20. Vunə Isrèl və Fʉ̀ fa Jèlusalèm ə̀ bɛ̀ Bwìnə̀ Vì

Ə̀loʔ ə Isrèl nə̀ ə̀loʔ ə Judà ə̀ nnèə̀ mbyɨ à Nyìngòŋ. Vəwenə nko nwʉ məkàyn a vəwenə ə̀ nwʉ wenə̀ və̀ Nyìngòŋ a pfen ə̀ Sanà. Nyìngòŋ ə̀ ntɨm li nshə̀ʔtə̀sə wen la sə gàʔ à vəwenə la vəwenə kwitə, a lì vəwenə ko zhʉtə.

Nyìngòŋ mə̀ kye la viʔi kəbàyn ə̀ vəwenə zhɨ vəwenə a əghoŋ. Ə̀loʔ ə Asilà, noʔə̀ əloʔ ə to ghə, mə byɨfə, nsàstə̀ li əloʔ ə Isrèl. Viʔi Asilà ə nzhwilə li ngwàʔə̀ wìʔ a əloʔ ə Isrèl, ə̀ lyɨ̀ noʔə̀ əfo əko ətsèm, ə̀ nyʉ̀ʔ ə̀ nghoʔ əloʔ ayi.

Viʔi Asilà ə ntsèntə̀ li əchʉ əchʉ ə Isrèl, nə̀ viʔ və ghoʔkə və, nə̀ viʔi a və ntofə noʔə̀ vətsèm ə̀ djʉ̀ nə̀ vəwenə a Asilà. A mfàŋ tà viʔi kəmfəm ə Isrèl a və nko zhwi a əloʔ ə Isrèl.

Viʔi Asilà ə nlyɨ̀ li viʔi fa əshi ə kəjàŋ ə̀ vì wʉ a əloʔ ə Isrèl. Viʔi ətɨm a vyi vì bwìnsə̀ bwom əloʔ ə Isrèl ə̀ lamkə viʔi a və nfaŋə tsu. Və ndzàŋə̀ viʔi Isrèl a və nlamə̀ viʔi ətɨm la Vəsàmalitàn.

Viʔi Judà ə nyen li kənyʉ̀ a Nyìngòŋ ə̀ nnè a viʔi Isrèl byì əto ə kəchʉ ə̀ vəwenə. Vəwenə bɔ̀ sə̀ kuʔsə vənyìngòŋ və kəjàŋ tà kuʔsə, kuʔsə tɛ̀ vənyìngòŋ və viʔi Kanàn. Nyìngòŋ ə̀ ntɨm li nshə̀ʔtə̀sə ə sə tofsə vəwenə, vəwenə chen, və ko kwitə.

Ngwʉ̀ʔsə nchò li ə saʔə ghɨ (100) fa əchʉʔ a viʔi Asilà ə̀ nsàstə̀ əloʔ ə Isrèl, Nyìngòŋ tɨm Nèbòkànezà, fòyn ə̀ Babilòyn, la ghə̀ djʉ̀ soyn Judà. Babilòyn ə̀ ndìʔ noʔə̀ əloʔ ə ŋàŋ. Fòyn ə Judà ə̀ mbyɨmə li la yì a ndìʔ kəkòs kə Nèbòkànezà, lòʔə̀ əko a wen noʔə̀ ngwʉ̀ʔsə̀ tsèm.

Ngwʉ̀ʔsə nchò li tà sə̀shə̀ʔ a lə̀, fòyn ə Judà chen la yì ə ko bɛ̀ dìʔ kəkòs kə Babilòyn. Viʔi Babilòyn ə vì soyn ə wen ə̀ zhɨ əloʔ ə Judà. Vəwenə nshi li Yelusalèm, ə̀ sàstə̀ əngə̀ŋ ə̀ Nyìngòŋ, ə̀ lyɨ əfo əko noʔə̀ tsèm fa tsu.

Vəsugèʔ və Nèbòkànezà ə nzhwilə li vunə lyʉmə ə̀ fòyn ə̀ Judà a wen əshɨ ə̀ bɛ̀ tsuʔtə ashɨ ə wen byì àndə ghə̀ ə nto li kəchʉ à fòyn ə Babilòyn. Vəwenə nlyɨə̀ li fòyn ayì ghə̀ djʉ̀ pfɨ a mfɨŋ a Babilòyn.

Nèbòkànezà wenə̀ vəsugèʔ və wen ə nlyɨ̀ə̀ li nghoʔə viʔi Judà ə̀ djʉ̀ a Babilòyn. Və nkye tà viʔi kənfem a bàm ə və nshyèʔə̀ a təsɨm. Və̀ dzàŋə̀ kəlyɨŋ kə əzhʉ akèn a və nsàŋə̀ viʔi Nyìngòŋ fà əloʔ a ghə̀ nku a vəwenə la Kənlyʉ̀.

Nyìngòŋ ə̀ nkye və shìsə̀ vunə Isrèl fa vəwenə təloʔ a lì ghə̀ ə ko lyèsə̀ ənyʉ̀ a ghə̀ ngàʔə̀ la yì ə lu nè à vəwenə̀. Nyìngòŋ ə̀ mbɔ tùʔmə̀ nə vəwenə, gàʔə̀ a vəwenə ə chò fà nshə̀ʔtə̀sə wen. Ghə̀ ə ngàʔə̀ li la ngwʉ̀ʔsə a chò mə̀wum ə̀ sòmbo yì kye vəwenə bwìnə̀ djʉ̀ à vəwenə təloʔ.

Ngwʉ̀ʔsə ə nchòə̀ li mə̀wum ə̀ sòmbo, Saylùs, fòyn ə̀ viʔi Peshà, zhɨ Babilòyn a əghoŋ. Ə̀loʔ ə Peshà sə̀ soʔə əloʔ ə Babilòyn. Və ndzàŋə̀ viʔi Isrèl la Vəju. Və mbwi nghoʔ ə vəwenə a Babilòyn. A nkwòʔtə̀ tà Vəju vəshə̀ʔ a lə̀ kwòʔtə̀ Judà.

Əloʔ ə Peshà nto noʔə̀ nànto a lì ə̀ kusə nshinsə a viʔi a vəwenə nzhɨ a təghoŋ. Andə Saylùs ə̀ ndìʔ fòyn ə̀ viʔi Peshà, ghə̀ soʔ la noʔə̀ wìʔ a ghə̀ nlù fa Judà kòŋ ghə̀ lù fa Peshà ə̀ bwìnə̀ djʉ̀ a Judà. Ghə̀ ə nku li əko la vəwenə djʉ̀ bwìnsə̀ bwomə əngə̀ŋ ə Nyìngòŋ ə̀ vəwenə tsu! Ngwʉ̀ʔsə nchòə̀ li məwum ə̀ sòmbo fa ngwʉ̀ʔ ə̀ Kənlyʉ̀, təshɨ tə və Vəju tə bwìnə̀ djʉ̀ a Jèlusalèm a Judà.

Vəwenə nkwen li a Jèlusalèm, ə̀ bwìnsə̀ bwom əngə̀ŋ ə̀ Nyìngòŋ, ə̀ bàyn ə̀ kaʔsə əloʔ ə vəwenə. A nsoʔə tɛ̀ viʔi kəjàŋ soʔə vəwenə a lì vəwenə ndìʔ à vəwenə əloʔ yì a Nyìngòŋ ə̀ nku li bɛ kuʔsə Nyɨngòŋ a wenə ngə̀ŋ yì.

Fətitì fa nwàʔlə̀ ə̀ Nyìngòŋ//: 2 Kiŋs 17; 24-25; 2 Konikə̀ls 36; Ezra 1-10; Nèhèmayà 1-13//