12. Kənlù

Vunə Isrèl ə ndìʔ noʔə̀ nə̀ saŋlə ghə ə lù fa əloʔ ə Igyìb. Vəwenə nko bɛ a dìʔ əkòs, vəwenə a djʉ̀ a əloʔ a Nyìngòŋ ngàʔə̀ la yì ə lu ku à vəwenə! Viʔi Igyìb ə nku li noʔə̀ ghɔ̀ ayì a vunə Isrèl mbèmə̀, tɛ̀ gol nə̀ silvà. Viʔi təloʔ tətsen tə mbyɨmə li à Nyìngòŋ ə̀ dzɨ̀mtə̀ vunə Isrèl tà àndə vəwenə ndjʉ̀ fa Igyìb.

Nyìngòŋ ə̀ njìʔə̀ jì a vəwenə nə̀nchwì nə̀ ntàŋ ə̀ mbòʔ, jìʔə̀ nə̀nchʉʔə nə̀ ntàŋ ə̀ əzhiʔ a ghə̀ ndjʉ̀ə̀ fa vəwenə əshɨ. Nyìngòŋ ə̀ ndìʔ wenə vəwenə noʔə̀ mənzhʉ əntsèm, jìʔsə̀ jì a vəwenə. Kə vəwenə kə ndìʔ tà la vəwenə ndzɨ̀mtə̀ wen.

Vəwenə ndjʉ̀tə̀ li tà a nteʔ Ferò wenə̀ viʔi wenə yen la vunə Isrèl ndìʔə̀ sè tà əkòs ə vəwenə. Nyìngòŋ ə̀ nnèə̀ li la Ferò chiʔ kəchʉ a lə̀ ti viʔi yen la à dìʔ tà yì dìʔ Nyìngòŋ, ə̀ kɨ la yì, Yawè, ə to chò Ferò nə̀ vənyìngòŋ və wen noʔə̀ vətsèm.

Ferò wenə̀ vəsugèʔ və wenə mə̀ lù ə̀ sə̀ dzɨ̀mtə̀ ə djʉ̀ ghaʔtə vunə Isrèl ə vəwenə bwìnə̀ vì ndìʔ əkòs ə vəwenə. Vunə Isrèl bvɨ̀tə̀ yen la vəsugèʔ və Igyìb və dzɨ̀mtə̀ vəwenə. Vəwenə sə lye a mbì muʔu mə nghoʔə məntsenə̀ dìʔ tsu, jì ə li ko dìʔ ə vəwenə bwìn kèn la jì dìʔ ə vəwenə tɨm. Vəwenə fwàyn ə dì, “Yès yì lù fa Igyìb byì ghɔ̀? Yès a pfɨkə luwèn!”

Musìs ə̀ ngàʔə̀ li a vunə Isrèl avyi, “Kə ghə̀ŋ bɛ fwàyn! Nyìngòŋ a soyn à ghə̀ŋ ə bwòŋsə̀ ghə̀ŋ.” Nyìngòŋ mə̀ gàʔ a Musìs, “Gàʔə̀ vəwenə njèʔə̀ kwenə djʉ̀ ta djʉ̀ə a chì à muʔu mə nghoʔə mə myì.”

Nyìngòŋ mə̀ chòsə̀ ntàŋ ə̀ mbòʔ yì ə̀ tòm a kəntìntìn ə̀ viʔi Igyìb bènə̀ vunə Isrèl ə̀ nè la kə viʔi Igyìb ə bɛ yen vunə Isrèl.

Nyìngòŋ gàʔ a Musìs la ghə̀ tsoʔsə kəvu kə wen a kwì a muʔu yì mə̀ gə̀sə̀ a ghayn à bò. Nyìngòŋ mə̀ nè əfwof ə ten muʔu ə djʉ̀sə̀ mənshə̀ mbò, jì bòʔmə̀ a chì à muʔu amyì.

Vunə Isrèl ə jèʔ ə̀ tɨm a kəntìntìn kə à muʔu a nse ə zɨm mu muʔu tɨmə li mənshə̀ mbò.

Nyìngòŋ mə̀ lyɨ̀sə̀ ntàŋ ə̀ mbòʔ yì viʔi Igyìb ə yen tà àndə vunə Isrèl ə nyɨŋə tɨmə. Viʔi Igyìb ə lù kənyɨŋ fà vəwenə bàm.

Vəwenə dzɨ̀mtə̀ ə̀ kwen a chì a muʔu yì a nse ə zɨm, Nyìngòŋ nè vəsugèʔ avyì zì ə̀ sə̀ fwàynə̀. Vəwenə zɨmə ə gàʔ, “Vəghəŋ nyɨŋke! Nyìngòŋ ə̀ nsoynə a əzhiʔ ə̀ vunə Isrèl!”

Vunə Isrèl ə ne ntɨm ə mmè, Nyìngòŋ gàʔ a Musìs la ghə̀ kuʔsə əkwoŋ ə toghə ə wen a kwì a muʔu ayì. ghə̀ kuʔsə noʔə̀ əzhʉ əkɔ̀ muʔu bìymə̀ ə̀ shi ə a kəchʉ kə vəsugèʔ və Igyìb vyi. Vəsugèʔ avyi ə nlyəŋ li noʔə̀ vətsèm ə pfɨkə.

Vunə Isrèl nyen li la Nyìngòŋ ə̀ nzhwi li viʔi Igyìb avyi, vəwenə choʔsə Nyìngòŋ ə̀ byɨmə la a tɨm ə wen ə ntɨm Musìs.

Vunə Isrèl ə nsaŋlə li noʔə̀ nànto byì àndə Nyìngòŋ ə̀ nshìsə̀ li vəwenə fa kəkòs a Igyìb ə bɛ bwòŋsə̀ vəwenə fà vəsugèʔ və Igyìb. Vəwenə nzì və kuʔsə Nyìngòŋ luwèn noʔə̀ nkàyn. Vəwenə nzhɨm ə ndzàŋsə tà a kədɨ̀ŋ ə̀ saŋlə ə̀ kuʔsə Nyìngòŋ byì kənyʉ̀ a ghə̀ nnè a vəwenə.

Nyìngòŋ ku əsoʔ a vunə Isrèl la vəwenə ə nzhɨə kətsi akèn noʔə̀ ngwʉ̀ʔ sətsèm kwòʔtə̀ tà àndə yì nzaʔsə aloʔ ə vəwenə ə̀ shìsə̀ vəwenə fa kəkòs a əloʔ ə Igyìb. Kətsi akyì ə̀ nkwʉ̀ʔə̀ vəwenə ə̀ shə ə nges ə byìnjɨ və pfè ə pfiʔ nə kəbayn kə mənkalə a kə ko kuʔ.

Fətitì fa nwàʔlə̀ ə̀ Nyìngòŋ//: Eksedòs 12:33-15:21//