə kətsenkə a Namàn, kəchʉ kə vəsugèʔ, a əwen ə wen ə̀ nsèmə̀. Ghə̀ ə nzhʉ li byì Elishà, ə̀ djʉ̀ sensə Elishà la ghə̀ chʉʔ yì. Elishà ngàʔə̀ li a Namàn la ghə̀ djʉ̀ ə̀ bvɨ̀ a tyì à muʔu mə̀ Jodàn à ghayn ə̀ sòmbo.

Image

Namàn ə̀ mfwisə li tyin kwòʔə̀ la à dìʔ ədəm a Elishà ə demə. Ghə̀ nkaʔ li ə̀ kwitə ətyɨm ə wen ə̀ djʉ̀ bvɨ̀ a muʔu mə̀ Jodàn amyì. Ghə̀ ə nè sə fʉ̀ fa muʔu a əzhʉ ə bàm mu nsèm yì mèə li, əwen ə wen ə bayn noʔə̀ nkayn. Nyìngòŋ ə̀ nchʉʔ li wen.

Image

Nyìngòŋ ə̀ ntɨmli nshə̀ʔtə̀ sə tà a kədɨ̀ŋ. Noʔə̀ vəwenə vətsèmə nshə̀ʔtə̀ a viʔi la kə vəwenə bɛ kuʔsə vənyìngòŋ və kəjàŋ, la vəwenə ntsiə nə̀ mbwaʔmə̀ lyèsə̀ ku viʔ vətsenə və. Nshə̀ʔtə̀sə ngàʔə̀ li a viʔi la sətsèn vəwenə dìʔ kə kye ənyʉ byɨfə və ə ntsi a jì a Nyìngòŋ ə̀ gàʔə̀, mu Nyìngòŋ a soʔ vəwenə, ə loʔ vəwenə nə̀ ngəʔ.

Image

Nghoʔə̀ mənzhʉ viʔi avyi nko tsi a jì a Nyìngòŋ ə̀ nkəŋə. Vəwenə ə̀ nyàblə̀ nə̀ nshə̀ʔtə̀sə, ə̀ zhwilə sətsen. Vəwenə nwye li nshə̀ʔtə̀ ə Jèrìmayà a nkwòŋ la ghə̀ pfɨ tsu. Ghə̀ ə nshiʔi li ə̀ djʉ̀ a chì kətsòʔ, fòyn bɛ kusə nshinsə a wen ə̀ gàʔ və shìsə Jèrìmayà ghə̀ bu tà to.

Image

Nshə̀ʔtə̀ ashì sə ngàʔə̀ tà gàʔə a viʔi noʔə̀ tɛ àndə viʔi mbànə̀ vəwenə kèn la və zhʉtə̀. Vəwenə nshə̀ʔtə̀ li a viʔi la və dìʔ kɛ kwitə Nyìngòŋ à zhwilə vəwenə. Vəwenə mbɛ̀ dzɨ̀ŋtə̀ kənyʉ a viʔi à Nyìngòŋ ə̀ ngàʔə̀ la Mèzayà ə̀ lu vì.

Fətitì fa nwàʔlə̀ ə̀ Nyìngòŋ: 1 Kiŋs 16-18; 2 Kiŋs 5; _ Jèrìmayà _ 38