41. Nyìngòŋ Lùsə̀ Yesù fa Əpfɨ

Vəsugèʔ ə mmyètə̀ li ə̀ bayntə Yesù a fəkòʔ fə kəntò, əchʉ əchʉ ə Vəju vyi a və nko byɨmə à Yesù gàʔ a Palèt, “Yesù ə wùndzìŋ yì, tə̀ gàʔ la yì a lù fa əpfɨ a bàmə məntsi ntaʔ. Kə bòŋ la wìʔ tsɨŋ əsè ayì kə ndzɨ̀mtə̀ sə wen sə ne tsoŋ kəmpfɨ kə wen ə̀ gàʔ la ghə̀ ə lù li fa əpfɨ.”

Palèt gàʔ, “Lyɨ̀ə̀ vəsugèʔ vətsenə və ə̀ djʉ̀ tsɨ̀ŋ əsè ayì noʔə̀ nkàyn.” Vəwenə djʉ̀ laŋsə ngùʔ yì a əchʉ̀ ə əsè ə̀ wʉ̀ vəsugèʔ tsu la və tsɨŋ kə wìʔ à tsoŋ kəmpfɨ kə Yesù.

Və mbvɨ̀mə̀ Yesù əchʉʔ ə layn à sə̀ dìʔ kətsi kə kuʔsə Nyìngòŋ, kèn la Vəju nzì və djʉ̀ a əsè a kətsi akyì. Kətsi kə kuʔsə Nyìngòŋ akyìkə chò ə chʉʔ ə sə ntsi lanə, kyìʔi baʔtə əfo ə djʉ̀ a əsè ə̀ Yesù ə djʉ̀ əzuʔ wen.

A sə laʔtə nse nɨ̀ʔ noʔə̀ nànto. Ntsɨ̀ŋ ə̀ əngə̀ŋ ə̀ Nyìngòŋ banə la wooŋ shiə fa əkaŋ. Ghə̀ lyisə̀ ngùʔ yì fa əchʉ̀ əsə̀ yì ə̀ nwʉmə tsu. Vəsugèʔ a və ntsɨ̀ŋə̀ əsè ayì fwàyn ə̀ fəŋkə a nse a nə̀ mpfɨ ə viʔi.

Kyìʔi vyi zaʔə a əsè ayì, ntsɨ̀ŋ ə̀ əngə̀ŋ ə̀ Nyìngòŋ ayì gàʔ, “Kə ghə̀ŋ fwàyn. Yesù ko dìʔ a shə̀. Ghə̀ ə lù li fa əpfɨ, tà àndə ghə̀ tə̀ gàʔ la kə a ndìʔ! Ghə̀ŋ lye a wen ə chì əsè ə yen a.” Kyìʔi avyi lye ə̀ yen kəshi a kəmpfɨ kə Yesù kə tə̀ ndìʔ tsu. Kə nko bɛ̀ dìʔ tsu bwen!

Ntsɨ̀ŋ ə̀ əngə̀ŋ ə̀ Nyìngòŋ gàʔ à kyìʔi avyi, “Ghə̀ŋ djʉ̀ ə̀ shə̀ʔtə̀ à ndzɨ̀mtə̀sə Yesù, ‘Yesù ə lù li fa əpfɨ. Ghə̀ a djʉ̀ə̀ li a Galìli à ghə̀ŋ ə mbì.’”

Kyìʔi avyi ndìʔ nə̀ əfwàynə bɛ̀nə̀ əsaŋlə ghə. Vəwenə nyɨŋ li ə djʉ̀ ə shə̀ʔtə̀ nges ə̀ kənyʉ̀ akyì à ndzɨ̀mtə̀ sə Yesù.

Andə kyìʔi avyi nyɨŋə ə djʉ̀ə̀ shə̀ʔtə̀ nges ə̀ kənyʉ̀ akyì à ndzɨ̀mtə̀sə Yesù, Yesù vì à vəwenə, vəwenə kuʔsə wen. Yesù gàʔ, “Kə ghə̀ŋ fwàyn. Ghə̀ŋ djʉ̀ ə̀ shə̀ʔtə̀ à ndzɨ̀mtə̀ shom la vəwenə djʉ̀ a Galìli. Vəwenə a yen mò tsu.”

Fətitì fa nwàʔlə̀ ə̀ Nyìngòŋ//: Machò 27:62-28:15; Mak 16:1-11; Luk 24:1-12; Jon 20:1-18//